1 Genuai Bidigo Mosesbolo te po walama, 2 te Israel we bidibolo te tiwai po omainogo yali, “Dage wiegi yai mu tedali mu bidiyu, te eno godolo yabo wiegi yai doloba pai kolesaga wali pao. Magi baso meni, ena God, dagego Genuai Bidi, ena tedali wiegi yai mu elalu, eno kolesaga wiegi yai doloba pai mu elalubo dao. *Prs 11:44-45; 1 Pi 1:16 3 Dage deli deligo duga ida aya dologode bidu, te augwaligo po wali pao. Dagego te olo toma nabo sogo, te Sabat side, sę me igio, dage olo toma naga tuyu, bidao. Ena Genuai Bidi, ena duga God, eno te po wai dao,” wali. *Sai 20:8, 12; Bom 5:12, 16

4 “Dagego te tibo godiba lotu weyu, ena me tagaligio. Te dagego olo dali te olo nai aingo te lotu wabo tibo god nigilama, teba lotu me wagio. Te habu mu dao. Ena Genuai Bidi, ena dagego God, eno te po wai dao.” *Sai 20:23; 34:17; Prs 26:1; Bom 17:2-5

5 “Te dagego ena dali deli haliga pedelabo ofa ebo sogo, dagego eno dagebolo mani bomai po wali pelama, te ofa yao. Dagego te tama ebaso da, teda eno dagego ofa ebo godolo yaibao. 6 Dagego te ofa yali kibu mi te kibu elali side ma te nosali side tuiyąo. Te kibu mi munalubadi te sela sogo wabo siba sabalobaso da, teda dagego te isiba ulama, te keli naga elalumainao. 7 Te bidi me deligo te sela wabo side elaluali kibu mi tubaso da, teda te kolesaga eno gedude dwalio, tama eno te ebo ofa godolo homu me egobeo,” wali. 8 “Mena bidigo te sela wali sogoba usu nani munaluali kibu mi tuali bidi da, te ena mani nai digi agai dwai ilibao, te aga yali sę dagede sęgę elalubao. Tama tialima, eno we bidi hanide aga sela sąwaibao,” wali.

9 “Te dagego duga gide nai inawai tau yai togobo sogo, dagego te gi sesege homu badu elalubo nai togolama sigio. Te gi tomode nai dagego sabo sogo, te nai meba ela soabaso da, teda dage ma geasa peyu te nai ma sigio. Tede tama elalumainogo sula tagalao. 10 Te dagego te wain tau inayani sela silibo sogo, dage te wain giba si sogo ma pelama, te hasia susiąma tagalali nedu du wain ma sigi pigio. Te tǫba tudulaluai munalubo wain du dagego me sigio. Dagego te nai dabe tagalama elalu, te magi nai meni yai bidi dabego, ma te gasa hani dage dali bidibo, te hani augwali somainao. Ena Genuai Bidi, ena duga Godigo, eno te tiwai po obao,” wai dao. *Prs 23:22; Bom 24:19-22

11 “Dagego gasa bidigo nai dabe wi me sigio, te dagego gasa bidiba tibo po wagio, te agai nai anoma elama sainogo tigio. Te dagego gasa bidiba tibo po ola magio. *Sai 20:15, 16; Bom 5:19, 20 12 Te dagego bidi me deliba bomai po dąų walu, ena nogide te po dąų walai baso da, teda dagego te bomai po olo dali dąų walama, aga tibo po ola magio. Dagego duga te dąų wali bomai po wali pisąbaso da, teda dagego eno nogi aiyaba elalubao. Ena Genuai Bidigo, eno te po wai dao. *Sai 20:7; Bom 5:11; Mat 5:33 13 Dagego gasa bidi me doloyu, te agai nai dabe wi me sigio. Te dagego bidi me deliba sę mawai baso da, teda dagego agai sę te ela silibo side te abelebo mone mao, te sogo piode. Dagego te mone tolalubadi be huliama te kigamude me magio,” wai. *Bom 24:14-15 14 “Dagego te olo degai we bidi augwaliba te po dwai me wagio, ‘Godigo dage dolabo sę elalubao.’ Dagego te gedu widai bage habela muabo bono gaga te sunumide me mugio. Dage ena Godide wi yao, duga Genuai Bidi dao,” wali. *Bom 27:18

15 “Te dagego po tų odobo si da, teda dagego te po tųde doloba pai kolesaga naga yao. Te dagego po bugagia dodolao. Dagego te magi nai meni yai bidi dabe tau siyu, te augwaligo po tų ebode ugwaba ela holomainogo elamuo. Me ma, dage te nogi yai bidide wi eyu, te augwali tau selama, te po tųde ela holomainogo elamo dao. *Sai 23:6-8; Bom 16:19 16 Duga abagi dabeba kisa sigi pelama biliyu, te gasa bidiba posobo po wagio. Te augwaligo bidi me deligo te genuai sęgę sai madi po tų ilibaso, te dagego aga po tųde tau sabo homu eyu da, teda dagego tau sao. Tiyu, dage pedauwali panialubaso, te po tųgo aga ela muao po wabuo. Eno homugo dagego tama tiwai yao, magi baso meni, ena duga Genuai Bidi dao,” wai dao.

