1 Te Naman aga te Siria bulude ami polalubo ofisa tobolu bidi da. Siria bulude bidibo kingo te bidi agade godolo mu elama, tama agai moni homu pemene mu yai, magi baso meni, te bidi Naman aga nogo tų yaide te God Genuai Bidi aga digi te Siria ami bidi dabe augwali tau siyu, tama augwaligo te boi bidi dabe aiyaba elaluali. Naman aga te dwagi yai ami bidi mu, tiali goli aga tigide oiyabe gasi yali.

2 Me sogo deli Siria ami bidi dabe augwaligo te Israel bidi dabe dali boi hwįgi pai, tama augwaligo te Israelgo wegi ogwa we me deli nogo tulama, augwa buluba odasa soali. Tama te wegi te Namango wego sę ebo we nigilama bidai. 3 Nosali te Israel wegi ogwa wego te Namango webolo e tiwai po tama wai, “Tialima, te naga bidi aga pelama, te Samaria bulude bidibo profet bidi sugi pobaso da, teda te dwagi yai mu yaibao. Magi baso meni, te profet bidi agai nago bidi te gasi ma usu ilaibao,” wali.

4 Te Namango te po odama, tama aga pelama, te king agabolo wagi pali, te Israel wegi ogwa wego wali po wagi pai. 5 Awe, kingo agabolo e tiwai po tama ola mani, “Eno pas me deli asęnama, te Israel bidigo king bidiba tolaibao. Te pas eno nagebolo menama, tama nago sela pelama, agabolo magi pagameo,” wali. Tama kingo pas asęnama, te Namanbolo mawai, tama Namango te 300,000 silva mone sobadi, tama me te gol te sęgę bidi sese sela 60 kilogram gol sobadi, me te nogo si dwagi yai au ebo bulubo ugwa sobadi elama, tama aga hodaluama, te Samaria buluba pai. 6 Tama te Namango te Siria bidi dabego king bidigo te pas selama, tama agai sela pelama, tama te Israel king bidibolo magi pali. Te pasde e tiwai po wali, “Te pasgo te eno ami sę ebo polalubo ofisa bidigo sęgę po nagebolo konelaibao,” wali. “Naman aga te oiyabe gasi yalio, tama eno homugo te nago aga ma usu ilao,” wali.

7 Israel kingo te Siria king agai te pas sulama, tama agai te aga holobo ugwa pisą yali. Aga te ugwa pisą yali te aga haligade sębę dwai mu ebo page ola mayu, tama tiwai. Tama agai e tiwai po tama wai, “Magi elama, te Siria king bidigo te po enabolo tolali, eno menagi elama, e bidi oiyabe gasi dodolomainu waliwe? Agai homugo ena God da weyu, tama te bidi dabe bugagia bidibo me, ma te bidi isibo me, te bomo agai homugo eno elalubawe weyu, waliwe, a? Eno koneanio, agai homugo ena dali boi hwįainu tų gegeyu walio, te tama dao,” wali.

8 Tiali goli Elisa, te Godigo sę ebo profet bidi, agai te kingo te holobo ugwa pisąlama, te haligade sębę ebo po odali. Tama tibaso, Elisago te kingbolo e tiwai po ola tolali, “Magi baso nage haliga sęgę elama, tama naga holobo ugwa pisą yaliwe? Te bidi ena pageba eba tagala palao, tama eno aga e tama ola mawaibao, te Godigo profet bidi me deli te Israelgo bulude bidibao,” wali. 9 Awe, kingo Namanbolo te po wai, tama Naman aga te kibu hosgo kegebo karis nai Naman aga tede dugulasa pali. Te me badu karis me te bidi aubo hos kibu me aga dali augwali hodobo pali. Tama augwali hodobo tama pelama, te Elisago be tųba sabaligi pali. 10 Tama Elisago bidi me deli tagala palama, te bidigo Namanbolo e tiwai po tama walali, “Nage te wę Jordan teba pelama, te nogo a olama, me badu nogo si wagi solama sogo, nage tama sogo wę pauao. Tama teyu, nago gasi silaibao, tama naga tigi wiegi yai tigiwali yaibao,” wali.

