Te profet bidi Elaijago po da
17
(Dąį 17–21)
Elaijago te Israel bulude kulubage munu me tulugobeo po wai
1 Elaija aga te Tisbe taundu asai profet bidi deli da, aga te Gileat tǫ page bidi da. Me sogo deli aga aselama, tama te king Ahap suagaselama, tama agai agabolo e tama po wali, “Ena Godigo sę bidi dao, Israel hani dabe dena Genuai Bidi. Te God tigidali sogo bidada peyu, bidada pabo God dao, tama agai nogide eno nagebolo dolo po mu obao, te kulubage me, te hulide asobo segeni wę me asisiąbadi, te si sela kibu beba usu nigi paibao,” te po tama wali. “Tama tilaludu bididubadi, tama eno po wabo sogo bodoluba usu nagasaibao,” Elaijago te po wai. *Jer 5:17
2 Tama nosali te Genuai Bidigo te Elaijabolo e tama po wai, 3 “Nage e bulu tagalama, tama nage te giliga pedalobo madi te wę Jordan u badu pao, tama nage te dwasianu wę Kerit pąde duala selama, bidao,” wali. 4 “Nago te wę tuyu bidao. Tama eno te ba tadibolo olama, tama augwaligo tigidali sogo nagebolo nai magasu yaibao,” wali. 5 Tama tialima, te profet Elaija agai te Genuai Bidigo te wali podu wali pai, tama aga pelama, te wę Kerit pąde bidali, te Jordan wę u badu, te giliga pedalobo badu dao. 6 Tama te tigidali sogo te kigamu me, tama te pio me, te ba tadi dabe augwaligo te nai bret me, me te tuabo mi dabe me, te ba dabego agabolo magasuduali, tama agai te nai dabe tuyu, tama aga te dwasianu wę tuyu, tama bidali. 7 Tiali goli, te Israel bulude te tulubage munu me tulube, tama teyu, te me badu sogo nosali, te dwasianu wę Kerit me sula siyu yai.
Elaijago agai te we me deli dali, te aga wai dali, si tau sali po
8 Te wę Kerit te sula sai, tama tialima, Genuai Bidigo te Elaijabolo e tama po ola mani, 9 “Tama nage hogodama, nage te Saidon bulude te Sarefat hanu taunba bidigi pao,” wali. “Te taunde te Israel hani isąwai we me deli te bidibao, te we aga bidi isai dao,” wali. “Eno te we dąį ilibao, te wego agai nage tubo nai tau siyu, tama agai nage bugagia tonalumainao,” wali. *Luk 4:25-26 10 Tama tibaso, Elaija aga hodaloama, Sarefat buluba pai. Tama aga pelama, te oboba sabaligi pai, tama agai suali, ma we me deligo isi selama, sisinibo suali. Elaija agai sulama, agai koneani, te we wilawe we da homu yali. Tama agai te we i weyu, e tama wali, “Ena wę tuabo homu ebuo,” wali. “Nago te wę tubo mouwa dage genagi wę tulama, tama nago enabolo magasobo usu yaibawe?” te po wali. 11 Te wego te Elaijago wali po odama, tama aga wę sigi peyu pali. Tama Elaijago te we ma i weyu, e tama wali, “Eno homugo nago te dwasianu tubo nai bret pedainu me magasao,” wali.
12 Tama te wego agabolo te po wali, “Godigo nogide, naga Genuai Bidi, te God tigidali sogo bidada peyu, bidada pabo God dao, eno mu po tama obao, eno te bret nai menio,” wali. “Eno te dwasianu o gagawai nai plaua deli digi te tǫgo nigali mouwa dage genagi sospende munalubo,” wali. “Tama me te dwasianu oliv wel te gasa mouwa dage genagi sospende munalubao,” wali. “Eno megi te e dwasianu isi sesa bilibo da, teda eno te plauanu ulugi painu ebao,” wali. “Eno ogwa dali dadi sigo te megi tama silibo nai tama dadi sigo ula tulama, tama nosali dago tuabo nai mu menio,” wali, “tama teyu, da mu isaibao,” te wilawe we agai tama po wali.
13 Tialima, te Elaijago agabolo e tama po wali, “Nago homugo naga te dwasianu nai da olama, moni homu egio,” wali. “Nage pelama, te nago munalubo wali bret tama ulao,” wali. “Tiali goli, hasia bolo nago te plauago dwasianu peda siyu, tama me te nago wel me dwasianu siyu, tama te nago te bret dali ulama, tama nago enabolo magasao,” wali. “Tama nosali naga wai dali duga sigo tuabo bret nai ula tuao,” wali. 14 “Magi baso meni, God, Israel hanigo Genuai Bidi, agai e tama po wai, ‘Naga te mouwa dage genagi munalubo plaua munu me sia sogobeo, tama me te nago te wel me, te nago mouwa dage genagi sospende munalubo wel me munu me sia sogobeo,’ po wali, ‘tama munalua pobadi, te Genuai Bidigo te kulubage e tǫba tulubo bodoluba usu nigi paibao,’ po wali,” Elaijago te po te webolo wai. 15 Tama tialima, te wego aga beba pelama, te Elaijago wali po gilama yali. Tama nosali Elaija dali te we aga hani dali sigo augwali tuabo nai te umabo sogo tuabo nai usu mu elaluali. 16 Tama agai te mouwa dage genagide moni plaua umabo mu me munaluali, munu me sia sabe. Tama agai te wel mubo mouwa dage genagi me, te wel munu me sia sabe, tialima Genuai Bidigo agai te Elaijago pedauwalidu wali gilama yali.
17 Tialima, nosali te wego te wai gasi sali. Tama te wai gasi genuai mu elama, tama te wai isali. 18 Tama tialima, te wego te Elaijabolo te po wai, “Nage te Godigo sę ebo bidi dao, magi baso nago te tiwai kolesaga ena dali yaliwe? Tama nage aselama, tama Godigo homugo eno sęgę koneama, tama teyu, te eno wai isalio,” te wego te po wai.
19 Tama te Elaija agai te po wei ponoyu, e tama wali, “Nago te wai enabolo mao,” wali. Tama tialima, te Elaijago agai te isali wai digi aga idago nogode agai selama, tama agai aga pibo be ugwa badu habuba selasa holali, tama agai te betba pilali. 20 Tama agai e tama gedu haluasa po bomai mu wali, “God, eno Genuai Bidi, te e wilawe wego ena agai bugagia tonalubo da. Magi baso nago genuai sęgę e we tigide pedelaliwe? Tama magi baso agai e wai isilaliwe?” 21 Tama Elaija aga te wai bau badu aga sela sogo pigiluama, tama agai e tama gedu haluasa po wai, “God, eno Genuai Bidi, nago te e waigo hoboludu ogwa wai mobo ma mao,” wali. 22 Tama tialima, te Genuai Bidigo te Elaijago te gedu haluasa po wabo odama, tama agai te waigo hoboludu ogwa wai mobo ma mawai. Tama tibaso, te isali wai ma hoda holali. 23 Tama tibaso, Elaijago agai te wai nogo tolasa, aiyaba dulali, tama aga idabolo mani. Tama te Elaijago aga idabolo e tama po wali, “Suao, naga wai bugagia bidibao,” wali. 24 Tama aga idago e tama po wei ponani, “Mu tama o, megi eno koneanio, nage te Godigo sę ebo bidi dao. Mu tama dao, Genuai Bidi aga digi nagebolo mabo po te nago dabolo pusubo dao,” te wego te po wali.