1 Nosali Genuai Bidigo Mosesbolo te po wai, “Nage pelama, te tuni bidibolo te po agabolo wagi pao, ‘Da Hibru bagego God, Genuai Bidi Yawe, agai te po wai, “Eno we bidi augwaligo enaba lotu po omainogo augwali tagala palao. 2-3 Nago augwali dąų weyu, tama augwali tagala palisiąbaso da, te eno nage dali, te naga hani dabe dali dene mayu, tama eno genuai gasi te nago tigidali kibu dabeba tagala paliyu, te hos dabe me, te bidi duabo donki dabe me, te kamel, me bulmakau, me sipsip, me meme, te tama bulu badu bidibo nai dabeba eno gasi tagala palaibao. 4 Tialima, Genuai Bidi Yawe ena digi bugagia eno te Israel hanigo kibu dabe tonaluyu, tama augwaligo kibu dabe me deli isigobeo.” Genuai Bidi Yawego te po wai.’ Nago te po te tuni bidibolo wagi pao,” Genuai Bidigo te po Mosesbolo mawai.

5 Tama Genuai Bidigo te sę yabo sogo bodolu mayu, tama te po wali, “Do eno te sę yaibao.” 6 Tama tuni bidigo homu kolesaga hasegelebe, tama Genuai Bidi agai te po wali sę yali, tama Isip bagego bulu badu bidali kibu dabe tigidali isai. Tiali goli, Israel hanigo kibu dabe tigidali te bugagia bidali, tama me deli isibeo. 7 Tama tuni bidigo aga hani dali hanalu wali, “Te Israel bagego kibu dabe te bugagia bidibowe?” Tama te bidi mebago agabolo te po wai, “Awe. Tigidali bugagia bidibao. Me deli munu me isibeo.” Tiali goli, te tuni bidi homu kolesaga dwai me elaluyu, tama te we bidi augwali me tagala palobeo.

8 Tama Genuai Bidigo Moses de Aron si dali te po wali, “Dage si te brik ulubo be me deliba pelama, tama te sia keli meba selama, tama tuni bidi bidibo digi pao. Dage si te tuni bidi bidiboba sabolama, tama Moses nago te keli ugwaba sąyao. 9 Tama te keli hogomu pedelama, tama Isip tǫ tigidali usu naibao. Tama te keli hogomu bidi tigiba me, te kibu dabe tigiba me tulalubode, te dili keni tiwai pedelama, tama genuai keni pedelaibao,” wali. 10 Tama augwaligo te keli selama, pelama, te tuni bidi geduba doligi pali, tama Mosesgo te keli ugwaba sąwai. Tama te keligo te dili keni tiwai pedelali, tama te dili keni dabe ulu elama, tama keni te we bidi tigide, me te kibu dabe tigide pedelai. *Ped 16:2 11 Tama te pobi page koneai bidi dabe augwaligo te Moses ebo bomo yai sę teba pedelainogo ebo te usu ebe, magi basowe, augwali tigide te dili keni pągąna sali, te Isip we bidi tigide keni yali tiwai, augwali tigide me te keni pedelai. 12 Tialima, Genuai Bidigo te tuni bidigo homu kolesaga dąų walama, tama te tuni bidigo Moses de Aron sigo po wabo odobeo, te Genuai Bidigo tama po wali gilama tama tiwai.

13 Tama nosali ma, Genuai Bidigo Moses dali te po wali, “Kigamu digi mu nage pelama, tuni bidi agabolo te po weyu, ‘Da Hibru bagego God, Genuai Bidi Yawe, agai te po wali, “Te eno we bidi hani augwali enaba lotu po wagasomainogo tagala palao. 14 Tama nago te we bidi tagala palisiąbaso da, megi eno nagebolo dali, te nago sę ebo tobolu bidi dabe me, te nago we bidi dali, dageba te dene ilibo sę dabe mu mawaibao. Tama dagego te tigidali tǫ habu badu te bidi me deli, me te tibo god te ena tiwai me bidibo meni, te megi dagego mu bugagia konea saibao. Ena te God mu dao. 15 Te eno nage dali, naga we bidi dali, dage te eno genuai gasigo dage dolainogo homu igi sogo da, teda dage tigidali mu ela siligi da. 16 Tiali goli, eno nage hodolama, te tuni bidi nigiliyu, te eno genuai bomo dagebolo ola mayu, tama te we bidigo eno genuai nogi te tigidali tǫba te po pusugi pomainogo tebao. *Rom 9:17 17 Tiali goli, nago eno we bidi dali te boi bidi homu eyu, tama nago augwali tagala palobeo. 18 Tama tibaso, odao. Do e tobage tiwai sogo, te eno moni genuai tulubage, te talua ge tiwai tulubage e tǫba dulumainogo yaibao. Te tiwai tobage talua ge tulubage te Isip tǫba gesi sogo pedalisiąbadi, tama megi sogoba usu nagasai. 19 Tama te bidi dabe augwalibolo po olama, te kibu bulmakau dabe, me te nago nai gasa badu bidalua pabo nai dabe tigidali selama, te gasa be meba tomoba selasa pao. Meni baso, te eno genuai talua ge tulubage te bidi dabe tigiba, me te bulu badu bidibo kibu dabe tigiba tulama, tama augwali isaibao.” God Genuai Bidigo te po wai,’ dage sigo te po wao,” wali.

