1 Eno te tobage pemene homu yabo kolesaga usu sabo homu yali. Tama ena godolo homu simina ela silaibao homu yali. Tiali goli, te tama kolesaga me page meni yai dao. 2 Eno gegelama, te tiwai koneani, te gisugu wabo kolesaga te dobo kolesaga da homu yali. Te homu pemene ebo kolesagago te da dwasianu tau sabo usu meni yaibao. 3 Eno te wiegi yai homu kolesaga page gegelama, suainu ebo sę yali, eno te wain ąį tubo kolesaga usu siyu, te tobage pemene homu ebo kolesaga dabe yali. Eno te gegelama koneainu yali, te mena sę mu te we bidi augwali te dwasianu pęwadage sogo e tǫde wiegi yai bidabo te koneainogo yai dao.

4 Eno te genuai sę hauwa yali. Eno ena be te genuai genuai be dabe sęnama, tama eno te wain gi dabe bulali. 5 Eno te gide bulali nai dabe me, tama te gide te tobage du walobo wiegi yai ni du dabe elaluai dao. 6 Eno te dwasianu sigi ąį ge dabe nigilama, te ni du gi dabeba ąį sagaduabo nidigili palio. 7 Eno sę olo yabo sę bidi, me sę olo yabo we me hauwa abelali. Tama te olo sę ebo bidigo wai dabe, me te olo sę ebo wego wai dabe te eno sę olo yabo we bidi pedelali. Te eno bulmakau me sipsip hani hauwa mu elaluali. Te Jerusalemde polobadu bidali bidi dabego te bulmakau me sipsip eno elalubo nai tiwai me elalubeo. *1 Kin 4:23 8 Eno te silva me gol hauwa elaluali, me te eno tonalubo tǫ kantri pedai king dabego me augwa wiegi yai dila pai nai dabe enaba mayu yali. Eno te we bidi meba sisinama, te augwaligo enaba wiegi yai homu pemene ilabo tęąbi po omainu yali. Te eno te me badu hani we hauwa selama, te ena homu pemene mu ilibo sę yai dao. *1 Kin 10:10, 14-22, 23-27; 2 Sto 9:22-27

9 Eno te tama nai dabe doado bage saligo te ena genuai bidi mu pedelali. Te Jerusalemde polobadu bidali bidi dabego nai te eno megi elalubo nai tiwai me elalubeo. Tama te sogo ena te homu kolesaga mu konea pai bidi me bidai dao. *1 Sto 29:25 10 Te eno homugo godolo yali naide homu dwasianu me geą sabeo. Mu menio. Te eno homude nai me deli godolo ebo sogo da, teda te nai eno siyu naga yali. Te eno ena ebo sę tigidalide wiegi yai homu pemene mu eyu, te pemene yali te sęgo mone sabo tiwai yali dao. 11 Tialima, nosali ena te sę dene elama sali nai dabeba homu kone palama, eno te tiwai koneanio, te tigidali nai te olo nai tiwai da, te homu eyu, te nai dabego ena dwasianu tau sogobe da homu yalio. Te bidi udulama, te soabo wali nogogo tola sainu ebo olo sę tiwai ebo dao. 12 Eno te sę dabe ela silama da, teda te gasa bidigo ena hasegelama, te king pedalubo sogo da, teda agai mena tobage gasa sę yaibawe? Mu menio.

