Profet Aisaiago Po Asęai Buku
Hasia nedebo tau sabo po
Aisaia te profet me deli te Jerusalemde bidali sogo, te Asiria dabego te kantri tǫ Israel te not badu bidali hani dolainu yali, tama pąde augwaligo te saut badu bidali Juda dabe me dolagasainu yali. (Te sę yali po te buku 2 King, Dąį 17, tede suao.) Dago te buku Aisaia sela badu pedaiba pedebaso, usu da. (1) Dąį 1-39. Tede elalubo po e tiwai dao. Aisaiago te asęani po te Asiria ami bidi dabe te pąba yagaselama, te augwaligo Juda hani dolainu ebo sogo te po Aisaiago asęani. Aisaiago agade digi po bega selama, dwasianu po pusali te po te Dąį 1-12 tede elalubao.
Juda we bidi hauwa te sogo augwali wi umagi mu yali, tama Aisaiago po augwaliba te pedalubo sęgęde po page bula selama, pusalio. Agai te tiwai po wali, te sę pedalubo da, te Asiria dabego homude niga selama ebeo. Menio. Te page Juda dabe augwade digi elalubao, magi baso meni, augwaligo God tudiba muanio, tama tibaso, Godigo augwaliba te dene mabo sę yaibao, wali. Aisaiago po hanilama pusuyu, te tiwai po wali, te Juda hani dabe augwa gegunai bidi dabe dali, augwali te Genuai Bidigo po dologoba pelama, te doloba pai kolesaga naga wali piąo, wali. Augwaligo te tiwai kolesaga ebaso, te augwali bugagia bidaibao. Tiali goli, augwaligo te tiwai dwai kolesaga me wali pidubaso da, teda Godigo augwali dolaibao.
Aisaiago po dąų wabo po pusuyu, te tama po wali, te nosali wiegi yai sogo me pedelaibao, wali. Te king Devitde bulali wąį nǫų me delide te king pedelama, te tigidali we bidi bidibo page wiegi yai pemenede bidaibao po wali.
(2) Dąį 40-55. Tede e tiwai po wai elalubao. Te buku pedai badu wali po, te Juda dabe te Babilonde kalabusi bidali sogo wali po, te sę yali po te bobage sogo bidilama, te buku hasia pedai badu te po wai. Te Juda dabe haliga sęgę elalubadi, tama profetgo te po hanilama pusuyu, te augwali wiegi yai pemene elama bidabo sogo pedelabo po pusalio. God aga te tigidali nai nigali aga Aya dao, tama agai te king Sairus te kantri tǫ pedai Persia bidi dąį ilali, te agai sę emainogo, tama te Juda dabe augwa page buluba ma pomainogo yali. Te boi bidi dabego augwa buludu te gasa digibulu buluba odasa solama, bidigi soali, tiali goli Godigo augwali homu kone ebo gegeda palobeo. Menio. Agai augwali dali polobadu dąų wali bomo yai pode homu kone me elaludalio. Tama me profetgo te tama po me wali, te Israel dabego nogode Godigo te tigidali tǫ pedai we bidi hani dali wiegi yai bugagia ilaibao po wai dao. Te buku pedai badu te po hauwa me weyu, te po wali, “Genuai Bidigo sę bidi,” te pedelama, te dene selama, te we bidi augwali tau saibao po wali. Te Godigo po odobo we bidi hauwago konealubo po te tiwai dąų wai, te Genuai Bidigo sę bidi da wali, te Jisasbolo tama wali dao.
