Profet Amosgo Buku
Polasa nedebo po
Dago homu te profet Amos agai pusali po augwaligo bukude asęai dao, tama agai po wabo buku te Baibel tomode elaluai dao. Tama tebode Amos polasa peyu, tama nosali badu pedelali gasa profet dabego pusali po me augwaligo bukude nosali asęnama, tama buku Baibel tomode elalubao. Amos aga te Juda tǫ kantri pedaide te dwasianu taun bidi me deli da, te hasia bolo aga te sipsip tonalubo bidi bidali. Tialima, Godigo aga i olama, agai po te kantri Israel not badu bidibo we bidi augwaliba pusigi pomainu yalio. Te sogo te Israel dabe augwali bugagia bidiyu, te magi nai me deligo augwaliba genuai sęgę me mabeo.
Te Israel dabe augwa homugo te augwali bugagia bidiba homu yali, tialima Amosgo augwaliba te tiwai po wali, te God gedude augwali bugagia me bidibeo. Augwaligo te magi nai meni yai bidi dabe augwali tomode bidibo augwaligo bugagia me tonalusąwai, tama augwaligo te doloba pai kolesaga augwa abagi dabe tigidaliba me ebeo. Amosgo augwaliba bomai po mu mani, te augwaligo homude me te ebo kolesaga dola mabo po walio. Agai te po wali, te augwali homu me begelisąbaso da, teda Godigo dwai dene mu augwaliba ilaibao. Te Israel gegunai bidi dabego agai te po odobo sogo, augwaligo aga te Juda tǫ kantri pedaiba ma sela sąyabo homu yai dao.
Amosgo te we bidi augwaliba te tiwai po walali, te augwaligo mena kolesaga ebode te Godigo magi sę me egobe da, te homu elamuo. Augwaligo te tobage homu elaluyu da, augwaligo te God munu ma konegobe dao. Augwaligo te tiwai tama bugagia koneao, God augwa Genuai Bidi da weyu, tama agai te tigidali sę yabo bomo elaluba homu yao. Te agai augwaliba dwai dene maiabo bomo me elalubo dao. Te profet Amosgo te po wai.
Te Israel augwaligo dwai sę ebo genuai elalubaso, Amosgo te Godigo po augwaliba pusalio
1
(Dąį 1:1–5:3)
Godigo po Amosba mawai
1 E po da, te bidi Amosgo pusali po dao. Amos aga te Tekoa taun bidi da, tama aga te sipsip kibu hauwa page bidi me deli bidai dao. Godigo agabolo te Israel hanide e po mani sogo, aga te nade subo nai tiwai gilama yali. Te sogo Usia te Juda tǫ kantri king bidibo sogo, me te Jeroboam, te Joasgo ogwa, te Israel tǫ kantri king bidali. Te sogo Amosgo te nade subo nai tiwai sulama da, teda nosali badu te kibu be si bidama da, te genuai tǫ mali yai. *2 Kin 14:23-29; 15:1-7; 2 Sto 26:1-23
Genuai Bidigo te we bidi augwaliba dwai dene maiabo bomo elalubao
(Amo 5:8-9; 9:5-6)
2 Te Amosgo e bukude wabo po page e tiwai dao,
Genuai Bidi te Saion bulu dude bidiyu,
te agai i hai genuagia mu udubao.
Awe, aga tede te Jerusalem moni taunde bidiyu,
sębę ebaso, te agai dogonigo hwą bomonama obao.
