1 Genuai Bidigo Mosesbolo e tama tiwai po walali, 2 “Te Israel dabebolo te po pusao, te oiyabe yai bidi dabe me, te kenide keni wę bole ebo bidi dabe buluba tagala palao, me tigide wę me te kaneme augwaligo tigide pedalubaso, me te bidi isaide nogo tuali bidi dabe me, te tobage we bidi eno gedude wiegi yai menio. Tama augwali te dwai augwa tigide elaludubadi, te bidibo pesage nigilama, bidibo pesage taga pelama, digibulu gana pomainu yao. 3 Ena te eno we bidi bidalubo pesagede ena me tede bidibo dao, tama tialima, nago te eno gedude dolo isąwai we me bidi me te dįą siyu, te buluba tagala palao. Tiyu, augwaligo te bidi bidibo pesage eno gedude meda ilabuo,” wali. 4 Tama te Israel dabego Genuai Bidigo Mosesbolo wali po wali dolo tama yali, tama augwaligo te tobage we bidi dįą selama, te bidi dabe bidalubo pesagede buluba tagala palali.

5 Tama Genuai Bidigo Mosesbolo 6 e tama tiwai po te Israel dabebolo pusa mao po wali. Agai e tama po wali, “Te bidi me we deligo ena tudiba sąnama, tama agai gasa bidi me we dali dwai kolesaga ebaso da, 7 teda agai aga yali dwai kolesaga wei ponoyu abelemainao, te sęgę sela sąmainu yao. E tama tiwai yao. Agai te aga abagigo te 5 kina wi sobaso da, teda agai te 5 kina ma wei ponoyu, tama me wan kina me manao. 8 Tiali goli, te mone sabo bidi isai baso me, ma aga ama dabe me meni baso, ma aga ogwa meni baso da, teda te mone mabo bidigo ena Genuai Bidibolo momainao, tama te pris bidi dabego somainao. Tama me agai sipsip kibu omaigo ofa nai menama, aga dwai sęgę sela sąmainao. *Prs 6:1-7 9 Tama me te Israel dabego wiegi yai nai seselama, enaba sesebaso da, teda te pris dabego augwaligo nogode saibao. 10 Te tigidali ofa mabo nai dabe te pris bidi me deliba mobaso da, teda te pris bidi aga somainao,” wali.

11-14 Te Genuai Bidigo Mosesbolo te po te Israel dabebolo mao po wali, Genuai Bidigo e tama po wali, “Te bidi me aga homugo agai we te gasa bidi dali piali homu ebaso, tama te we eno gedude dwai meda yai tiwai pedalubaso me, tama te bidigo konesąma ebaso, te mu po yaliwe, ma tibo po yaliwe konesąma elama, me ma te wego pusisąma eyu, tama me gasa wego me bidigo me susą ebaso, tiali goli bidigo aga we dali dwai homu ebaso da, 15 teda te bidigo aga we te pris bidi pageba odasa pao. Tama me, te bidigo te 1 kilogram plaua te rais baligo nigai, te ofa nai tiwai sela pao. Tiali goli, agai oliv wel te ofa naiba gelamuo, me agai te wiegi yai denami holobo pauda me teba me gelamuo, magi baso meni, te ofa da te bidigo homugo aga wego dwai kolesaga yaliwe homu ebo ofa dao. Teda te agai ofa yali te augwaligo konemainogo, te wego te dwai kolesaga yaliwe ma meniwe, augwaligo konemainogo,” wali.

