1 Da te Babilonde bidibadi te kibu be 7 wabode, tama te kibu bede, te polua a naga, te dei nogo si wabode, te Israel tobolu bidi dabe augwali ena Esekiel pageba duayagasali. Augwaligo homude po me deli elalubaso, te augwaligo enaba hanaluama, te Genuai Bidigo homu mena tama elalubo page koneainu yai dao. 2 Tialima, Genuai Bidigo enabolo te tama po walio, 3 “Tǫde bidio, nago eno e po te Israel tobolu bidi dabe augwaliba mao. ‘Ena God, Genuai Bidi, eno dage tobolu bidiba te tama po obao. Dagego eno homu mena tama elalubo koneainu asali po oba, agawe? Ena te Sesemane Bidibo God da, eno po dolo dagebolo obao, dage odolali naga asalio. Eno dagego hanalubo po deli wei me ponogobeo. Ena God Genuai Bidi, eno te po wai dao.’ Te po augwalibolo mao,” wali.

4 “Tǫde bidio, nago augwali po tų ilaibawe? Awe, eno homugo nago te bidi dabe po tų ilao. Te augwa wąį nǫų dabego dwai kugumini yai kolesaga yali ma homu kone palao, nago te po augwaliba walao. 5 Augwaliba tama po wao, ‘Ena God Genuai Bidi, dage Israel dabe ena hani we bidi dabe pedalumainu dąį ilali sogo, te eno duga wąį nǫų dabe dali dila pai bomai po dąų wali. Augwali te Isipde bidibadi, ena digi ena augwaliba ola menama, te eno tama po wai, “Ena digi ena God, dagego Genuai Bidi dao,” te po wai dao. 6 Tama te sogo eno dila pai bomai po augwali dali dąų olama, te augwali eno Isipde selama, te eno augwaliba maiabo te dąį ilali tǫba odasa asali. Te tǫ te polalubo sawi yai tǫ mu elaluali, te gasa badu tǫ pedai tigidali aiyaba elaluali. Te tǫgo ili hauwa elalu, te nai wiegi yai mu holai dao. *Sai 6:2-8 7 Te eno augwaliba te tama po wali, tigidaliba te tama po wali, tigidali deli deligo te augwaligo godolo mu ebo te Isipgo tibo god dabe sela sąyao wai. Eno te po augwaliba waliyu, augwaligo te dwai nai dabeba lotu weyu, te ena God, augwa Genuai Bidi, eno gedude augwa digi meda ilibao wali. 8 Eno augwaliba te tama po walali, tiali goli te bidi me deli mego te po me odobeo. Menio. Tigidaligo eno po sela sąyu, tama augwaligo te Isip dabego tibo god dabe sela sąbeo. Tama tibaso, te augwali Isipde bidali sogo te eno haliga sębę dwai mu augwaliba eyu, te pąde eno haliga sębę yali usu nama, augwaliba te dwai dene magi dao. 9 Tialima, eno te sę isąwani, magi baso meni, tego eno nogi aiyaba elaluidali weyu yali. Eno te Israel augwaliba te tama bomo yai po dąų walama, te eno augwali eno Isipde selama, odasa asaibao wali. Tama eno te dąų wabo bomai po te gasa hani we bidi gedude dąų wali, te Israel augwali tomode bidali. Eno te dąų wali bomai po wali pisąbaso da, teda ena digi ena nogi te augwaligo gedude aiyaba elalueibao,’ te po wao,” wali.

