4
Satango Jisasbolo dwai sę yanama, sinayani
(Mat 4:1-11; Mak 1:12-13)
1 Jisas tigide Godigo Tedali Mobo Bidi pągąnaluali. Tama Jisasgo te Jordan pabo ąį taga pelama, ma geasa pali. Tama Godigo Mobogo aga te bidi meni yai buluba odasa pali. 2 Jisas te bidi meni yai buluba pelama bidibadi yaide, Sarere a naga olama, a naga sogo, te 40 dei bidai elalubadi, Satango Jisasbolo dwai sę yanama sinayagasali. Te sogo usu nama Jisasgo nai munu me tubeo. Tama te sogo silibo si, Jisas nasi yali. 3 Tibaso, Satango agabolo wali, “Nage Godigo Ogwa da wida, teda nago wele elewibolo po olama, tubo nai gagagi sobaso da, nage tuao.” 4 Tiali goli, Jisasgo agai po wei ponoyu, te po wali, “Woo, Godigo bukude wali po e tiwai po wai dao, ‘Te tubo nai bretgo naga te bidi bidabo ula magobeo.’ ” *Bom 8:3 5 Nosali Satango Jisas odasa holama, polo tama tigidali we bidi tǫde bidibo ola mani. 6 Satango te po wali, “Te tigidali we bidi tonalubo bomo me, genuai nogi me, nagebolo naga mawaibao. Te tigidali nai eno tonalubo dao. Eno gasa bidibolo maiabo homu ebaso da, mawaibao. 7 Nago enabolo kidu tǫba polama, enabolo lotu po weyu da, teda te nai dabe naga saibao,” Satango te po wali. 8 Tibaso, Jisasgo wei ponoyu, te po wali, “Woo, Godigo bukude wali po e tiwai po wai dao, ‘Nago naga Genuai Bidi God dali naga lotu po weyu aga dologode bidao. Tama nago agai sę deli naga dąų olama yao,’ te po wai dao,” Jisasgo te po wai. *Bom 6:13
9 Nosali Satango Jisas Jerusalem Moni Lotu Be tempel poa pali daiba mu sela holali. Tama Satango te po wali, “Nage Godigo Ogwa da wida, edu aba samanao. 10 Godigo po wali bukude te po wai dao, ‘Godigo aga ensel dabebolo olama, nage saboa sagasaibao,’ te po wai dao. *Tib 91:11 11 Tama te bukude me te po wai dao, ‘Augwa nogogo nage tola selama, elewigo nage me sągąde me selegobeo,’ wai dao,” te po wali. *Tib 91:12 12 Tiali goli, Jisasgo wei ponoyu, te po wali, “Te bukude po tama telalubao, ‘Nago Genuai Bidi God olo subigila usu sigio, sinagio. Aga te nago God dao,’ ” te po wali. *Bom 6:16 13 Satango tama sinana bilali dobaso, Jisas aga taga pali, me sogo ma sinawainu yai.
Jisasgo Galili tǫde sę ebo gagalali
(Mat 4:12-17; Mak 1:14-15)
14 Te Godigo Tedali Mobo Bidigo bomode Jisas ma pelama, Galili tǫba sabolali. Aga asali po te bulude mu pagia pali. 15 Hauwa sogo Jisas agai po te Juda dabego bomo yai po ola mabo be dabede te we bidibolo ola madu geani. Tama tibaso, tigidali we bidigo aga nogi ugwaba sali.
Nasaret bagego Jisas tudiba ilali
(Mat 13:53-58; Mak 6:1-6)
16 Te bidi Jisas polobadu aga dwasianu badi bidama, gomunai yali pesage te Nasaret be nani tomoba palio. Te Sabat sogo aga te Juda dabego bomo yai po ola mabo beba pidu bogia. Tama tede aga te Godigo wali po buku po nedai hagede, dolalugulali. 17 Augwaligo agabolo polobadu Godigo po pusa mabo profet bidi nogi Aisaiago asęani po buku nedao olama mawai. Tama agai te buku dagalama, po e tama asęai suali, augwalibolo haninama nedali.
18 “Genuai Bidigo Mobo Bidi ena dali bidibao.
Agai dwagi yai po eno te nai meni yai we bidibolo
ola momainu ena sa muai dao. Agai ena tama po
pupusu bilimainu tagala palai dao, ‘Dage kalabus
yali bage kalabus tagala piąo. Gedu widai bage,
dage duga gedugo ma sueibao.’ Kalabus sęgo tabibo
bage augwaligo sę togolomainu agai ena tagala
palai dao. 19 Genuai Bidigo e tǫde bidibo we
bidi ma sagasabo bodolu magayagasobaso, pupusu
bilimainu ena tagala palali,” *Ais 61:1-2
te asęani po Jisasgo haninama nedali, aga digi aga homugo tiyai. 20 Te Jisasgo te buku ma mesegelama, te buku tonalubo bidibolo menama, aga dugagulali. Tama te be tomode bidali we bidigo aga naga tonono yali. 21 Tibaso, agai te po wabo gagalali, “Megi tama te eno nedali po dolo tų sisu pabo po duga te odali dao,” te po wali.
22 Te we bidi tigidali augwaligo Jisas nogi ugwaba sali, tama Jisasgo dwagi yai po pusalide augwali tigidali noma sali. Tiali goli, augwaligo te po wali, “Mena tamawe, e bidi da, Josepgo ogwa meni yali wenagao,” te po wai dao.