17 “Te nago abagi me deligo nageba dobo sę yai baso da, teda nago homude aga dali sesemane sogo wado po udugio. Nago aga dali po dodolobaso da, te po isaibao. Tiyu, nago me agai yali kolesagade homu kone paludu, te nago me dwai sęgę me deli sabuo. *Mat 18:13 18 Te naga abagi me deligo nageba dwai sę ebo te nago wei me ponogio, te nago sesemane sogo aga dali wado po me udugio. Nago gasa we bidi dabe godolo mu yao, te naga digi naga godolo ebo tiwai yao. Ena Genuai Bidigo eno te po obao.” *Mat 5:43; 19:19; 22:39; Mak 12:31; Luk 10:27; Rom 13:9; Gal 5:14; Jer 2:8

19 “Dagego eno bomai po dabe wali piyąo. Dagego te kibu hasa sibi si augwa hasi omai sę elama, te wai ame nomainogo sula tagaligio. Tama dagego te tobage nai wai hani si te gi delide buligio. Tama dagego augwaligo te olo hobigo hobolai nami ugwa dali te sipsip nisigo nigai hobigo hobolai ugwa te me gudugio. Te kolesaga ebo habu dao,” wai dao. *Bom 22:9-11

20 “Te bidi me deligo aga olo sę ebo we te agai gasa bidiba maiabo po dąų wali, tialima te gasa bidigo abelesąwai. Tama te we tonalubo bidigo te we dali dobo sę gagali yai baso da, teda dagego augwali si te po tų kotba odasa piyąo. Tiali goli, te dagego augwali si ela mugio, magi baso meni, te we te tonalubo bidigo olo sę ebo we dao. 21 Tama te tonalubo bidigo te sipsip kibu omai me deli selama, te eno sel Ugwa Be sunumiba pao. Agai te sipsip ena Genuai Bidiba ofa elama, te dwai sę dodoliyu, te agade elalubo sęgę silimainao. 22 Tama prisgo te bidigo sęgę sela sąbo ofa yao. Te eno sulama, eno te sęgę sela sąwaibao,” wali.

23 “Dage te Kenan tǫba pabo sogo dagego te tobage du walobo ni du dabe bulubaso da, teda dagego te kibu be selade te bulali ni du tusiąma te habu selao. 24 Te kibu be me si me si wabode, dagego te ni du wai tigidali te ena Genuai Bidiba mao, te dagego enaba wiegi yai pemene eyu puba hwi wabo ola mabo tiwai ebao. 25 Tialima, te a naga wabo kibu bede te ni du walobo nai duga tuao. Eno te po dagego wali pobaso da, teda dagego ni du wai hauwa umabo walaibao. Odao, ena God, dagego Genuai Bidi, eno te po obao.”

26 “Dagego te kaneme elalubo kibu mi tugio. Te dagego haniani pobi wabo sę me te kebele aubo sę me igio. *Gag 9:4; Prs 7:26-27; 17:10-14; Bom 12:16, 23; 15:23; 18:10 27 Te dagego tobolu nisi te dagego olo pąde togogimio, te dagego penani nisi togolama pęwadage iligimio. 28 Te dagego tigide todogo pelama masalu ebo sę iligio. Te bidi isaide, ma we isaide homu dene eyu, duga tigi togobo sę igio. Ena Genuai Bidigo eno dagebolo te kolesaga dabe ebo habu mu selibao,” wali. *Prs 21:5; Bom 14:1

29 “Dagego te Godigo po odisąwai bidi dabego ebo kolesaga tiwai eyu, te duga wegi dabe te penanide sǫbo we dabe tiwai pedalumainu elamuo. Tiyu, dagego te tiwai sę eyu, te ena tagaluyu, te dage te tibo godide gone tuą peyu, haniani dwai sę yabuo. Te dagego bulu tigidalide te dwai kolesaga pągąna pidalio.” *Bom 23:17

30 “Dagego te olo toma neyu bidibo sogo, te Sabat side, sę munu me igio. Dagego te we bidi dabe aselama, te enaba lotu po wagasobo sel Ugwa Be godolo mu yao. Ena Genuai Bidi, eno dagebolo wai dao,” wali. *Prs 26:2

31 “Te dagego wiegi yai homu kolesaga sabo homu ebaso da, teda pelama, te isali bidi dabego noma bidi dali po mibo bidi dabeba me hanalugi pigio, te noma bidide homu kolesaga selama, dageba momainogo igio. Te dagego tama sę ebaso da, te dage eno gedude meda pedelaibao. Ena Genuai Bidi, ena duga God, eno te po wai dao.” *Bom 18:11; 1 Sml 28:3; 2 Kin 23:4; Ais 8:19

32 “Dage te monu dabe dologoba pelama, augwaligo po wali peyu, te augwaliba wiegi yai sę yao. Te dage ena dologoba aselama bidao, te dagego God dao. Ena Genuai Bidi, eno te po wai dao,” wali.

33 “Dagego te gasa hani bidi te dagego tǫde bidibo hani bidi augwaliba dwai sę elamo dao. 34 Dagego wiegi yai kolesaga naga augwaliba yao, te duga deli hani te Israel dabeba ebo kolesaga tiwai yao. Te dagego augwali godolo homu mu eyu, te duga digi duga godolo ebo tiwai yao. Dage te Isipde polobadu bidali, tama te tiyu bidigo aga page bulu tagalama, te gasa bulu tǫ kantride bidibo kolesaga dagego koneao. Tama tiyu, dagego te gasa hani dage dali bidibo bage bugagia tonaluao. Ena Genuai Bidi, ena duga God, eno te po wai dao.” *Sai 22:21; Bom 24:17-18; 27:19

35 “Te gasa bidigo abelabo nai dabe usu selama, dagalama, te nedebo sogo da, teda dagego aga tibo po ola magobeo. 36 Menio. Dagego dolo usu selama, dolo dodolama, te nai dabe dolo naga nedao. Ena Genuai Bidi, ena dagego God, te eno dage Isipde selama, te dage odasa asai dao. *Bom 25:13-16; Prs 20:10; Ese 45:10 37 Tama tibaso, eno dagebolo mani bomai po tigidali wali pao. Ena Genuai Bidigo, eno te po dagebolo wai dao,” te po wai dao.