10 “Tama tibaso, eno te Israel dabe te Isipde selama, te tǫ wa pai buluba odasa asai dao. 11 Te eno po augwaliba mayu, te eno bomai po augwali ola mawai. Te bugagia bidabo homu ebo we bidi dabe da, augwaligo te bomai po wali peyu, bugagia bidaibao. 12 Tama eno te Sabat side bodolu muani, te eno po dąų walobo dąį tiwai augwali dali yali. Augwali te side toma neyu, tama augwa te tiwai konemainu yali, ena Genuai Bidigo eno augwali ena wiegi yai we bidi dabe pedalubo sę yalio. *Sai 31:13-17 13 Tiali goli, te masigi tǫ wa pai bulude me, augwaligo eno po sela sąwani. Augwaligo eno po wali pabo hagela homu elama, te augwaligo eno bomo yai po dabe sela sąwani, te bomo yai po dabe augwaligo wali peyu, te augwali bugagia bidimainu yali. Tama te Sabat side bomo yai po mu augwaligo bolalio. Tama tibaso, haliga sębę dwai mu augwaliba elama, te pąde eno augwali te masigi tǫ wa pai bulude dwai dene menama, te augwali tigidali dolainu yai digi dao. *Prs 18:5 14 Tialima, eno te tiwai sę isąwani, magi baso meni, te tama sęgo eno ena nogi te gasa hani dabe gedude aiyaba elalueiba homu yali. Eno te Israel dabe augwali te Isipde selama, odasa asobo augwaligo suali, tialima eno te Israel dabe me dolobeo. 15 Tialima, Israel dabe augwali te masigi tǫ wa pai bulude bidali sogo, te eno po bomo yai augwaliba weyu, eno augwali dąį ilali, te wiegi yai sawi yai tǫba augwali odasa pabo usu mu me egobeo wali. Te polalubo tǫ mu te tǫ ili hauwa mu elalu, te gasa tǫ dabe aiyaba mu elaluai dao,” te po wai. *Nam 14:26-35 16 “Eno te po page e tiwai da, augwaligo eno po wali pabo homu me ebeo. Menio. Augwaligo te augwa tibo god dabeba naga lotu wabo homu yali. Tialima, augwaligo eno bomo yai po bolobo sę eyu, tama te Sabat side bodolu muani bomo yai po me sela sąyu yai dao.”

17 “Tiali goli, eno augwali homu dene me ebaso, te augwali masigi tǫ wa pai bulude bidali sogo te eno augwali mu sia somainogo ebeo. 18 Tialima, eno te augwa hani wai dabeba te tama po walali, ‘Dagego te duga aya dabego yali dwai kolesaga wali peyu, tama dagego te augwaligo tibo god dabeba lotu weyu, te duga digi eno gedude meda pedalubo sę elamu dao. 19 Ena digi ena God, duga Genuai Bidi da, tama eno tigidali po, me eno bomo yai po dali bugagia wali pao,’ te po walio. 20 ‘Dagego te haniani Sabat bodolu side bugagia homu kone palama, te gasagi yai tedali sogo da homu eyu, te eno bodolu side tiwai mu dąį ilao. Te bodolu side te eno dage dali bomai po dąų walobo dąį tiwai yali. Dage te bodolu side toma neyu, tama dagego te tiwai bugagia koneama, ena digi ena God, dagego Genuai Bidi da,’ eno te po wai dao,” wali.

21 “Eno te tiwai po augwaliba wali, tiali goli te we bidi hanigo me ena dali hagoma yali. Te augwaligo eno po wali me pisąma, te augwaligo eno bomo yai po dabe bolali, te bomo yai po dabe te augwaligo wali pigi sogo da, te augwali bugagia bidigi da. Tama augwaligo te Sabat side bomo yai po mu bolali. Tialima, eno haliga sębę dwai mu augwaliba elama, te pąde eno dwai dene menama, te augwali tigidali mu dolabo homu yai dao. 22 Tiali goli, eno tama tebeo, magi baso meni, te tiwai eyu da, te gasa hani we bidi dabego gedude te eno nogi aiyaba elaluidali homu yali. Te hani dabego eno te Israel dabe Isip tǫ kantride selama, odasa asobo suali, tibaso eno te Israel dabe dolainu yali homu hagela yai. 23 Tialima, eno te tiwai po bomonama wali, te eno augwali sela sąnama, te tǫ pedai tigidaliba tedela palaibao walio. *Prs 26:33 24 Eno te po wali, magi baso meni, augwaligo eno po sela sąwani. Tama augwaligo te Sabat side bomo yai po, me gasa bomai po dabe dali bolama, tama augwaligo te augwa wąį nǫų dabego tibo god dabeba lotu wabo homu bomonama mu yali,” wali.