11 Namango te po odama, tama agai wado dwai mu yali, tama te Elisago be tagalama pali. Tama agai te po wali, “Eno homugo Elisa aga buluba tią asama, agai ena sumainu homu yaio. Tama agai Godibolo mu gedu haluasa po omainu eyu, aga Genuai Bidi dolo, tama agai nogo ena e gasi oiyabe keni yai tigiba pąba mugi sogo da usu, tama agai te kolesaga egi sogo da, teda ena ma usu egi dao. Tiali goli, menio. 12 Agai enabolo Jordan wę paugi pao, te po wali. Tiali goli, Damaskus bulude wę si elalubo, te wę si nogi Abana me Farpar, te wę sigo Israel bulude elalubo tigidali wę dabe aiyaba elaluai dao. Tiali te wę dabede tegi sogo da, teda eno oiyabe gasi ma usu egi dao. Tialima, ena bulude bidigi sogo da, tama ena te wę si paubo si, teda eno oiyabe gasi ma usu egi dao.” Namango te po wali, tama agai haligade sębę genuai me elasa peyu, aga pali.

13 Awe, aga sę ebo bidi dabe augwaligo tama augwali aga pageba aselama, te po wai, “Genuai bidi, tialima profet bidi agai nagebolo tigi dene yabo sę po nagebolo wagi sogo da, dago koneanio, tama nago te sę egi da. Tialima, agai te tiwai po me wabeo. Menio. Tialima, agai nagebolo wę deli pauao po walio,” wali. “Tama tialima, dwagi yai dao, tialima nago agai po wali pelama, nage wę pauagameo,” wali. 14 Awe, tama Namango augwaligo te wali po odama, tama aga pelama, wę nogo a olama, me badu nogo si wagi solama sogo Jordan węde pauali, Elisago te po wali gilama, tama tibo si agai te oiyabe gasi tigidali sia sali. Tama agai tigiwali te dwagi yai elama, te gesi wai bǫų tigiwali tiwai pedelali. *Luk 4:27 15 Tama aga dali, te aga sę ebo bidi dabe dali, augwali hodobo ma geasa peyu, te Elisa pageba sabolali. Te profet te Godigo profet bidi mu. Tama te Namango Elisabolo e tiwai po tama wali, “Mu tamao, megi eno koneanio, e tigidali bulu tǫde god me deli me bidibeo. Israel dagego God, te God deligo tigidali bulu usu elalubao. Tama tialima, Elisa, eno genuai bidi, eno homugo eno nagebolo eno puba hwi wabo nai nagebolo mawaio,” wali.

16 Tialima, Elisago te po wei ponoyu, te po wali, “Menio. Ena te tigidali sogo bidada pabo Genuai Bidi Godigo sę ebo bidi dao. Tama agai nogide, eno mu po obao, eno nago magi nai me deli munu me deli sogobeo,” wali. Naman agai bomo mu eyu, “Elisa nago eno nagebolo puba hwi wabo nai nago sao,” wali. Tiali goli, Elisa agai hagela ebo, tama agai sogobeo.

17 Namango te po wai, “Tialima, nago homugo te puba hwi nai enade sogobe wida, awe, teda tagalao. Tialima, eno homugo nago ena sula tagalao, eno te Israel bagego tǫ me eno saio, dwasianu te eno donki kibu sigo tolabo usu nuo, tama ena buluba ma peyu, selasa paio. Te tǫ aiyadu munama, Genuai Bidi dolo denami yai ofa nai ulabo madigi sai yainu, alta ugwa badu te Genuai Bidi dolo denami yai ofa nai ula mabo sę yaio. Tama nosali eno te ofa nai siaba ulama, te siago tigidali ulama, te siago tigidali nai dela pabo ofa nai me, tama te gasa ofa nai me, te genuai mu deliba tama sisinama, ulaio. Tama eno te gasa tibo godiba ofa nai ula magobeo, eno munu ma usu egobeo. Mu menio. 18 Tiali goli, eno homugo nago eno sęgę koneao, tama Genuai Bidi agai eno te dwai kolesaga yali sęgę sela sąmainao. Te eno king bidi agai te tibo god Rimon godiba lotu po wagi pabo dao. Tama ena aga dali bidibo. Tama da te lotu be tomoba pabo sogo, kingo ena nogo tolasa pabo da. Tama teyu, te agai te tibo god Rimon lotu po weyu, kidu sugunubo dao. Agai ena kegasa pabo dao, tama eno me te eno te tibo god noma elalubo madigi te pąba pelama, eno kidu sugunubo dao. Tama eno homugo te Genuai Bidi God agai eno te sęgę sela sąmaio,” wali.