16 “Teda te pris bidigo te we eno geduba dodolagasao, ena Genuai Bidi, te alta sai pagede. 17 Tama te pris bidigo te habu selai wę te tǫgo nigai seneba gelao, tama aga eno ugwa be suiyamede elalubo tǫ hogomu meba selama, tama te wę dali taluao, tama te wę ha yaibao. 18 Tama te we eno gedude me dolalubadi da, te pris bidigo te wego tobolu haluali ugwa sela sąnama tobolu nisi olo tagalao, tama tobolu nisi olo elalumainogo yao. Tama pris bidigo te bidi aga homugo aga we dwai sę elama, gasa bidi dali piali da homu ebo bidigo ofa yali plaua selama, tama te plaua te we nogoba tolomainao. Tama pris aga digi te ha wę tǫ sene tolalumainao. Te węgo te dwai kolesaga yali we bidi dabe dolobo dao. 19 Tama pris bidigo eno gedude bomai po deli me weyu, te pris bidigo te webolo e tama po walao, ‘Te nago dwai kolesaga bidi me dali yai meni wida, teda te dwai sę yali we bidi dabe dolobo węgo nage dologobeo. 20 Tiali goli, nago bidi me deli dali dwai kolesaga yai wida, teda nage Godigo gedude meda yali, tama nage dolaibao.’ Te pris bidigo te po te webolo wao. 21 Tama pris bidigo po geninama weyu, e tama po wao, ‘Tialima, nago te sę mu tama yai da wida, te Genuai Bidigo nage dwai olo nai tiwai ilaibao, te we bidigo gedude, tama agai nago tabi bǫ delama, tama nago nai dagana somainu yaibao. 22 Tama te dwai sę yali we bidi dolobo wę nago tabi tomoba pelama, tama nago tabi bǫ delama, naga nai boga somainu ilaibao,’ pris bidigo te po waibao. Tama te wego e tama po wei ponomainao, ‘Te dolo dao. Genuai Bidigo te tama timainao.’ Wego te po waibao,” wali.

23 “Tama pris bidigo te po te pepade me asęnama, tama te asęnama pen wę te ha ebo wę seneba tulao. 24 Nosali te pris bidigo te wę te webolo menama, te wego te wę tulama, ha emainao, te agai haligade, me aga tigi dene dwai mu yaibao. 25 Tiali goli, hasia bolo te pris bidigo te ofa yali plaua te wego nogode ma siyu bolo yao, tama ugwaba tulama, tama hogolama, iba eda eyu bolo yao, ena Genuai Bidi gedude. Tama nosali agai te alta saiba sela pao. 26 Tama agai te dwasianu plaua selama, tama alta saide ulubo ofa tiwai uluyu, te ofa sa muao. Tama nosali agai te ha ebo wę te wego tumainu yao. 27 Tialima, te wego bidi me deli dali dwai sę yai baso da, teda te wę Genuai Bidigo gedude dwai dao, tama aga tigi dene genuai mu ilama, tama agai tabi bǫ delama, tama aga nai boga saibao. Tama aga hanigo gasa bidi dabe dali dwai po wainogo da, augwaligo e tama po waibao, ‘Godigo te we dolali yali gilama, nage me dolomainao,’ te po waibao. 28 Tiali goli, te wego dwai kolesaga isąwai da, teda aga eno gedude wiegi yai dao, tama te węgo aga me dologobeo. Menio. Te nosali aga tabi elama, wai sabo usu yaibao,” wali.

29 “Ma, te wego gasa bidiba me dwai kolesaga yali da, tama bidigo homugo aga wego dwai kolesaga yali dao homu elama, aga we dali dwai homu ebaso da, teda dagego te bomai po wali piąo. 30 Tama me dagego bidigo aga wego bidi me deli dali dwai kolesaga yali dao olama, olo dali dwai homu ebaso me wali piąo. Tiali, bidigo te tama homu eyu da, teda agai te we odasa ena Genuai Bidi eno geduba dolalugi pao, te alta sai pąba. Tama pris bidigo te tigidali kolesaga emainao. 31 Tama te we aga bidigo po sęgę page meni yaibao. Tiali goli, te we aga sęgę elaluali da, teda aga te yali dwai kolesagago sęgę tolomainao,” Genuai Bidigo Mosesbolo te po ola mani.