(3) Dąį 56-66. Tede wali po e tiwai, te badu pedai badu bukude, te profetgo te Jerusalemba ma aselama, bidagasali hani dabebolo pusali po elalubao. Me badu po e tiwai wali, Godigo aga dąų wali po homu kone elalubao, tama te pogo te Juda hani dabego haliga bomo ilalio. Te bukude me badu wali pogo augwalibolo e tiwai po wali, te augwali God dologode bidiyu, tama te lotu wabo doloba pai kolesaga wali pelama, te Godiba gedu haluasa po weyu, te agaba ofa mayu yao. Augwaligo te magi nai walu doado bage meni yai we bidi dabe tau sabo sę yao wali. Wiegi yai po me deli te Dąį 61:1-2 tede elalubao, te po Jisasgo agai sę gagalama yainu, te we bidi hani augwaliba te po nedali. Me te buku Luk 4:16-21, tede elalubo suao. Te Aisaiago buku pedai hauwa badu te Godigo we bidi dabe augwali tau selama, haliga dua elama bidabo po wai, magi baso meni, te po dage pedaigo te Godigo bomo elalubo po hanilama pusali. Te we bidi augwaligo suali, te haniani sęgę ebadi goli, te tagalao, God te augwa Aya mu da, te agai augwali tonaluali. Te Godigo po odobo we bidi dago te tiwai koneabo elalubao, Godigo te profet po waliba mu usu nanio, te Jisasgo bidibo ulade me isalide te po mu usu nai dao.
Aisaiago Godigo po te Juda de Jerusalem bulu side bidibo we bidi augwaliba te po pusali
1
(Dąį 1–12)
1 E bukude te profet Aisaiago po elalubo, aga te Emosgo ogwa dao. Te nade ebo tiwai Genuai Bidi God agai po te Aisaiabolo mani, te Aisaiago te Juda we bidibolo, me Jerusalem we bidibolo pusa momainu. Aisaiago te po te tuni bidi king Usia, me Jotam, me Ahas, me Hesekia, tama bage deli deli te Juda dabe tuni bidi bididubadi pusai dao. * 2 Kin 15:1-7, 32-38; 16:1-20; 18:1–20:21; 2 Sto 26:1-23; 27:1-9; 28:1-27; 29:1–32:33
Genuai Bidi aga we bidi dali wado po wali
2 Dagalu, olo saganama, odao. Tǫ, nago me odao. Magi baso meni, Genuai Bidigo te po wai dao,
“Te wai dabe eno tonaluama, genuai yali.
Eno augwali bugagia negali.
Tiali goli, augwali da, augwaligo eno po sela sąbo dao.
3 Te kau kibu dabego augwa aya konebo dao,
me te donki kibu dabego
augwa ayago nai mabo pesage konebo dao.
Tiali goli, eno Israel we bidigo kolesaga menio.
Te kau kibu de donki kibu sigo kolesagago augwaligo
kolesaga edelalio,” wali.
4 Tega, te we bidi dage dolama,
dagego kolesaga me mu doali.
Tigidali sogo dagego dwai sęgę sabo dao.
Te duga dwai sęgęgo dage aiyaba kegebo dao.
Dage Israel dabego duga Genuai Bidi tagalai dao,
aga te Dwagi Yai Doloba Pai Kolesaga
Naga Ebo God dao.
Tama dagego aga tudi ola manio.
5 Magi baso dagego Godigo po me sela sądubawe?
Dage tigidali sogo dene sabo hagela meniwe?
Israel, nage te bidi me bidi dabego elai bidi tiwai dao,
te agai tigi sese mu dolama, bomo mu meni yai.
Agai tobolu keni kenigo pągąna pai.
6 Te kenigo agai toboludu gagalama,
sągąba usu nigi pali,
tama agai tigiwali olo me elalubeo.
Te haniani kenigo agai tigide pągąnama,
tama agai tigi deda pali.
Augwaligo agai tigi penama agai keni sįsibeo.
Te augwaligo madasin me pilibeo.
7 Awe, te boi bidi dabego dagego bulu
polo dola silai dao.
Tama augwaligo dagego hanu dabe ulali dao.
Te dagego tonalubadi, augwaligo
dagego gi nai dabe sai dao.
Te gasa bulu bidi dabego bulu mu dolama,
tama dagego tǫ olo mu elalubao.
8 Hobedagia! Jerusalem deli naga augwaligo tagalali.
Agaduba deli naga elaluyu, tama bomo mu meni.
Aga te bidi dabego olo gi be sę yai ąǫ elalubao,
te bobi gide sę yani dwasianu be tiwai naga
elalubao.
Aga te boi bidi dabe bagua sai hanu ąǫ elalubao.
