1 Mosesgo po geninama weyu, te po wali, “Tialima Genuai Bidigo enabolo te po wali, ‘Nagebolo eno hasia mani te masigi pedai tiwai si togwao. Tama ni name dabe dulama, tama halobage me deli geselao. Tama nago te masigi si enabolo ugwa bulu duba sesao. 2 Tama eno te masigi side ma asęaibao, te eno polobadu nago togwa sąyani te masigide asęani po ma te masigi side ma asęaibao. Eno asęna silibo si da, teda nago si tama te halobageba muagameo,’ wali.”

3 “Tialima, eno te halobage te ni akasgo geseliyu, me eno te masigi si togoyu te hasia masigi tiwai tama. Tama eno te masigi si tama bulu duba ugwaba sela pali. 4 Tama Genuai Bidigo te hasia asęani te po tiwai tama te masigi side ma asęani. Agai te nogo si bomai po asęani, te agai dagebolo dage bulu du pageba sisinama bidiyu, aga te isi tomode te bulu dude bidiyu yali sogo dagebolo te mani nogo si bomai po. Agai asęna silama, agai te masigi dage si enabolo mani. 5 Tama ena begelama, tama ena bulu dudu aiyaba asali. Tialima, eno te masigi si te Genuai Bidigo enabolo obaso te nigali te halobageba muani, te Genuai Bidigo enabolo wali gilama tiali. Tama te masigi si halobagede me munalubao,” wali.

6 (Nosali Israel dabe augwali te Jakan we bidi dabego ulu wę dabe tagalama, augwali bulu Moseraba pali. Tama Aron te bulude isibaso, augwaligo aga tede pubulali. Tama aga ogwa Eleasargo aga hasegelama, tama pris sę sali. *Nam 20:28; 33:38 7 Augwali tede hogodama, augwali te bulu Gugodaba pali, tama nosali augwali bulu Jotbataba ma pali, te da te wę hauwa elalubo bulu dao. 8 Polobadu augwali Sainai bulu dude bidibadi, Godigo te Livai hanigo te Dąų Wali Bomai Po Halobage tolomainogo sa muai dao. Te bidi dabe augwaligo te pris sę tuyu, me te we bidibolo augwaligo God augwali dali wiegi yai sę yaibao po weyu yai dao. Tama augwaligo te sę ela asidubadi, megiba tama usu nubao. *Nam 3:5-8 9 Tama tialima, te Livaigo hanigo te meba Israel we bidi dabego yali gilama tǫ me sai menio. Wiegi yai nai augwaligo sali da te e dao, te augwali Genuai Bidigo pris bidi nigali. Te God dago Genuai Bidigo dąų polo wali po wali gilama tiali.)

10 Mosesgo te po wali, “Ena te bulu dude te bidi sese si 40 dei te giligade me hulide bidali, te eno hasia yali gilama tama tiali. Tama Genuai Bidigo eno gedu haluasa po wali ma odama, tama agai ao olama, tama agai dage dolobeo. *Sai 34:28 11 Nosali agai enabolo te po wali, ‘Nage te we bidi pageba pelama, tama nago augwali eno dagebolo mawaiba wali te tǫba sela pao, te augwaligo wąį dabebolo dage mawaibao wali te tǫ,’ wali.” Mosesgo te po wali.

12 Te Mosesgo po geninama weyu, te po wali, “Megi da, dage Israel dage bugagia odiąo, te God dago Genuai Bidigo te dagego yao wabo po odao. Dage tigidali sogo God dologode naga bidiąo, tama agai po tigidali wali piąo. Dagego aga godolo mu yao, tama dagego wiegi yai homu pemene dagego homude, me duga homu kolesagade eyu, tama agai sę iyąo. Te tebo yalawainu igimio, te dagego homugo sese tama te tobage kolesaga iyąo. 13 Tama megi dagego agai bomai po tigidali wali piąo, megi eno dagebolo mobao, te po. Dagego bugagia wali peyu da, teda dage bugagia mu bidaibao. 14 Dagalu ugwanu mu elalubao, te da te Godigo dao. Tama te tǫ, me te tǫde elalubo nai dabe sese tama, te Godigo naga dao. 15 Tiali goli, Genuai Bidigo dagego wąį dabe godolo mu yali, tama tiyu agai gasa hani me sa me mubeo. Menio. Agai dage naga aga we bidi naga bidimainogo sa muai dao. Tama megi me, dage agai we bidi te bidibao. 16 Tialima, dagego te tobolu gagea pabo kolesaga tagaliąo, tama agaba homu kęą peyu, Genuai Bidigo po bugagia wali piąo. 17 Magi baso meni, God dago Genuai Bidigo te tigidali te tibo god dabe me te tigidali bomo elalubo te tigidali nai dabego bomo edelai mu elalubo. Aga te genuai bomai mu dao, tama tiyu tigidali nai dabe aga dologode naga elaluao. Agai te po tų ebode te abagi si ebo kolesaga wali peyu, me te we bidigo agaba magi nai mayu, aga homu bea sabo homu ebo kolesaga emainogo sula tagalobo menio, te haniani sę ebo kolesagade. *Tpi 10:34; Rom 2:11; Gal 2:6; Ef 6:9; 1 Ti 6:15; Ped 17:14; 19:16 18 Agai te bidi isai wilawe we dabe dali wiegi yai doloba pai kolesaga ebo dao, me te wai bǫų dabe augwa aya isai wai dabe me, augwali agai bugagia tonalubo dao. Agai gasa buludu asai we bidi da dali bidibo, te bage augwali nai dabe mayu, me augwali ugwa dabe mayu ebo dao. 19 Tama tialima, dagego me gasa we bidi digibulu we bidi dage tomode bidibo we bidi godolo iyąo. Magi baso meni, dage me te Isip bulude te gasa badu bulu we bidi tiwai bidai dao. 20 Dage tigidali sogo God dago Genuai Bidi dologode bidiąo, tama aga delide naga lotu weyu yao. Dagego agaba dąų ola selama, tama dagego tigidali po aga delide naga dąų waliyu yao. 21 Dagego agai nogi ugwaba siyu yao. Aga te dago God dao, tama agai dage tau sainogo te bidi wi ilabo bomai sę eyu, me gasa noma sabo bomo yai kolesaga me yali, te dage tau somainogo. Tama dagego duga gedugo digi te agai yali sę suai dao. 22 Dagego wąį dabe Isip buluba pali da, teda augwali 70 we bidi tama naga pai dao. Tiali goli, megi da, God dago Genuai Bidigo dage hauwa mu, te dagalude elalubo hǫ tiwai pedalomainogo ilali dao,” Mosesgo te po wai. *Gag 15:5; 22:17; 46:27