1 Genuai Bidigo te po wai, “Dagego te ni dage selama, tego te piksa noma nigigio, ma genuai masigi selama dualiyu, ma te masigi selama, tego babaga pabo sę elama, te tobage nai dabe dagego tibo god da olama, teba lotu wagio. Menio. Dagego ena deliba naga lotu wao, dagego Genuai Bidi dao. *Sai 20:4; Prs 19:4; Bom 5:8; 16:21-22; 27:1 2 Dagego te Sabat dabe side sę me igio, eno dageba dąį ilai dao. Dage toma naga nao. Te dagego eno be godolo mu iyąo. Ena Genuai Bidigo eno te po wai dao,” wali.

3 “Te dagego eno bomai po dabe wali peyu, te eno dagebolo yao po wabo sę dabe ebaso da, 4 teda eno te tulubage tulubo sogo te tulubage tulumainogo ilaibao. Tama eno dagego tǫde nai wiegi yai mu holomainogo elama, te ni dabego nai hauwa walaibao. 5 Te dagego nai hauwa mu elalu, te dagego wit tau yali sesa pidubadi, te wain du tau yali sabo sogoba usu naibao. Tama dagego te wain du tau yali sidubadi, te wit wai bulubo sogoba usu naibao. Te dage nai tudumainogo genama, te dage haliga mu pągąwaibao. Te dage bugagia mu duga tǫde dugulalu bidaibao,” wai dao. *Bom 11:13-15

6 “Te eno dageba haliga nagame ebo kolesaga menama, te dage bugagia dugulalu, te dage godege pibo sogo magi nai me delide wi me egobeo. Eno dagego tǫde te dwai uni hasa dabe sela sąnama, te boi bidi dabego dage te tǫde bidibadi te boi me hwįgobeo. 7 Te boi bidi augwaliba dagego hwįbaso da, te dagego augwali pobelama, ela mubaso, te hwįbogo augwali mu dolaibao. 8 Te dage nogo a naga bidigo te bidi sese a naga 100 boi bidi aiyaba elalueibao, te dage 100 bidigo te bidi sese umabo hauwa 10,000 boi bidi aiyaba elalueibao, tama tigidali boi bidi dolaibao,” te po wai. 9 “Te eno dage wiegi yai iliyu, dagebolo eno te wai hauwa menama, te dage genuai hani pedalumainogo ilaibao. Te eno polobadu dage dali te dąų wali bomai po kontrak usu naibao. 10 Te nai dabe dagego te gide polobadu kibu bede sali te elalubadi, te nosali kibu beba ma usu naibao. Te elaluali nai bugai te dagego gesi tau yali nai sabo sogo, te nai dagego sąyu, tama te nai muani pesagede dagego gesi nai mueibao. 11 Te ena dage tomode bidiyu, te ena be tomode digi bidaibao, te eno dage tudiba me mugobeo. 12 Te ena dage tomode biliyu, te ena dagego God bidaibao. Te dage eno we bidi dabe bidaibao,” te po wai dao. *2 Ko 6:16 13 “Ena digi ena Genuai Bidi, ena dagego God dao. Polobadu dage te Isipde olo sę ebo bidi bidibaso, eno te kalabus ebo sę togwa sąnama, te dage odasa asai. Eno dage te kalabus yali bidi dabego bogo toga sąwai, te dage kalabus tagalama, te wiegi yai homu pemene eyu asai dao,” wali.

14 Genuai Bidigo po te tiwai ma wali, “Te dagego eno po sela sąyu, tama dagego te bomai po dabe sela sąbaso da, teda eno dagebolo te dene mabo sę yaibao,” te po wai. 15 “Te dagego eno bomai po me eno po dali te tudiba munama, tama eno dage dali te dąų wali bomai kontrak te dagego togwali da, 16 teda eno dagebolo dene maiabo sę e tiwai yaibao. Polo tama eno dage dwai wi mu ilama, te dage te tobage genuai gasi somainogo ilaibao, te tigi posolo mu ilibo gasi, me te dage gedu widaibao, te dagego tigi me dolaibao. Te dagego gi nai da bulaibao, tiali goli dagego te nai ge me sela tugobeo. Mu menio. Te boi bidi dabego naga sela tueibao. 17 Te ena digi eno dageba boi bidi yaibao, tama eno te gasa bidi dabego dageba boi hwįagasomainogo elama, te dage aiyaba elalumainogo ilaibao. Tama te bidi dabego dage dali dwai homu mu eyu, augwaligo dage tonalubo sę yaibao. Te boi bidi dabego dage pobeasa asisąbadi goli tagalao, te duga digi odolali wi elama, te wi paibao,” wali.