20 Tama te tuni bidigo sę bidi meba augwali te Genuai Bidigo wali pode wi elama, tama augwaligo augwa sę ebo bidi dabe, me te augwa kibu dabe, te augwa be tomoba selama muai. 21 Tiali goli, bidi meba augwaligo te Genuai Bidigo wali pode wi isąma, tama augwaligo augwa sę bidi, me te kibu dabe dali, augwali bulu badu olo bidai.

22 Tama Genuai Bidigo Mosesbolo te po wali, “Nago nogo ugwaba selama, tama nago te dagalu usu siyu, tama te talua ge tulubage te Isip tǫ tigidali habu badu tuluyu, te we bidi dali te gide elalubo tigidali naiba tulubage tulaibao.” 23 Tama Mosesgo dono ugwaba sali, tama Genuai Bidigo dagalu kulukulu omainogo yali, tama dagalude te be sele ebo ula te tǫba dulali, tama te talua ge tulubage tǫba tagala palai. Genuai Bidigo te talua ge tulubage te tigidali Isip tǫba tulumainogo yai. 24 Tama te talua ge tulubage me mu tutulu pidubadi geai, tama dagalude te be sele ebo ula te sia dabo tiwai eyu, tama te tigidali habuba pidubadi geai. Tama polobadu te Isip bage augwaligo te tiwai talua ge tulubage me subeo. Mu menio. *Ped 8:7; 16:21 25 Tama te tulubagego te bidi dabe, me te kibu dabe, me te Isip tǫde bulu badu elaluali nai dabe tigidali dolai. Tama te talua ge tulubagego te gide elaluali nai, me te ni du dabe tigidali pedelama, tigidali mu dolai. 26 Tiali goli, te Gosen tǫ badu, te Israel bage bidibo digi, te bulu delide digi naga te tobage tulubage menio.

27 Tama tuni bidigo po ola toloyu, te Moses de Aron si asao, te po wai. Tama augwali si aselama, tama tuni bidigo augwali dali te po wali, “Megi eno dwai sęgę salio. Genuai Bidi Yawego doloba pai kolesaga yai, tiali goli ena dali, te eno we bidi dabe dali, dago dwai kolesaga yalio. 28 Te talua ge tulubage tulali dali, te dagalu kulukulu wali, te sigo da dolai dao. Tama nago gedu haluasa po Genuai Bidibolo olama, tama agai te nai silibo side, te eno dage pomainogo tagala palaibao. Tama dage e tǫde ma bidimainogo menio,” wali.

29 Tama Mosesgo te tuni bidi agabolo te po wali, “Te ena te hanu buluba pabo sogo, te eno nogo ugwaba selama, te Genuai Bidibolo gedu haluasa po waibao. Tama te be kulukulu ma wasiąma, tama te talua ge tulubage silaibao. Tama te sogo nago koneyu, te tǫ te Genuai Bidigo tǫ naga da waibao. 30 Tiali goli, eno koneani, nage dali, te nago sę bidi dabego te Yawe God dali wi isiąyu, te aga Genuai Bidi da te homu menio,” wali.

31 Te dwasianu ni dabe augwaligo tigi waligo te ugwa hobolobo hobi nigibo nai, me te rais bali dabe mu dolali, magi basowe te rais bali sabo tau sisi yai, tama te dwasianu ni dabe honu megi tama pedalobadi dao. 32 Te tubo nai wit te digi dolobe, magi basowe, te honu dwasianu pedelai elaluai.

33 Tama Mosesgo te tuni bidi taga peyu, aga te hanu sesege bulu badu pai. Tama agai nogo ugwaba selama, tama Genuai Bidibolo gedu haluasa po wai. Tama te dagalu kulukulu ma wasiąma, tama te talua ge tulubage me, te olo tulubage me, te tigidali sia sai. 34 Tama tuni bidigo suali, te dagalu be kulu wasiąyu, tama te talua ge tulubage me, te olo tulubage me, te me te silali, tama te tuni bidi aga dali, te gavman sę ebo bidi dali, augwaligo kolesaga hasegelisiąma, tama augwa homu dąų olama, tama augwaligo dwai sę God dali ma yai. 35 Mu tama, te tuni bidigo homu dąų olama, tama agai te Israel hani tagala palobe, te Genuai Bidigo te Mosesgo pedauwalide polobadu po weyu, tama tiaibao wai.