9 Ma, Genuai Bidi Tigidali Bomo
Elalubo Bidigo da meba
bidimainu sula tagalisąma menigi sogo da,
mu tama, teda da polo dolama siligi dao,
te hanu Sodom de Gomora si dolali
yali tiwai gilama, polo dologi dao.* Gag 19:24; Rom 9:29
10 Dage tobolu bidi dabe,
me dage Jerusalem we bidi dabe,
dage te bidi dwai dabe te hanu
Sodom de Gomora side
polobadu bidali bidi dabe tiwai mu tama dao.
Megi da, dagego olo bugagia munama,
tama Godigo bomai po odao, dago Genuai Bidi.
Agai dabolo mawainu ebo po bugagia odao.
11 Genuai Bidigo te po odu gebao,
“Dagego homugo, dagego haniani ofa enabolo mabo
te eno godolo ebawe, homu ebowe? Mu menio.
Dagego te sipsip kibu dabe hauwa dagego seselama,
te isigo ula silabo ofa yainogo ebo dao.
Tiali goli, ena mu hagela mu yali.
Tama eno dagego dwagi yai genuai
dagego sesebo hasa ili dabe eno godolo ebeo.
Ena te kau kibu omai kaneme me,
me te sipsip kibu gǫųgo kaneme,
me meme kibu omai kaneme dabego
enabolo usu yai dao.
12 Magi baso meni. Te dage lotuba asobo sogo,
dage dua aselama,
eno obo tomoba asobo menio. Menio.
Dage asobo yaide, duga olo bilagasu,
kulukulu genuai wainu asobo dao.
13 Dage odolali bomai sę elama,
ofa nai dabe enaba sesigimio.
Magi baso meni. Eno augwalibolo hagela yai dao.
Tama me, dagego ulubo pauda denami
eno gunide dwai denami pedalobo dao.
Eno dagego gesi poluade, me Sabatde,
me gasa lotu dabe dagego wabo
eno me subo, hagela ebo.
Magi baso meni. Duga dwai sęgęgo
duga lotu dabe dolali.
14 Eno dagego te gesi poluade lotu wabo,
me gasa bodolu mani lotu dabe dagego
wabo eno godolo mu menio.
Te nai dabe tigidaligo enabolo sęgę mabo. * Amo 5:21-22
Tama eno tolobo mu hagela ebo.
15 Te dagego nogo ugwa selama,
gedu haluasa po enabolo wabo si da,
teda eno dage sugobeo.
Tagala, dagego gedu haluasa po hauwa sogo obadi,
me teda ena olo palia saibao.
Magi baso meni.
Te bidi dabe dagego elali bidi dabego
kaneme dagego nogode me daganalubao.
16 Eno dage suali mu doali.
Dage wę paugi pįa, tama duga digi duga pęnama,
tama dwai sęgę dage elalubo sela sąyao.
Tama dwai sę ma igio.
17 Te dwagi yai doloba pai
kolesaga ebo kolesaga konea sao.
Tama te tobage dwagi yai kolesaga ugwa
ela holomainu yao.
Tama eyu, te gasa bidi dabego
aiyaba elaluali bidi dabe tau mao.
Te po tų ebode te tiana wai dabe bugagia tau sao.
Tama me te wilawe we dabe te po tų ebode tau sao.
Te tama bidi dabego augwali dali dwai sę ebaso da,
dagego augwali tau sao.”
18 “Odao. Da deliba sisinama, po mimainao.
Dagego sęgę hauwa elalubadi me, tagala.
Te dage te nala ugwa tiwai bidai goli,
hoda naigo polo dolai dao.
Ena Genuai Bidi, eno te po obao,
eno te dage te tedela ais tiwai ma ilaibao.
Awe, te hoda nai mu dąų wai goli,
eno dage te tedela yai
sipsip kibu nisi tiwai ma ilaibao.
19 Ma, dagego eno po mu odama,
tama te homu kolesaga wali peyu da,
teda dage bidibo me bugagia bidiyu,
me duga gide bulubo wiegi yai nai
dagego tuyu, bidaibao.
20 Tiali goli, dagego hagela elama,
eno po sela sąyani da,
teda boi bidi dabego dage ela muagasaibao.