18 “Tama eno te kolesaga dabego dageba te dwai dene mabo sę ebaso, te tudi, badu nosali dagego eno po wali me pisąbaso da, teda eno te dwai dene mabo sę dageba mu geninaibao. 19 Te eno dagego hagoma aiyaba mu elalueibao. Te eno tulubage tulubo paliama, te dagego tǫba tulubage me tulugobeo, te tǫ mu wa pelama, te ain tiwai dila pai pedelaibao. 20 Te nai dabe te gide dabe me hologobeo, te ni dabego du me walogobeo. Te dagego sę dene yali odolali yaibao,” te po wai dao.

21 “Te tama sęgę dabe dageba pedalubaso, te dagego hagoma idu, te po me odisąbaso da, teda eno dagego te ebo dwai kolesagade homu kone paludama, te eno dageba dwai dene mabo sę me mu ela pidubadi geaibao. 22 Eno te bulu uni hasa dabe dage tomoba tagala palama, te augwaligo te wai dabe ela muyu, te bulmakau dabe me ela mueibao. Tama tialima, te dagego tǫ kantri sunumide te bidi dabe me bilalugobeo, te dwasianu hani we bidi naga bidaibao,” wali.

23 “Eno te tiwai dwai dene mabo sę dageba ebaso, te nosali dagego eno po me odisąma, te dagego enaba hagoma ebo dwai sę me idubaso da, 24 teda eno digi dagego te ebo sęgęde homu kone palama, te eno dage dwai dene mabo sę genugia mu idubadi, te dage posolo dwai mu yaibao. 25 Dagego eno dąų wali bomai po kontrak togalio, tama dageba te boi bidi dabego hwįabo sę eno ilaibao. Te dage te genuai taun te bomai obo elalubo tomoba sisinigi pelama, te dage bugagia bidiba homu yaibao, tagalao, te eno dwai genuai gasi dabe dageba tagala palama, te dage we bidi hauwa mu isaibao. Te dage dolobo sogo da, teda eno dage te boi bidi dabe augwali nogoba mawaibao,” te po wai. 26 “Te eno dagego nai mu sǫą pomainogo yaibao, tama te we dabego augwa iside ulabo nai hauwa meni yaibao, te sia tigi delide nogo si wego nai ulaibao. Te dage tigidaligo te nai dwasianu dwasianu naga selama tueibao, tiali digi te dage nasi me elaludaibao,” Genuai Bidigo te po wai dao.

27 “Eno te sę dabe yali, te dagego hagoma me idubadi geyu, te eno po ma sela sąbaso da, 28 teda eno haliga sębę dwai mu eyu, te eno dagego dwai sę ebo umagia mu wei ponodu, te dageba dwai dene mu madubadi geaibao,” wali. 29 “Te dage nasi dwai mu ebaso, te duga wai te ogwa me wegi dabe te ela tueibao,” te po wai dao.

30 “Te eno dwai haliga dageba elama, te dagego tibo god dabego lotu be te bulu dude sę yani te eno dolaibao, te wiegi yai denami ebo hano holobo ofa ebo alta eno alueibao. Te eno dage ela munama, te eno dolali te tibo god piksa daiba sąwaibao. 31 Te eno dagego taun dabe me lotu be dabe dolaibao, tama eno dagego te ebo ofa dabe homu godolo me egobeo. 32 Te eno dagego tǫ mu dolaibao, te dagego boi bidi dabego te tǫ selama bidibo sogo, te augwa sulama, te dwai noma mu saibao. 33 Eno digi te boi bidi dabego dageba boi hwįmainogo ilaibao, te eno dage augwaligo te gasa tǫ kantriba tedela palomainogo ilaibao. Te dagego tǫde bidi meniama olo elalu, te taun dabe dolai elalueibao. 34-35 Tialima, dage te boi bidi dabego tǫde bidalubo sogo, dagego te tǫ dabe olo dali elalu, te toma nedueibao. Polobadu dage te tǫde bidaluyu, tama dagego te 7 wabo kibu bede te tǫ toma nomainu ilibeo, eno dagebolo te tama tiao po wali gilama me ebeo. Tialima, te tǫ olo elalubo sogo aga te bugagia toma tueibao, te sogo tǫgo godolo yaibao,” wali.

