15
Te negeli silabo kibu be
(Prs 25:1-7)
1 Tama Mosesgo po geninama weyu, te po wali, “Te tigidali kibu be namba 7 wabode, te kibu be silibo si, dagego te bidi dabego dage negeli ilali te negeli wei ponao homu ebo tagalama, te negeli sela sąyu, isiliyu yao. 2 Dagego te tama tiao. Bidi mego aga abagi mone mawai baso me, te bidi aga abagigo negeli sela sąnama isilao. Tama aga abagibolo wei ponao po wagio. Magi baso meni, Genuai Bidi agai digi te abagigo negeli yali sela sąyu silabo sogo te pedelai dao, te kibu bede. 3 Ma, te Israel hani isąwai gasa bulu bidigo dage dali negeli yai baso da, teda dagego agabolo negeli yali we ponao po wagameo, te usu dao. Tiali goli, duga abagi solo, te Israel hani bage, augwali dali negeli yali da, wei ponao po wagio. Menio. Te negeli sela sąyao. 4-5 Te dagego Genuai Bidigo po eno dagebolo megi mabo te bomai po wali bugagia peyu, agai po odiyu yali da, teda Genuai Bidi dago God agai dagebolo mawainogo ebo te bulude dage dali wiegi yai sę yaibao. Tama tibaso, te dage hani bidi me deli nai me habuge me elamuo. 6 Magi baso meni, Genuai Bidigo agai po dąų wali da, te po wali pelama, tama dage dali wiegi yai sę yaibao. Tama we bidi hauwago dage dali negeli eyu yaibao. Tiali goli, dagego augwali dali negeli me egobeo. Tama dagego te tǫ pedai kantri hauwa tonaluaibao. Tiali goli, kantri mego dage me tonalugobeo,” wali.
7 “Tialima, duga abagi me Genuai Bidigo dage mawainogo ebo te hanude bidibaso da, tama aga nai meba habuge yai baso da, teda dagego aga tudiba togolama, tama aga tau sabo homu me tagalamuo. 8 Menio. Dagego aga hobede elama, tama dagego agai sǫą pali nai tau sao. *Prs 25:35 9 Dagego homugo te negeli yali sela sąyabo kibu be pąba yalio homu igio. Tama tilama, dagego homu dąų olama, tama abagi tau sabo hagela ebo homu igimio. Dagego te dwai homu kolesaga dagede pedalomainogo sula tagalamuo. Ma, dagego tau sabo mone agabolo mabo hagela homu yali da, teda te bidigo Genuai Bidi i olama, tama agai dage wei ponoyu, dage Godigo gedude sęgę saibao. 10 Te agai hanalubo nai dabe tigidali tama maiąo. Te hagela ebo homu igio. Tama Genuai Bidigo dagego ebo sę dabe sese tama wiegi yai pedalomainogo ilaibao. 11 Tigidali sogo dage Israel dabe meba te nai dabe sǫą peyu bidaibao. Tama tibaso, eno dagebolo te po te wabao, dagego augwali hobede elama, tama augwaligo habuge yali nai dabe tau sao, tama augwali dali wiegi yai sę yao,” Mosesgo te po wai. *Mat 26:11; Mak 14:7; Jon 12:8
Te Israel dabego augwa sę bidi dabe dali yabo kolesaga po
(Sai 21:1-11)
12 Te Mosesgo po geninama weyu, te po wali, “Te Israel hani tomode te we o bidi me deli te negeli elalubaso, agai digi aga bidi mebolo olo sę ebo bidi tiwai mobaso da, teda agai sę te kibu be a naga olama, deli, te 6 kibu be tama naga sę emainao. Tama te namba 7 kibu be wabode aga sę tagalomainao. 13 Tama agai te bidigo sę ebo tagalama pabo si da, teda te page bidigo aga aga buluba olo taga palamuo. Menio. 14 Dagego Genuai Bidigo dagebolo mani te nai dabe meba, te sipsip, me wit, me wain dabe, tama selama aga mao. 15 Dagego te dage me te Isipde olo sę ebo bidi bidali te kone paliąo, tama Genuai Bidi dago God agai dage oda selama, olo ma tagala palai dao. Te tama tiali po pagede eno megi te bomai po dagebolo te mobao,” wali.
16 “Tiali goli, te sę bidigo te page bidi me aga we wai godolo mu eyu da, teda agai te po waibao, ‘Eno dage taga pabo hagela ebo,’ po waibao. 17 Te tama po obaso da, teda aga odasa pelama, aga genuai bidigo be sunumiba sabolama, tama neli me deli selama, tama agai olo te sunumi pos niba munama, neligo enama, sunumi nigilama, tama aga te be page bidigo sę bidi bidama, aga monu dabe elama isimainao. Dagego te deli sę te duga sę ebo we dabe dali me tama tiao. 18 Dagego duga te aga negelide sali sę bidi dabe te namba 7 wabo kibu bede olo taga paliyu, tede dwai homu me elamuo. Magi baso meni, agai dagede sę te kibu be a naga olama deli kibu be, te 6 tama elama, tama agai hap pe naga sali. Dagego te tama tiyu da, Genuai Bidi dago God agai dagego tigidali sę ebo agai wiegi yai mu pedalomainogo yaibao,” wali. *Prs 25:39-46
Kau kibu me sipsip kibugo gomunai omai wai dabe po
19 Mosesgo po geninama weyu, te po wali, “Dagego duga te kau kibugo hasia wai omai, me sipsip kibugo hasia wai omai, te Genuai Bidi dago Godibolo sa muao. Tama tialima, te sa muani kau kibugo waigo sę ebo te habu mu dao. Me te sa muani sipsip kibu waigo nisi togoyu sabo me habu mu dao. *Sai 13:12 20 Te tigidali deli deli kibu bede dagego te tobage sa muani kibu dabe te lotu wabo pesage deliba sela pelama, duga hani we wai dagego te hasa dabe tuyu yao. 21 Tiali goli, te kau kibu o sipsip kibu augwaligo sągą gagea peyu, ma agai gedu hwidiyu, o agai meba dwai gasi dabe yai baso da, teda dagego Genuai Bidi dago Godibolo ofa eyu tama tugimio. 22 Menio. Te tama tiwai hasa dabe te duga bulude naga tuiąo. Dage tigidaligo tama tuiąo, te dage Godigo gedude wiegi yai bidigo me o meda osogo yai bidigo me tama tuiąo. 23 Tiali goli, dagego te hasa dabego kaneme tugimio. Menio. Dagego olo wę yali gilama tǫba gea palao,” Mosesgo te Israel dabebolo te po wai. *Gag 9:4; Prs 7:26-27; 17:10-14; 19:26; Bom 12:16, 23