1 Tama nosali Genuai Bidigo Moses dali te po wai, “Nage tuni bidi pageba pelama, aga dali eno te po wao. ‘Genuai Bidi Yawe agai te po wai, “Eno we bidi augwali enaba lotu po wagasiyu asomainogo, augwali sula tagalao. 2 Nago augwali tagala palisiąbaso da, teda eno te gedeli dabe augwali tagala palama, augwali te dagego be tomoba aselama, tama nago tǫde bidibo we bidi augwali dolaibao. 3 Tama te wę Nail te gedeligo mu pągąna selama, tama augwali te wę tagalama, tama tuni bidi nago genuai be tomoba aselama, tama nago pibo be tų bet saiba asaibao. Tama te gedeli dabe te nago sę ebo bidi dabego be tomoba, me te nago we bidigo beba asaibao. Tama te nai ulubo nai stov tomoba, me te bret nigibo pou tomoba bidagasaibao. 4 Tama te gedeli dabe augwali posoga palama, nago tigi daiba duayagasu, te nago sę ebo bidi dabeba, me te nago we bidi augwali tigiba duayagasaibao,” Genuai Bidi Yawego te po wai.’ Te po wao,” Genuai Bidigo te po wai. Mosesgo te po tuni bidiba wagasai, tama te tuni bidigo agai po odobeo.

5 Tama tibaso, Genuai Bidigo Moses dali te po wai, “Aronbolo po olama, te aga nogo dodolama, tama agai dono ugwaba selama, nogogo tuao, tama te wę dabe, me ąį gamia dabe, me te sigi ąį ge, tede te gedeli dabe pedelama, tama te Isip bidi dabego tǫ pągąna somainao,” wali.

6 Tama Arongo nogo dodolama, tama dono ugwaba selama, tama te wę dabe dąį ilai. Tama te gedeli dabe pedelama, tama Isip bagego tǫ tigidali pągąna sai. 7 Tiali goli, tuni bidigo po page osola subo bidi dabe augwaligo pobigo me te gedeli ąįde bidali tagalama, hauwa te tǫba pai.

8 Tama tuni bidigo Moses de Aron si i olama, asobode augwali sibolo te po wai, “Dage sigo Genuai Bidibolo gedu haluasa po olama, agai te gedeli dabe da tigide bidibo sela sąmainao, tama eno nago we bidi pomainogo tagala paliyu, tama augwa Genuai Bidibolo ofa magi pomainogo yaibao,” wali.

9 Tama Mosesgo te tuni bidibolo po wei ponoyu, te po wali, “Te usu dao, eno gedu haluasa po nage tau siyu waibao. Naga digi te sogo bodolu mobaso, te eno gedu haluasa po nage tau siyu, te nago sę bidi dabe, me te nago we bidi dabe, augwali tau somainogo yaibao. Tama dagego bede bidibo gedeli dabe silama, tama te gedeli dabe augwali te wę Nailde naga bidaibao,” wali.

10 Tama tuni bidigo te po wai, “Gedu haluasa po do wagameo.” Tama Mosesgo te po wali, “Te eno nago po wabo gilama tama tiaibao, tama nago koneyu, te God tiwai Genuai Bidi Yawe me deli meni yai, te aga dago God dao. 11 Tama te gedeli dabego nage tagaliyu, te nago sę bidi dabe, me te nago we bidi dabe, augwali tagalama, tama augwali te wę Nailde naga bidaibao,” wali. 12 Tama Moses de Aron sigo te tuni bidi tagalama, pai. Tama Mosesgo gedu haluasa po Genuai Bidibolo bomonama weyu, agai te tuni bidibolo tagala palali gedeli sela sąmainogo yai. 13 Tama Genuai Bidigo Mosesgo hanalu wali pode tama tiwai, tama te bede bidali gedeli dabe, me obo tomode bidali, me te gide bidali, te tigidali gedeli isai. 14 Tama te Isip bidi dabe augwaligo te gedeli dabe deliba sisinama, pesage holai, tama te gedeli dabe damuyu, kugumini dwai mu pedelai. 15 Tama tuni bidi te gedeli dabe isali sulama, tama agai koneani, te dwai sogo silali. Tama tibaso, agai kolesaga ma doyu, gagea pai, te Genuai Bidigo agade po wali tiwai gilama tiwai, tama agai Moses de Aron sigo po odobeo.