19 Tama Elisago te po wai, “Nago haliga sęgę egio,” wali. “Nago haliga tegaluama, tama nage pao,” wali.

Awe, tama te Namango Elisa taga pali. Tialima, Naman digibulu pisąbadi, 20 tama Gehasi, Elisago sę bidi, aga digi e tiwai po aga homude tama wali, ‘Eno genuai bidigo te Naman olo pabo sula tagalali. Magi baso agai Namango te Naman aga homugo te aga dolo mawainu yali nai sabewe? Genuai Bidi God aga te tigidali sogo bidada pabo dao. Te mu po dao. Tama te tiwai gilama, eno mu po tama obao, tama ena Naman aga pali wali ma udada pelama, tama me badu agai te nai eno saio,’ Gehasigo te homu yai.

21 Tama aga hodaluama, te Naman pali wali pai. Namango tonobadi yaide, bidi me deli udada asu, te aga wali asobo suali, tama tibaso aga te karis kibu dąų walama, tama aga tǫba dulama, tama te tų tilide dolaluali, tama Gehasi asama, tama aga sisinagasali. Tama Namango Gehasibolo e tama tiwai po hanalu wali, “Magi nai me deli dagede pedalaliwe, a?”

22 Tama Gehasigo te po wai, “Menio. Da bugagia bidibao. Tiali goli, eno genuai bidigo ena tagala palama, e tiwai po nagebolo tama wagi soao obaso, ena asobao,” wai. “Megi tama bolo te profet gesi bidi si agai beba asalio. Te profet bidi si augwali si te bulu du Efraimde bidibo profet hani dao. Tama agai homugo te nago aga silva mone beg me deli badi, me te dwagi yai bulubo ugwa si ebadi elama, mao wali. Tama Elisa agai te profet bidi dabe augwaliba mawaibao,” wali.

23 Te po obaso Namango te po wei ponoyu, e tama po wali, “Deli silva beg naga sigio, me silva beg me sao,” wali. Tama agai te Gehasigo sao olama, bomo yali, tama Gehasi agai te po usu dao wali. Tama tialima, Namango te beg side silva muani silva te 60,000 kina mone usu te beg side bulali. Tama me te agai te dwagi yai holobo ugwa si me sela mani, tama agai te nai dabe selama, tama aga te sę ebo bidi sibolo mani, tama agai augwali sibolo te dodobage tolao po wali, tama dage si polasa pao wali, Gehasi aga Elisago beba polasa pali.

24 Augwaligo te Samaria bulude te Elisago beba sabalobo sogo, Gehasigo te nai dabe tolama, te be tomoba selasa pali. Tama aga te sę ebo bidi si te Naman pageba tagala palali. 25 Te bidi si paide, tama aga te beba ma pai. Tama Elisago agabolo hanalu wali, “Gehasi, nage mena pai, tama nage asobawe?”

Tama Gehasigo te po wali, “Genuai bidi, ena gasaba me pabeo.”

26 Tiali goli, Elisago te po agabolo wali, “Menio, nago tibo po wabuo. Nago homugo da, eno nage subewe weyu obawe, a? Eno mobo nage dali bidibadi, tama eno sulali da, te bidi te kibu karisde duga yali tagaluyu, nage pageba asobo sualio,” wali. “Gehasi, megi da, te mone selama, te holobo ugwa me, me te oliv gi me, tama me te wain gi me, tama me te sipsip kibu me, tama me te bulmakau dabe me, tama me te sę bidi dabe me, me te olo sę we dabe me, te abelabo sogo megi menio. 27 Tiali goli, nago te Naman dali te mone me te haniani dodobage salio,” wali. “Tama tialima, te Namango tigide elaluali oiyabe gasi, megi te nage tigide pedalaibao. Tama nage dali, te naga hani te nosali pedalobo hanide, dage te oiyabe gasi tigidali sogo sesa peduagameo,” wali.

Tama te Gehasigo te Elisa taga pabo sogo, te Gehasi te oiyabe gasi sali. Tama agai tigi usugali tigidali te tedela yai mugo sela pali.