Tama tibaso, te sipsipgo tuabo wiegi yai
nosai dabe sasia pobao,
me te Karmel bulu dude elalubo ni yabe dabe,
tigidali wa pobao. *Jol 3:16
Godigo te Siria tǫ kantri we bidi augwali po tų ilaibao
3 Genuai Bidigo wabo po e dao, “Hauwa sogo te Damaskus hanu we bidi, te Siria tǫ kantri bage, augwaligo dwai sęgę sabo sę idu geai. Tebode augwaligo dwasianu toma me nabeo. Menio. Augwaligo te Gileat tǫ we bidi dabe dali dwai sębę eyu mu dolali, tialima, mu tama, eno te Damaskus dabeba dwai dene mu mabo sę yaibao,” wali. 4 “Awe, eno isi te king Hasaelgo sę yani genuai wiegi yai beba te sia tula palaibao, tama te isigo te king Benhadatgo taun ulaibao, te bomai obo elalubo taun dao. 5 Eno te Damaskus genuai taun te genuai sunumi dąų walobo ain ba dabe te togolama, mimia sąwaibao. Tama eno te Odogo Bulu Avende bidali we bidi tigidali sela sąnama, ela gudulubadi, tama eno te tǫ kantri Beteden king bidi me ela gudulaibao. *Te Odogo Bulu Aven, me kantri Beteden te taun Damaskus pąde elaluali bogo. Tialima, te Hibru pogo te Odogo Bulu Aven nogi te pąde te tobage po tiwai elalubao, “te dwai kolesaga dabe ebo odogo bulu da,” wabo. Te nogi Beteden te tobage po tiwai si elalubao, “te wiegi yai homu pemene ebo hanu da,” wali. Te nogi ede elalubo te Godigo te we bidi augwaliba dwai dene maiabo kolesaga augwaliba yali po ede ola mabo tiwai po wali. Tama te Siria hani bage te tǫ kantri Kirba kalabus paibao, te giliga pedalubo badu elalubao.” Te po da, Genuai Bidigo po dao. *Ais 17:1-3; Jer 49:23-27; Sek 9:1
Godigo te Filistia tǫ kantri we bidi dabe augwali po tų ilaibao
6 Genuai Bidigo wabo po e dao, “Hauwa sogo te taun Gasa we bidi dabe, te Filistia tǫ kantri bage, augwaligo dwai sęgę sabo sę idu geai. Augwaligo te tebode dwasianu toma me nabeo. Menio. Te Gasa dabego te bulu hani bage me deli sese selama, te kantri tǫ Idomba kalabus sę emainogo sela pali. Tialima, mu tama, eno te Gasa dabe augwaliba dwai dene mu mabo sę yaibao. 7 Tialima, eno te isi Gasa taun obo tomoba tula palaibao, tama te isigo te taunde bomai be dabe ulaibao. 8 Te Filistia tǫ taun dabede eno tama tiaibao, eno te taun Asdot hani bage tigidali ela gudulama, tama eno te Askelon king me ela gudulaibao. Tama eno te taun Ekronba me te dwai sęgę mabo sę ilama, tama te Filistia tǫde bidali we bidi dabe sese eno ela mu silaibao.” Te po da, Genuai Bidi Godigo wai po dao. *Ais 14:29-31; Jer 47:1-7; Ese 25:15-17; Jol 3:4-8; Sef 2:4-7; Sek 9:5-7
Godigo te taun Tair we bidi augwali po tų ilaibao
9 Genuai Bidigo wabo po e dao, “Hauwa sogo te taun Tair we bidi dabego dwai sęgę sabo sę idu geai. Augwaligo tebode dwasianu toma me nabeo. Menio. Augwaligo te Israel we bidi hani me deli sese ela gudulama, te tǫ kantri Idomba kalabus sę emainogo sela palio. Polobadu augwaligo te Israel hani bidi augwali dali te po me deli dąų walama, te augwa hodobo deliba bugagia bidinao wali, tiali goli augwaligo te dąų walali po bolali. Tama tialima, te mu tama, eno te Tair dabeba dwai dene sęgę mabo sę yaibao. 10 Eno te Tair taun obo dabeba te isi tula palama, tama te taunde bomai be dabe te isigo dela silaibao,” te po wai. *Ais 23:1-18; Ese 26:1–28:19; Jol 3:4-8; Sek 9:1-4; Mat 11:21-22; Luk 10:13-14