16 Nosali Genuai Bidigo po Mosesbolo ma weyu, te po wai, “Aronbolo te po olama, agai dono tǫba elama, tama tigidali Isip tǫ hogomugo te dina dabe pedelaibao,” wali. 17 Tama augwali sigo tama tiwai. Arongo dono selama, tǫba elai, tama tigidali Isip tǫ hogomugo dina pedelama, tama te dina dabego te we bidi dabe, me te hasa dabe, augwali halua selama, tama augwali gąųgo kela tuai. 18 Tama te pobi page koneai Isip bidi dabe augwaligo te dina pedalomainogo pobi po wali, tiali goli augwaligo usu ebeo. Tama te dina dabego te hasa dabe augwali halua sai. 19 Tama te pobi po koneai bidi dabe augwaligo tuni bidi dali te po wai, “God aga digi te sę ebao.” Tiali goli, tuni bidigo kolesaga dolama gagea pai, te Genuai Bidigo po tama tiaibao wai, tama agai Moses de Aron sigo po wabo odobeo. *Luk 11:20

20 Genuai Bidigo Moses dali te po wai, “Tama kigamu mu tuni bidi węba asaibao,” wai, “tama aga asobadi nago aga sulama, tama eno po agabolo wao, ‘Genuai Bidi Yawego te po wai, “Eno we bidi lotu po enabolo omainogo pomainao. 21 Nago augwali tagala palisiąyu da, teda eno te bolia hauwa nageba tagala paliyu, te nago sę bidi dabebolo, me te nago we bidiba me, te bolia tagala palaibao. Tama dagego be me, te dage bidibo tǫ me, te boliago pągąna saibao. 22 Tiali goli, te bolia dabe pedalobo sogo te Gosen tǫ eno tonaluyu, te eno we bidi bidibo bulu, tama te bolia dabe augwali bidibo badu me pedelama bidigobeo. Te eno tama tebo sogo nago konemainogo te ena digi ena Genuai Bidi Yawe, eno te sę nago tǫde ebao. 23 Eno te deli tigi tiwai sę eno we bidi dali ebo tiwai te nago we bidi dali tegobeo. Odao, te gasagi yai bomai sę te do pedelaibao,” Genuai Bidi Yawego te po wai,’ tuni bidi dali te po wao,” Genuai Bidigo te po wai.

24 Tuni bidigo homu kolesaga hasegelebe, tama Genuai Bidi agai tama tiai, te agai po obadi, tama te genuai bolia hani hauwa te tuni bidigo genuai be tomoba asali, tama aga sę bidi dabego beba me asiyu, te Isip we bidi tigidaligo beba pai. Tama te boliago te Isip hani tigidali dolai.

25 Tama tuni bidigo Moses de Aron si asa olama i wai, tama agai te po wai, “Dage pelama, duga Godibolo te Isip tǫ tomode naga ofa mao.”

26 Tialima, Mosesgo te po wali, “Dago tama tiyu da, te dolo meni, magi basowe, Isip bage augwaligo te dago Genuai Bidi Godibolo ofa ebo hasa dabe sulama, tama augwaligo da dali dwai homu yaibao. Dago te hasa dabe elama ofa eyu da, te Isip bage augwaligo ofa isąwai nai, tama Isip bage augwaligo te tebo suyu, tama augwali sębę eyu, masigi sąnama, da ela muaibao. 27 Da pelama, sela sogo te bidi meni yai tǫba dago Godibolo ofa igibu paibao, dago Genuai Bidi Yawe, agai te sę dabolo yao te po wai.”

28 Tama tuni bidigo te po wai, “Te usu da, eno dage te duga Godibolo ofa magi pomainogo tagala paliyu, te duga Genuai Bidi Yawebolo te bidi meni yai tǫba ofa igi pomainogo, tiali goli dage digibulu gana pelamo dao. Tama dagego ena me tau somainogo gedu haluasa po wao,” wali.

29 Tama Mosesgo po wei ponoyu, te po wai, “Te eno nage taga pabo sogo te eno Genuai Bidibolo gedu haluasa po weyu, te do agai nago bede te bolia dabe sela sąyu, te nago sę bidigo bede me, te nago we bidi augwaligo bede me tiaibao. Tialima, nago tibo po da ma ola mayu, tama te we bidi augwali te augwa Genuai Bidibolo ofa magi pidali weyu, te tų nago ma paligio.”

30 Tama Mosesgo te tuni bidi taga peyu, Genuai Bidibolo gedu haluasa po wagi pai. 31 Tama Genuai Bidigo Mosesgo aga dali hanalu wali te sę yai. Tama tigidali bolia dabego te tuni bidi dali, te aga sę bidi me, te aga we bidi, augwali tagalama, tama te bolia me deli tede me bidibeo. 32 Te bolia dabe pela silai, tiali goli te tuni bidi aga homu ma hasegelisiąyu, tama agai te Israel we bidi augwali tagala palobeo.