1 Genuai Bidigo Mosesbolo po waliyu, te tiwai po Israel dabeba omainogo yali, 2 “Te bidi me deligo aga abagigo doado bage bugagia tolaluainu selama, tama agai te nai doado bage ma maiabo homu isąbaso da, teda agai sęgę sobao. Te agai abagigo nai wi sobaso, ma agai augwali tibo po ola menama, te agai doado bage anoma elama sobaso me, 3 ma agai gasa bidigo hagawai nai sulama, te tibo po weyu, ‘Mu po obao, eno me subeo,’ obaso da, teda aga sęgę sabo dao. 4-5 Bidigo te tobage kolesaga dabe ebaso, te sęgę ebao, te agai nai wi sabo kolesaga me tibo po wabo kolesaga ebaso, te doado bage wei ponao. Te aga yali kolesaga silimainogo ofa ebo sogo da, teda agai te doado bage aga ayabolo te nai tigidali wei ponao. Te agai 5 nai saibaso da, teda agai te 6 te tama nai wei ponobaso usu dao. 6 Te sipsip omai me deli agai te prisba sela pelama, te aga yali kolesaga sia somainogo te Genuai Bidiba ofa eyu dola palobo sę yao. Prisgo agabolo walama, te wiegi yai sipsip mu sao po wao, te keni kenigo aga tigi me dolisąwai selama sesao. Tama hasia bolo prisgo te bidigo sesebo sipsip abelabo mone nogiyu dąį ilao. Tama bidigo te sipsip tiwai te prisba selasa asao. 7 Tama prisgo te bidigo sęgę sela sąyu, te Genuai Bidiba ofa ebaso, tama Godigo agai sęgę sela sąwaibao,” po wai dao. *Nam 5:5-8

8 Genuai Bidigo Mosesbolo te tiwai po wali, 9 “Nago te siaba tigidali ulubo ofa ebo bomai po te Aron aga ogomani dabe daliba te po walao. Augwaligo te ofa ebo nai te altaba ulama, te isigo dedubadi, te be posoboba usu nao. Te sia bogoli idubadi, te sula somainu me elamu dao. 10 Nosali prisgo te pęwadage trausis te augwa wiegi yai nami ugwago nigai trausis gudama, tama te bobage tagalalubo ugwa me munama, te aga altaba pelama, te keli sao, te ili yai ofa elalubo madi, te alta pąde tǫba gealuao,” po wai dao. 11 “Nosali aga gudali ugwa hasegelama, te sia dali keli selama, te pesage nigali buluba sela solama, te eno gedude meda meni yai pesage me deliba muao. 12 Tama te altade nogani sia sesemane didumainao, te munu me sula sągio. Tigidali side kigamu prisgo te sia nogonama, tama agai te ofa yabo kibu hasa dabe selama, te siago tigidali domainogo siaba ulaibao. Te deli haliga pedalubo ofa yabo kibu ili selama, tama te siaba uluyu yao. 13 Sesemane sogo te altade sia ula idumainao. Dagego te sia sula somainogo me elamu dao,” wali.

14 Te Genuai Bidigo Mosesbolo te po walima, te Israel dabeba te tiwai po omainu yali, “Te wit ulubo ofago bomai po e tiwai. Te Arongo hanigo pris me deligo te ena Genuai Bidiba te wit ulubo ofa mao, te alta pąde yao. 15 Tama prisgo te dwasianu plaua te augwaligo wel muai sobadi, te ofa wiegi yai denami ilabo pauda tigidali sao,” wali. “Tama agai te tigidali te alta siaba tigidali ulao. Te dwasianu ofago te tigidali ofa dąį ilibao, te enaba augwaligo mobao. Tama eno te ofa denami odama, eno godolo homu elama, bugai homu yaibao,” wali. 16 “Te plaua me badu munalubaso da, te pris dabego tuiyąo. Augwaligo te plaua selama, te yis meni yai bret nigilama, te augwaligo eno Ugwa Be mesalode tuiyąo. 17 Augwaligo te plaua dali te yis dali taluama te bret ulamuo. Augwali odolali ulao, magi baso meni, te plaua te eno nai mu tama, te sęgę sela sąbo ofa tiwai, me te bidigo yali dwai sę silimainogo ebo ofa tiwai ebao. Tama eno te plaua dabe te prisba dąį ilali. Te ofa ebo naigo te augwa me badu somainogo ebo dao. 18 Tama te Arongo hani pris bidi dabego te bret tumainao. Augwaligo te ebo ofade te Israel dabego enaba ofa ebo nai dabego somainao. Sesemane sesemane sogo nosali, te Arongo hani bidi dabego te ofa ebo nai me badu munalubo te augwaligo somainao. Tiali goli, te gasa bidigo diąwani ma te nai me deli te tuabo ofaba dagana sobaso da, teda te bidi ma te nai te habu mu selama elalueibao,” wali.