25 “Tama me, eno gasa tobage po me te dwai bomai po meba augwaliba mani, te bomai pogo augwali tau selama, bugagia me bidigobeo wali. 26 Te eno augwa te tibo god dabeba ofa emainu sula tagalu, te augwa eno gedude meda pedalubo sę ilali. Te augwa gomunai ogwa dabe te tibo godiba ofa tiwai yainu te elebo eno sula tagalali. Te augwa tama sę emainu eno sula tagalali, magi baso meni, augwa te tebo kolesagade te augwa dwai noma siyu, hagela mu yabo sę eno digi ilali. Te augwa te tiwai bugagia koneama, ena digi ena Genuai Bidi da omainu yai dao,” wali.

27 Genuai Bidigo po te tiwai ma wali, “Tǫde bidio, eno homugo nago eno po te Israel dabeba momainu yali. Te po e tiwai dao, ‘Ena God Genuai Bidi, eno po dage Israelde elalubao. Te duga wąį nǫų dabego gasa dwai kolesaga me eyu, te augwaligo eno po sela sąnama, te eno nogi aiyaba mu elaluali. Te kolesaga te tiwai dao. 28 Te eno augwali mawaibao olama po dąų wali tǫba te augwali odasa asali sogo, augwaligo te genuai ni dabe te genuai bulu du dabe sulama, te augwaligo te homu eyu, te tibo god dabeba lotu wabo pesage dabe wiegi yai elaluba homu yali. Tama augwaligo te hasa dabe me wain dabe hauwa seselama, augwaligo ofa yali, te tiali kolesagade augwaligo ena haliga sębę dwai mu ilai dao. 29 Tialima, eno te tiwai augwaliba hanalu wali, “Magi baso dage te bulu du ugaba mu pelama, te tibo god dabeba lotu wagulubawe?” Tialima, te Israel dabego te lotu wabo pesage dabe augwaligo te tiwai nogi yali, “Te uganu elalubo pesage mu dao,” augwaligo te po walio,’ eno po te Israel dabeba mao,” wali.

30 “Megi da, dage Israelde eno po elalubao. Dagego te duga wąį nǫų dabego tibo god dabe wali pobao. Magi baso dagego augwaligo te dwai kolesaga wali pabo dawe? 31 Dagego te tibo god dabeba ofa ebo sę me idubao. Dagego me te duga wai dabe elama, augwaliba ofa ebo dao. Te tebo kolesagade dage eno gedude meda yai mu pedelebao. Tialima, dage Israel hale dwasianu me isąma, te eno mena homu elalubo te hania koneainu dage enaba asobo sę idubao. Tiali goli, dage odolali asobao. Ena God Genuai Bidi, ena sesemane sogo bidaibao, eno po dolo mu megi dagebolo obao, eno dagego hanalu wali po deli wei me ponogobeo,” wali.

32 “Dage te gasa tǫ kantri we bidi dabe tiwai mu pedelabo homu godolo eyu, te bagego te ni dabeba me masigi dabeba lotu obao. Tialima, eno dage te tiwai pedalumainu me egobeo. Mu menio. 33 Ena God Genuai Bidi, ena sesemane sogo bidaibao, eno dageba te tiwai po bomonama obao. Eno dagede haliga sębę eyu, ena digi ena dagego king pedelama, te eno dageba dwai dene mayu, te dage eno bomonama umagia tonalueibao. 34 Megi dage te tǫ kantri hauwade te kalabus bidada pobao, tialima eno dage te bulu dabede bidali ma oda selama, te deliba sisinaibao. Te eno haliga sębę ebo bomo dali, te eno dageba dene mabo kolesaga dali dageba pedalubo koneagameo. 35 Dage te sisinabo pesage da, te masigi kemi wa pai bulu da, aga nogi e tiwai elaluali, ‘Te Tigidali We Bidi Hanigo Wa Pai Bulu Pesage dao.’ Tama tede eno dage te duga yali dwai kolesagade po tų ilaibao, 36 te eno duga wąį nǫų dabe te masigi kemi tǫ wa pai bulu du Sainaide bidali sogo, te augwali eno po tų ela mani tiwai yaibao. Ena God Genuai Bidi, eno tama po wai dao,” wali.