Ena Genuai Bidi, eno po polo wali.”
Genuai Bidigo Jerusalem bagego kolesaga dodolabo homu yali
21 Mena tama te pedalaliwe?
Hanu Jerusalem, polobadu nago eno po
wali dolo pai dao.
Tiali goli, megi da, nage penani we gaga wali.
Tega! Polobadu nagede bidali bidi dabego
te po tų dodolobo kolesaga dolo yai dao.
Awe, polobadu nage te dwagi yai
doloba pai kolesaga ebo
bidi dabego pągąwai dao.
Tiali goli, megi da, nage bidi ela mabo
bidigo pągąyani.
22 Polobadu nage dwagi yai silva tiwai da.
Tiali goli, megi da, nage yaba yai kapa tiwai dao.
Polobadu da, nage pusai wain tiwai goli da.
Tiali goli, megi da, nage olo wę tiwai dao.
23 Jerusalem, nago genuai bidi me, tobolu bidi me,
augwali te po odisiąwai dabe bidiyu,
tama nai wi sabo bidi dabego abagi dao.
Tigidali sogo augwaligo te mone pesą eyu,
augwaligo te bidi dabe augwali dali
mone dabe sainogo ili po wabo
bidi dabe tau sabo homu ebo dao.
Tama te po tų odobo sogo,
augwali te tiana wai dabe tau sabo
homu ebo menio.
Tama me, augwaligo
te wilawe we dabego homu sęgę ebo
dodolobo odama, dodolabo homu ebo menio.
24 Tama tibaso, Jerusalem,
Godigo po dabe megi odao.
Tigidali Bomo Elalubo Genuai Bidi
te Israel dabego boma pai God dao.
Agai te po wali, “Ena Genuai Bidi,
eno te ena boi bidi dabebolo dwai dene
wei ponaibao.
Usu dao. Tama augwaligo enabolo sęgę ma magobeo.
25 Jerusalem, eno bomai sę me deli nagede yaibao,
te nago dwai sę yali dodoliyu,
eno nage posolai isigo ulaibao.
Te bidi dabego te kapa nogi silva iside ulama,
tama dwai pobele bage dagana saibaso,
te sela sąwainu isi ulubo tiwai yaibao,
te posolai iside.
26 Tama eno dwagi yai tobolu bidi me,
po tų dodola mu odabo bidi dabe
ena digi dąį ilaibao,
te polobadu nago bidali bidi dabe yali gilama.
Tama bidi dabego nage nogi
te doloba pai kolesaga ebo hanu dao waibao.
Tama Godigo po dolo wali pabo hanu dao waibao.”
27 “Genuai Bidigo Jerusalem bugagia
doloba pai kolesaga dali aselama,
tama te bulu ma dobola saibao.
Tama te dwagi yai kolesagade naga
agai Jerusalem we bidi ma oda saibao,
te augwaligo augwa yali te dwai sęde
ge neyu, homu begelama,
tama augwa yali dwai sęde hobede ebaso.
28 Tiali goli, te we bidi dabego po sela sąnama,
dwai sę elama, God tudi ola mabo
we bidi, agai augwali dolama,
tama agai augwali mu silaibao.”
29 “Magi baso meni, dagego genuai
ni silide te tibo god dabeba
lotu olama, tama tede dwagi yai
homu eyu bidai dao.
Tama me te gi elama, tama lotu
wabo digi dao olama, hage yai dao.
Tiali goli, dage te yali kolesaga dabede hobede elama,
tama hale genuai mu yaibao.
30 Te dage te genuai ni kali sasilama,
mobia pabo tiwai yaibao.
Tama dage te gi wę meni yai gi tiwai dage tama tiaibao.
31 Te kala sasia pai da,
te isi deli sogo tama dela pabo dao.
Tama te tiwai sę te doado bage hauwa
elalubo bomai bidi dabede yaibao.
Augwa digi dwai kolesaga ebogo
augwali deli sogo tama dolaibao, sia saibao.
Tama te sogo augwali tau sabo bidi meni yaibao.”
Genuai Bidigo te po wali.