19 Genuai Bidigo Mosesbolo te tama po wali, 20 “Te Arongo hani pris dabego te augwali gesi sogo mu hasia te pris sę sabo side, augwaligo te ofa me deli yao,” po wai. “Te bidi me deli augwaligo pris pedalumainogo augwaligo te ni oliv wel aga toboluba geleyu ebo side da, teda agai ofa enabolo yao. Agai te kilogram deli yai wiegi yai plaua deli sao, te wit ulubo ofa tiwai usu nama yao, te pedai me badu kigamu ofa eyu te me badu pedai te giliga dega sigulubadi yao. 21 Agai te plaua dali ni oliv wel dali begelama, te praipende bugagia ulao. Nosali agai pepedama, te enabolo mao, Genuai Bidiba. Tama eno te ofa ebo denami odama, te eno godolo elama, bugai homu yaibao. 22 Nosali nosali te Arongo hani bidi dabe augwali te hetpris pedelaibao, teda augwaligo te tobage ofa enaba yao. Te augwaligo te siaba tigidali domainu ulubo ofa emainu elama, te keli naga elalumainao. 23 Te pris dabego te augwa digi sesali te wit ulubo ofa dwasianu me tugio. Augwa te siago tigidali domainu sula tagalao weyu yaibao,” wali.

24 Genuai Bidigo Mosesbolo te tiwai po wali, 25 “Nago te Aron aga ogomani dabe daliba te sęgę sela sąbo ofago bomai po walao. Te bomai po e tiwai dao. Augwaligo te sęgę sela sąyąbo ofa yabo kibu dabe te eno gedude elibaso, te usu yaibao. Augwaligo te kibu elama, te ofa eyu, tigidali siaba ulama dela pabo pesagede te kibu elao. Te eno ofa tedali mu ebao, te habu mu selibo dao. 26 Prisgo te sęgę sela sąbo ofa yali, agai digi te kibu mi eno Ugwa Be mesalode tumainao. 27 Te pris nogi elalusąbo bidigo, ma te magi nai me deligo te ofa ebo kibude diąbaso da, teda te nai me ma te bidi te eno nai mu tama pedalumainu elama, te habu selalumainao. Te kibu kaneme te name ugwa me deliba tulalubaso da, dagego te name ugwa eno Ugwa Be obo tomode ąį telayao,” wali. 28 “Te prisgo te meme mi te tǫgo nigali sospen senede ulubaso da, teda nosali agai te sospen sene aluao. Tialima, agai te brasgo nigai sospende ulali da, teda nosali agai te sospen ąįgo tedelama, bugagia holobo naigo brasim yao. 29 Mena pris hani bidi dabego homu godolu eyu, agai te ofa ebo kibu mi tuainu eyu da, te aga tumainao, magi baso meni, te tobage ofa te eno nai mu dao. 30 Tiali goli, te hetprisgo te ofa ebo kibu kaneme me badu selama, te eno Ugwa Be tomoba pelama, te sęgę sela sąbo sę ebaso da, teda te pris dabego te ofa ebo nai kibu mi me tulamuo. Augwaligo te isiba tigidali ulama, dela silama, te keli naga elalumainao,” te po wai dao.