23 Te Jisasgo augwalibolo te po wali, “Mu tama, dagego enabolo hasia bolo te po waibao, ‘Dokta bidi, naga digi naga ma geseleyu yao. Nago bulu me nogi Kaperneamde yali sę po dago odai dao. Tama naga te yaligia nage e pesagede me ma tama tiao,’ dagego enabolo waibao.” 24 Jisasgo wei ponoyu, te po wali, “Eno dagebolo mu tama te obe dao, Godigo po ola mabo bidigo po aga bulude bidu wabo, aga te bulu bidigo mu tama odobo menio. 25 Eno dagebolo mu tama obe dao, Godigo po pusa mabo bidi Elaija bidali sogo, kibu be sela olama, me kibu be tomode togolama, tulubage munu me tulai menio. Tigidali pesagede nasi ela pai dao. Te sogo Israel hani wilawe we hauwa mu bidai dao. *1 Kin 17:1 26 Tiali goli, Godigo Elaija te Israel hani wilawe we me tau somainu teba pao wai menio. Tiali goli, te Israel hani isąwai bage Saidon tǫde, Sarefat be nani we wilawe deli bidibo madi naga tau sigi pao wai dao, Godigo. 27 Me Godigo po pusa mabo bidi Elaisa bidali sogo, Israel bage oiyabe bidi hauwa bidai dao. Tiali goli, augwali me deli ma geselai menio. Me ma, te Israel hani isąwai oiyabe bidi me deli bidai, te Siria tǫde. Agai nogi Naman. Te oiyabe bidi deli digi Elaisago ma geselai dao,” Jisasgo te po wali.
28 Te Juda dabego bomo yai po ola mabo bede bidali bagego te po odoyu, moni sębę yali. 29 Augwali hodaluama, Jisas nogo tuluama, aga te be nanidu kegasa pelama, buluba sąyani. Te be nani dude sę yai dao. Tama augwaligo te sau mabo dageba Jisas odasa pali, te sauba sąwai hagede. 30 Tiali goli, Jisas aga te bidi hauwa tomo agebeledu dią sesa palima, aga polo palio.
Jisasgo bidi me tigide dwai haubo sela sąyani
(Mak 1:21-28)
31 Te bidi Jisas Galili bulude be nani me nogi Kaperneamba dulali. Tama te Sabatde we bidi Godigo po ola maduali, te Juda dabego bomo yai po ola mabo be tomode. 32 Tama agai po bomo yai mu wabo odama, te we bidi noma sali. 33 Te be tomode bidi me dwai haubo dagawai bidi bididuali. Agai moni hai olama, te po wali, “Tega Jisas, nage Nasaret bidi da. 34 Nage dabolo magi sę yainu asaliwe? Nage da dolainu asaliwe namao. Eno nage koneani. Nage Godigo gasagi yai tedali wiegi yai bidi da,” wali. 35 Tama Jisasgo agai po tomode togwa sąyu, te po wali, “Nage sagiasa peyu, te bidi taga soao,” wali. Tama te dwai haubogo te bidi augwali tomode te tǫba sąyani. Tama te dwai mobogo taga pelama, te bidigo tigi me dolobe. 36 Tibaso, tigidali we bidi midigi yali. Augwa hasi ugwa tono, eda tono eyu, te po wali, “E ma, magi po wagawe? Dwai haubobolo bomo elalubo bidigo wabo po gagawai wabo yabao. Te po odama, wabo po selama, te dwai haubogo te bidi taga pobao,” te po wali. 37 Jisasgo tama tiali po te bulu tigidali bila similali.
Pitago aga augo gasi Jisasgo pogo silali
(Mat 8:14-15; Mak 1:29-31)
38 Te Jisasgo te Juda dabego bomo yai po ola mabo be taga pelama, tama Saimongo be tomoba pali. Saimon aga au tigi moni posolo gasigo mu isai sęai pila muani. Te we tau somainu eyu, augwaligo Jisas i wali. 39 Te we pageba Jisas aga dolalugi pelama, “Te dwai gasi, nago te we taga pao,” Jisasgo te po wali. Te po obaso, te gasigo te we taga pali. Tama tilama, te we polo tama ma hogoda sanama, be page asali bidi dabe nai ula mabo sę ela bilali.
Jisasgo we bidi hauwa geselali
(Mat 8:16-17; Mak 1:32-34)
40 Te giliga ge aba degasaide, te gasi yali bidi aga abagi dedego augwali Jisas aga pageba odasa aselawali. Tama agai nogo te gasi we bidi dononama, mumuna bilali. Tama augwali tigidali ma gesa pali. 41 Dwai haubo dabego we bidi hauwa taga pali. Tama te dwai haubo dabego hai olama, te po wali, “Nage Godigo Ogwa dao.” Augwaligo koneani, Jisas te Godigo we bidi tau somainu sa muani bidi Krais da. Tama tibaso, augwaligo te po te we bidibolo waidali weyu, agai augwaligo po tomode togwa sąyani.
Jisasgo be nani dabede sę ela bilali
(Mak 1:35-39)
42 Te sogo do kigamu hulide mu Jisas hogoda sanama, bidi meni yai buluba mu pali. Nosali te we bidi augwaligo gegali digi sulama, augwali taga pidali weyu, “Jisas, nage ede bidao,” wali. 43 Tiali goli, agai wei ponoyu, te po wali, “Godigo eno sę emai hagede, tagala palali sę gasa hanuba me egi pabo elalubo. Godigo we bidi tonaluabo po pupusa memena bilabo sę elalubo,” te po wali.
44 Tama aga te po Juda dabego bomo yai po ola mabo be dabe tomode ola maduali, te Juda dabego tǫde.