36-37 “Te dage hani dwasianu naga elalu, te boi hwįbo sogo me isigobeo, te dage boi bidi dabego tǫ kantriba bidigi paibao. Te dage eno wi dwai mu ilaibao, te dagego waligo te ni yabe gele gele dwasianu wabo odobaso da, teda dage odolali wi elama, tama te boi bidi dabego pobebaso wi pabo tiwai yaibao. Te boi bidi dabego pobesąbadi digi, te dage odolali wi pelayu, udabogo duga hasi hodola palama, tula munana paibao. Te boi bidi dabego dage dali hwįbaso da, teda dagego augwali dali me hwįgobeo. 38 Tialima, dage te boi dabego tǫde isila paibao. Te augwaligo tǫgo dage aiyaba mu dalubo tiwai yaibao. 39 Te dage dwasianu hani dabe te boi bidi augwaligo tǫ kantride bidaibao, te dage deli deli dolama, te dage hani silabo homu yaibao. Magi baso meni, duga digi, me te aya dabe, me wąį nǫų dabego yali sęgęde me duga tigidaligo sęgęde tama tiaibao,” te po wai dao.

40 “Tiali goli, nosali dage te hani dabe te augwa yali sęgę homu kone palama, te augwaligo enaba pusaibao. Augwaligo te tama po waibao, ‘Dena digi me te sęgę siyu, te wąį nǫų dabego me sęgę salio. Dago hagoma elama, te nago po sela sąwai dao.’ 41 Dagego hagoma ebaso, tialima eno dageba dwai dene menama, tama dage te duga boi bidi dabego tǫ kantriba tagala palali. Tialima, duga hanigo te hagoma ebo tagalobo sogo te augwa digi elaluama, te augwa yali sęgę dwai dene sobaso da, 42 teda eno te Jekop, me Aisak, me Abraham augwali dali te dąų wali bomai po kontrak homu ma koneaibao, te Kenan tǫ augwa wąį nǫų dabebolo mawaibao po wai dao. *Gag 17:7-8; 26:3-4; 28:13-14 43 Tialima, hasia bolo dagego te tǫ tagalai elalueibao, te tǫ odolali elaluama, te bobage sesabi elama, toma neyu elalueibao, te dagego tǫ te olo elalumainogo isąwani te sogoba usu naibao. Te dage sęgę tolama, te dwai dene saibao, magi baso meni, dagego eno bomai po tigidali tudiba munama, te eno po me tigidali sela sąwai dao. 44 Tiali goli, dage te boi bidi dabego tǫ kantride bidibo sogo, te dage mu tagalisąma, te eno dage tigidali mu me dologobeo. Mu menio. Eno te tiwai egi sogo da, teda eno dage dali te dąų wali bomai po kontrak dąų wali, te siligi da. Tiali goli, ena God, duga Genuai Bidi, eno te tama tiwai kolesaga me egobeo. 45 Eno dageba homu koneama, eno te dagego wąį nǫų dabe dali dąų wali bomai po kontrak ma homu kone palaibao. Te bidi dabe eno polobadu te tǫ kantri Isipde selama odasa asali, te gasa tǫ kantri we bidi tigidaligo te eno genuai bomo suali. Eno dage sela asali, te Genuai Bidi ena hani bage pedalumainu yali, ena dage Israelgo God bidainogo yai dao,” te po wai dao.

46 Te po dabe me te bomai po Genuai Bidigo Mosesbolo te Sainai bulu dude mayu dąų walai dao. Tama agai te po weyu, te Israel dabego tigidali wali piyąo wai dao.