37 “Tama te bulude te dagego eno bomo yai dąų wali po wali pomainogo yaibao. Te eno dage deli deligo kolesaga dagalaibao. 38 Tama eno te hagoma ebo bidi dabe me, te dwai sęgę elalubo bidi dabe me sela sąnama, te augwali dage tomode munu ma bidimainu me egobeo. Te eno dage Israel tigidali te kalabus bidali bulude selama, dage te po tų ebo madi odasa asaibao, tiali goli te hagoma eyu dwai sę ebo bidi dabe, augwali Israelgo te tǫba me pogobeo. Eno te tiwai ebaso, te dagego bugagia koneama, ena digi ena Genuai Bidi da waibao,” wali.

39 “Te dage Israel hani da, ena, God Genuai Bidi, eno te tama po te dageba obao, te dagego homu godolo ebo wida, dagego duga te tibo god dabe wali pao. Tegobao, te dagego godolo yali homu simina ela siminao. Tiali goli, dagego te tiwai ebaso da, teda nosali dagego eno po odoyu, mu wali paibao. Dagego te duga tibo god dabeba ofa eyu, eno nogi da aiyaba munu me elalugobe dao,” wali.

40 “Magi baso meni. Te ena God Genuai Bidi, eno tama po obao. Te po tų yali tudi badu, dage eno we bidi te Israel eno tǫba ma pelama, te dage tigidaligo enaba te genuai tedali gasagi yai bulu dude digi lotu obaso, te eno dageba wiegi yai homu pemene yaibao. Te dagego enaba wiegi yai homu eyu, polasa inayai wiegi yai ofa yabo nai dabe selasa aselama, te dagego enabolo maiagameo,” te po wai dao.

41 “Te dage bidali tǫ kantri dabede eno dage selama, tama dage ena te bulu duba odasa asobo sogo da, teda eno bugai haliga pemene dageba eyu, te eno wiegi yai ofa ebo denami ebaso pemene homu ebo tiwai yaibao. Te gasa hani bagego eno te tama sę dageba ebo sulama, te tiwai augwaligo koneyu, eno kolesaga te dolo mu ebao po waibao. 42 Te eno duga wąį nǫų dabeba mawaiba olama, te bomo yai po dąų wali tǫde dage te dugulalubo sogo da, teda dagego te tiwai bugagia koneaibao, ena digi ena Genuai Bidi da po waibao. 43 Tama dagego duga te tobage dwai kugumini yai kolesaga dabe eyu, dage te eno gedude meda pedelali teba homu kone palaibao. Tama duga te yali dwai kolesaga dabede dage hale mu yaibao. 44 Dagego te tiwai bugagia koneaibao, eno dagego te dwai kolesaga yali sę pagede wei ponobo sę dolo me ebeo. Menio. Eno ena wiegi yai nogide homu kone palama, te eno dageba wiegi yai sę mu yali. Tama dagego te tiwai bugagia koneaibao, ena digi ena Genuai Bidi da. Ena God Genuai Bidigo, eno te po wai dao,” wali.

45 Genuai Bidigo enabolo te tiwai po walio, 46 “Tǫde bidio, eno homugo nago te saut pedai badu tonalu, nago te tǫ kantri dali, te buluba me, wado ilao,” po wai. 47 “Nago te buluba po walu, te Genuai Bidi, ena Godigo poba olo bugagia muao po walao. Eno po e tiwai, ‘Odao. Eno isi nogobao, te siago nago ni tigidali daibao, te sasia pai dabe, ma sasisąwai me, tagalao. Te mena nai me deligo te isi sula sawainu ebo usu egobeo. Te isi dabo te saut badu gagalama, te not badu pedaiba usu nigi pelama, te isigo tigidali we bidigo tigi posolo yaibao. 48 Tigidaligo te tiwai ebo koneama, ena Genuai Bidi, eno te isi nogali, te mena bidi me deligo te isi sula sąwainu ebo usu me egobeo,’ te po wao,” te po wai dao. 49 Genuai Bidigo po ola simanobo si da, tialima eno te tama po wei ponani, “Hobede ya, God Genuai Bidio, eno te po augwalibolo pusubo si, magi yaibawe? Tigidali we bidigo eno te tobage begelama pusubo po odobo hagela ebo dao.” Ena Esekiel eno te po wali.