Godigo te Idom kantri tǫ we bidi augwali po tų ilaibao
11 Genuai Bidigo wabo po e dao, “Hauwa sogo te Idom tǫ kantri we bidigo dwai sęgę sabo sę idu geai. Augwaligo te tebode dwasianu toma me nabeo. Augwaligo te Israel hani we bidi dabe pobeasa pali, te augwa ama dabe digi †Te Israel dabe augwali hani te Jekopgo wąį nǫųde bulali, tama Idom dabe augwali hani bulali wąį nǫų te Iso da, te Jekopgo ama dao. Te buku Gag, Dąį 36:1-8, tede te po elalubo suao. te augwali bobage hwą ge bainatgo elalio. Te augwali hobede eyu, tau sabo homu eyu, tama augwali tagalabo homu dwasianu me ebeo. Mu menio. Augwaligo haliga sębę ebo wado yabo homu sębę genuai mu elama, posolo mu yai, tama te haliga sębę yali me silibeo. Te me elalualio. Tialima, mu tama, eno te Idom dabe augwaliba dwai sęgę mabo dene mu ilaibao. 12 Eno te isi aiyaba tula palama, tama te Teman taun, me Bosra taun sigo elalubo bomai be dabe te isigo domainu ulaibao,” te po wai dao. *Ais 34:5-17; 63:1-6; Jer 49:7-22; Ese 25:12-14; 35:1-15; Oba 1-14; Mal 1:2-5
Godigo te tǫ kantri Amon we bidi augwali po tų ilaibao
13 Genuai Bidigo wabo po e dao, “Hauwa sogo te Amon we bidi dabego dwai sęgę sabo sę idu geai. Augwaligo te tebode dwasianu toma me nabeo. Menio. Augwaligo te tǫ dage me badu sainu, boi hwįbo sę ebadi, te tǫ Gileat bulude augwaligo te wai haliga elalubo we dabe haliga hwągo aluali. Tama tialima, mu tama, eno te Amon dabeba dwai sęgę mabo dene mawaibao. 14 Eno te moni taun Raba aiyaba isi tula palama, tama te taun bomai be dabe isi ulaibao. Te ami bidi augwa boi hwįbo sogo, te i hai bomonama weyu, tama te hwįbo bomai pedalu, te bomai wali me deli te dwai sogo pedalubo tiwai yaibao. 15 Te boi bidi dabego te Amon king aga ofisa bidi dabe dali, augwali te gasa buluba kalabus igi painu sela paibao.” Te po da, Genuai Bidigo po dao. *Ais 34:5-17; 63:1-6; Jer 49:7-22; Ese 25:12-14; 35:1-15; Oba 1-14; Mal 1:2-5
*1:1: 2 Kin 14:23-29; 15:1-7; 2 Sto 26:1-23
*1:5: Te Odogo Bulu Aven, me kantri Beteden te taun Damaskus pąde elaluali bogo. Tialima, te Hibru pogo te Odogo Bulu Aven nogi te pąde te tobage po tiwai elalubao, “te dwai kolesaga dabe ebo odogo bulu da,” wabo. Te nogi Beteden te tobage po tiwai si elalubao, “te wiegi yai homu pemene ebo hanu da,” wali. Te nogi ede elalubo te Godigo te we bidi augwaliba dwai dene maiabo kolesaga augwaliba yali po ede ola mabo tiwai po wali.
*1:5: Ais 17:1-3; Jer 49:23-27; Sek 9:1
*1:8: Ais 14:29-31; Jer 47:1-7; Ese 25:15-17; Jol 3:4-8; Sef 2:4-7; Sek 9:5-7
*1:10: Ais 23:1-18; Ese 26:1–28:19; Jol 3:4-8; Sek 9:1-4; Mat 11:21-22; Luk 10:13-14
†1:11: Te Israel dabe augwali hani te Jekopgo wąį nǫųde bulali, tama Idom dabe augwali hani bulali wąį nǫų te Iso da, te Jekopgo ama dao. Te buku Gag, Dąį 36:1-8, tede te po elalubo suao.
*1:12: Ais 34:5-17; 63:1-6; Jer 49:7-22; Ese 25:12-14; 35:1-15; Oba 1-14; Mal 1:2-5
*1:15: Ais 34:5-17; 63:1-6; Jer 49:7-22; Ese 25:12-14; 35:1-15; Oba 1-14; Mal 1:2-5