63
Genuai Bidigo aga boi bidi dabeba dwai dene mawaibao
1 Te king bidi tiwai bugagia mu au elama,
te taun Bosra te tǫ kantri Idom badu
tagalama asobo bidi de dawe?
Te aga genuai bomo dali wele sesa asobo bidi de dawe?
Te aga gudali ugwa tonani te mama mu yalio.
“Te ena, Genuai Bidi tama dao.
Eno te we bidi dabe ma sabo bomo elalubao,
tama eno te tiwai po obao,
te eno doloba pai kolesagade,
eno te augwaligo boi bidi dabe aiyaba elaluaibao,”
2 Magi elama te nago gudali
ugwa dabede mama kaneme mu yali,
te bidi te wain nigibo tomoba pali tiwai elama,
te wain wai agabo digi pabo tiwai yali da, agawe?
3 “Eno bulu tǫ kantri dabe agawali,
te bidigo wain du wai te masigi pou tomode agabo
tiwai yali,
te gasa tǫ kantri bidi me deligo ena tau me sabeo.
Eno augwaliba haliga sębę eyu,
wado dwai mu olama,
te eno augwali bomonama mu
agawali madi te augwa kaneme gela tagalu,
te eno gudali ugwa dabede kaneme dagana salio.*Ped 14:20; 19:13, 15
4 Eno te ena sainu sa muani we bidi dabe sabo sogo
pedelalio,
tama tiyu, megi sogo te eno augwaligo boi bidi
dabeba dene mabo sogo dao.
5 Ena dwagila mu midiga sayu tonani,
te tiwai te ena tau sabo bidi me elalubeo.
Tialima, te ena bomogo digi te eno genuai haliga sębęgo
me,
eno te ena we bidi dabe ma siyu,
te eno augwaligo boi dabe aiyaba elaluai dao.*Ais 59:16
6 Te eno genuai haliga sębęgo,
eno tigidali we bidi dabe agala salio.
Te eno haliga sębę ebo kabude te ąį augwa tumainao,
te augwali aiyoge page dwai mu yalio.
Te eno augwaligo kaneme tǫba gelu tiai dao,” wali.
Te we bidi dabego Genuai Bidigo wiegi yai kolesaga homu kone palali
7 Te eno Genuai Bidigo wiegi yai olo mu tau sabo
kolesaga po pusubao.
Te eno aga nogi ugwaba siyu,
te agai da tau siyu, wiegi yai kolesaga hauwa
yali po pusaibao.
Awe, te aga genuai olo mu tau sabo wiegi yai kolesaga,
me homu dene ebogo,
agai te Israel haniba wiegi yai sę mu yalio.
8 Genuai Bidigo te po wali,
“Te hani dabe, augwali te eno hani we bidi dabe
mu da,
te augwa hagoma elama, eno po me sela sągobeo.”
Tama te aga augwali ma sali bidi pedelai dao.
9 Te augwali dene me sęgę tolali sogo,
Genuai Bidi me augwali dali te dene me sęgę tolali.
Te agai haliga augwalide homu dene ebaso,
te agai augwaliba te olo mu tau sabo
wiegi yai kolesaga yali,
tama aga digi te mobo bidi ensel tiwai pedelama,
te augwali ma sali.
Te tobage sogo sesabi mu elama,
te agai augwali tolalu,
te augwali bugagia mu tonaluai dao.
10 Tialima, te augwaligo agaba hagoma eyu,
te agai homu ogwa wai mobo te haliga sęgę mu
ilali.
Tama tibaso, aga digi augwaliba boi bidi elama,
te augwaliba hwįani.
11 Tialima, nosali augwa te polobadu
yali sogoba homu kone palali.
Augwa te Moses me aga we bidi dabeba homu kone ma
palama,
augwa te tiwai po wai,
“Te Genuai Bidi mena bidibawe?
Polobadu agai te polalubo bidi aga
we bidi dabe dali odasa asu,
te tamu ąį nogeali Genuai Bidi mena bidibawe?
Polobadu agai homu ogwa wai mobo
te augwali dali bidimainu yai dao.
12 Agai te aga genuai bomo te Mosesba mawai.
Agai te tamu ąį si badu peda somainu elama,
te aga we bidi dabe te ąį nogelama,
u badu pedaiba sabolali,
tama te kolesagade aga genuai nogi sali,
te sesemane elalumainu yai dao. *Sai 14:21
13 Te augwali asobodu aga polasa peyu,
augwali te tamu ąį dologo badu mu
elalubo tǫdu pali.
Te augwali te bulu wa pai pesagede bidibo
bulu uni hos dabe pabo tiwai bomonama asesa pali,
te augwali me tula mubeo.
14 Te Genuai Bidigo Mobogo digi
te aga we bidiba nagame yai homu mayu,
te augwali toma nomainu ilali,
te bulmakau dabe te nosai hauwa
elaluboba pelama,
nai tuyu, toma nomainu ebo tiwai yalio,”
augwaligo te tiwai po wai.
Genuai Bidi, nago te bomai sę dabe yali,
tama te kolesagade nago te naga
we bidi dabe pabo sunumi dodolali,
te tigidali we bidigo nago genuai nogi
me bomo konemainu yai dao.
Te Israel dabego te Genuai Bidigo augwali tau sao olama, gedu haluasa po wali
15 Genuai Bidi, nage te naga bulu
pesage dagalude bidibao,
te tedali gasagi yai mu dao,
te bulu pesagede te nago genuai ula
me bomo pągąnalubao.
Tiali goli, te nago aiyaba tonoyu, te da suao.
Magi baso nage hogodama,
te nago genuai bomo daba waselisąma ebawe?
Nago homu dene eyu, olo tau sabo
wiegi yai kolesaga te dabolo me ola mabeo.
Te nago da godolo homu me isiąyu ebo da, agawe?
16 Tiali, nage te dago aya dao.
Te da bulai wąį monu aya, Abraham me Jekop
augwali te da dali me bidibe,
te augwaligo da konesiąwai.
Tialima, nage Genuai Bidi, nage dago aya mu dao.
Tama nago nogi te tiwai elalubao,
“Te da tudibadu tonalu,
polobadu digi tau sesa asali bidi dao.”
17 Genuai Bidi, magi baso nago da
te besela palama, bilalumainu eyu,
te dago nago doloba pai sunumi wali
pisąmainogo ebawe?
Magi baso nago dago haliga me homu kolesaga dąų
weyu,
te dago nageba wi isąma,
te nago dologode bidisąmainu ebawe?
Nago naga sę bidi dabe da homugo koneama,
te nage ma aselama, da dali bidagasao,
te naga digi nago sa muai hani dabe dao.
18 Te pęwądage sogo naga nago digi te sa muani be
te nago we bidi dago nogode elaluali,
te nosali dena boi bidi dabe asu, dolama,
te nago be mesegelama, agala dolali.
19 Tama megi da, da we bidi hobedagia
mu bidibo tiwai ebao,
polobadu nago tonalu, tolalusąwai tiwai bidibao.
Tama da hani dabe te nago nogi augwalide musiąwai
bage tiwai bidibao.