Tama te nosali pedalubo sę page dago kuna konesiąbaso, eno te wiegi yai homu kolesaga ebo page me, te wabo pabo bidigo ebo kolesaga page me homu kone palobo sę eyu yai dao. 13 Eno homu kone palama, te tiwai tama koneani, te wiegi yai homu kolesaga te dwai wabo pabo bidigo ebo kolesaga aiyaba mu elaluama, te be posobo ula ebogo te be hulia sabo aiyaba elalubo tiwai ebo dao. 14 Te homu kolesaga mu konea pai bidi dabego te augwa wali pabo sunumi bugagia sueibao, tiali goli te wabo pabo homu kolesaga tiwai ebo bidi dabe te hulide bilibo tiwai yaibao. Te mu da wali, tiali goli eno gasa nai me koneanio. E tiwai da. Te homu kolesaga konea pai bidi silagasobo gilama tiwai, te wabo pabo homu kolesaga ebo bidi me te tiwai gilama silagasu ebo dao. 15 Eno te tiwai homu ebao, te wabo pabo homu kolesaga tiwai elalubo bidi dabeba pedelainu ebo nai tiwai, te enaba me pedelaibao homu yali. Tialima, eno te koneani homu kolesagago te ena magi elama tau sogowe? Te eno homu kone ma palobo te tiwai ebao, te koneani homu kolesaga elalubo bidi me te olo nai tiwai da te homu ebo dao. 16 Magi baso meni. Te nosali sogo, te we bidi augwaligo da homu kone ebo mu gegeda palaibao. Te da wabo pabo homu kolesaga elalubo bidi, ma te homu kolesaga mu konea pali bidi me tagalao, te augwaligo homu kone palobo sę munu ma egobeo Te isibo sogo, te homu kolesaga konea pali bidigo te wabo pabo homu kolesaga tiwai bidi aiyaba me elalugobeo. Menio. Da tigidali isaibao. 17 Tialima, te ena bidabo ula te eno hagela ilibao, magi baso meni, te tǫde pedalubo nai tigidaligo ena genuai sęgę mobao. Te nai dabego page me elalubo menio. Te bidi uduyu, te asobo wali nogogo tola sainu ebo tiwai ebo dao.

18 Eno koneanio, eno te sę dene elama pedelali nai dabe taga paibao, te ena bidali sę hasegelama sabo bidigo saibao. Tibaso, eno te nai dabede hagela homu ebo dao. 19 Tama ena te bidali pesage hasegelibo bidi da, eno konebeo, aga te homu kolesaga mu ula tega pai bidi mu, ma te wabo pabo homu kolesaga elalubo bidi tiwai yaliwe? Konebeo. Tialima, agai eno te wiegi yai konea pali homu kolesagade sę dene elama pedelali nai tigidali tonalueibao. Te tama kolesaga me aga page meni yai elalubao. 20 Tialima, eno ena te sę dene yali dabede homu kone palu, te ena dwai haliga mu yai dao. 21 Eno te tiwai homu ebao, te bidi mebago te sę bugagia yabo skul olama, te wiegi yai homu kolesaga koneani elalu, te augwa sę dene elama, te nai hauwa sali. Tama nosali augwali isibaso, te gasa bidi dabego te nai dabe olo saibao. Te kolesaga dwai mu ebao, tama te page meni yai mu elalubao. 22 Da e tǫde bidiyu, sesemane sogo dago sę dene eyu, te nai dabede homu hauwa dogia paibao, tiali goli tego magi nai mu dabolo wei ponaibawe? 23 Da e tǫde bidibo sogo, tigidali naigo da homu kone tųą palama, mone homu sęgę hauwa ilaibao. Te hulide dago homu kone palubo sę hauwa dogia pidubadi, te dago toma me tusiąwaibao. Te tebo kolesaga me page meni yai elalubao. *Jop 5:7; 14:1

24 Dago nai me ąį me tuyu, te dago yali sęde wiegi yai homu pemene eyu bidibaso da, teda usu dao. Po meni. Te sę da bidigo naga me ebeo. Menio. God agade digi te page elalubao. *KB 3:13; 5:18; 9:7; Ais 56:12; Luk 12:19; 1 Ko 15:32 25 Magi baso meni. Te Godigo dabolo te nai tuyu, pemene homu yao wagi menigi sogo da, mena tama dago te tama kolesaga igi dawe? 26 Te we bidi mebago te Godigo homu wali pobaso, tama agai augwali dali dwagi yai homu ebo dao. Agai augwaliba te wiegi yai homu kolesaga menama, te augwali pemene ilibo dao. Tiali goli, te tobage kolesaga isąwai bage, te dwai sę ebo bage yaibaso da, teda agai augwaliba te sę dene menama, te sali nai hauwa te sisinama, te Godigo dwagi yai homu ilibo we bidi augwaliba momainu ebo dao. Te sę dene eyu, doado bage hauwa sabo kolesaga me te page meni yai elalubao, te bidi udayu, te wali nogogo tola sainu ebo tiwai ebo dao. *Jop 32:8; Prs 2:6