40
Yehoba I Ba Petupatupa Limena Nihi Pamilil
Yehoba i baek Mosese elana i ba, “Weikena ana lan houwan elana Petupatupa Limena nu pamilil.” (puna 1-15)
Petupatupa Limena Hi Pamilil
16 Mosese bugul gegewena i ginolil i ola Yehoba wana baaba. 17 Inoke baliman eluwana ana waikena telipuna ana lan houwan elana Petupatupa Limena hi pamilil. 18 Mosese baba ona puliya ali abamisiyo i telel, yaka baba ona i pamililil ge epagapagasisi i pasolal.*Liwanina nu kite 36:20-34 elana. Yaka abwe kaliko bolo limi ana abatuk ge ana babatomwa ali kokola i pamilil. 19 Inoke kaliko labui i anal limi o pwatanaa, yaka epahabobu labui*Kaliko labui ge epahabobu labui liwaniliya nu kite 36:8-19 elana. i anal pwatanaa al. He i ginol i ola Yehoba wana baaba.
20 Yaka Mosese pat mamanana sasapona labui i ahe i teli Bateli ana Dedewaga gamwanaa. Dedewaga ana kewa i pahola ge ana heguna, gegi ana abayakiyakil, i teli pwatanaa. 21 Inoke i nanatukana Limi gamwanaa, yaka kaliko mamanana i pakuki ge Bateli ana Dedewaga i kaus, i ola Yehoba wana baaba.
22 Teibol i nanatukan al Petutupa Limena gamwanaa, i teliya limi labena aluwabwa kaliko mamanana tolinaa. 23 Inoke pwalawa bwabwalena i teli pwatanaa Yehoba matanaa, i ola Yehoba wana baaba.
24 Yaka odam ginebi abaliya i nanatukan Petupatupa Limena gamwanaa, i teliya limi labena yavana, teibol i awoni. 25 Inoke odam i tonil Yehoba awonaa, i ola Yehoba wana baaba.
26 Abatonton gold hi ginoliya i nanatukan Petupatupa Limena gamwanaa ge i teliya kaliko awonaa. 27 Inoke bugul bwaleliya waiwaisana i ton pwatanaa, i ola Yehoba wana baaba.
28 Yaka kaliko i pakuki limi ana abauluulutuk elana, 29 inoke abapowon i teliya awonaa. Yaka eliyana bwasumu ge pwalawa i powonagil pwabwaligel, i ola Yehoba wana baaba.
30 Yaka abaulul i teliya Petupatupa Limena ge abapowon ali nuwanuwana, ge wewel i hol. 31 Inoke Mosese ge Eloni alonau natunau hi papatuwalali nimaliya ge aeliya hi ulula. 32 Sauga ebo nihi ulutuka Petupatupa Limena elana o ebo nihi na abapowon elana, inoke nimaliya ge aeliya nihi ul ga, i ola Yehoba wana baaba.
33 Yaka Mosese Petupatupa Limena ge abapowon i gana pipinil, ge kaliko etega i pakuki ana abauluulutuk i kaus. Inoke Mosese tuwalali gegewena i pwamowasi.
Yaluyalu Petupatupa Limena Pwatanaa
34 1Kin 8:10-11; Ais 6:4; Isik 43:4-5; Pan 15:8 Yaka yaluyalu Petupatupa Limena i yabom ge Yehoba mwananalina namanamalina i pakalaopop. 35 He Mosese nige bosowaina ni ulutuka Petupatupa Limena gamwanaa, kaiwena yaluyalu i lau ge Yehoba mwananalina namanamalina i pakalaopop.
36 Isileli wali minawanawa gegewena gamwanaa, sauga ebo yaluyalu ni ha ge ni noegon Petupatupa Limena pwatanaa, yaka Isileli nihi galaegon ge nihi toulil. 37 Yaa ebo nige ni haha, he nige nihi gagalaegon. 38 Sauga gegewena wali minawanawa elana, lana yaluyalu toto Yehoba i miminaa nihi kite Petupatupa Limena pwatanaa, ge bulina nihi kite ginaha i tautau yaluyaluwa.