Yosuwa
Baaba Houwan
Buki “Totagil” i wasaan Mosese Isileli i nulil tagilagil Itipita. He Isileli Yehoba nige hi aabulilek-an bubun, inoke ali lahi hi nonopilpil ula kekevana elana baliman poti. Ha bolo hi tagilem Itipita gegewel hi aliga haba, bolo hi mina iyai te Yosuwa ge Kelebi.
Buki ya i liwanan Mosese wana yaomal enaa, Yosuwa Isileli i nulil ge hi tuk panuwa Kenani hi ahe (awalehina 1-12). Yaka abwe Kenani ana labi ona hi gebal un elal ge hi miminaa (awalehina 13-21). Buki ana abapwamowasi eliyana Yosuwa gamagalau i ba pagasisel Yehoba wana kamwasa nihi toulil bubun ge nihi tubwi gagasisi eliyana, bahi nihi kukululuek yabowaineyau gegetogal elal (awalehina 22-24).
Nuwatu bwabwatana buki ya elana te sauga Yehoba wana gamagalau hi ginol i ola wana baaba, inoke i lohaveyan kaiweliya (10:14). Yehoba iya Isileli ali topihigelgel i teli nimaliyaa inoke hi pakokovel (10:12,19; 21:44).
Isileli Hi Tuk Kenani
1
(1:1–5:12)
Yehoba wana Ba Pagasisi Yosuwa elana
Yehoba wana totuwalali Mosese, ana tolabe Yosuwa Nan natuna. Mosese wana yaomal enaa, inoke Yehoba i baek Yosuwa elana i ba, “No totuwalali Mosese iyaka i aliga. Inoke sauga ya, alomwau Isileli gegewel nuku lovivina wewel Yolidani nuku kalapanet-an ge nuku nok labi toto ya pepewa eliyamiu. Log 11:24-25 Hauna labi nuku nawaan, he iyaka ya talamwan eliyamiu, i ola no bateli Mosese elana. Bilibili toto na pewa ni telipunaa ula kekevana elana ni tukik ni na ana siga Lebanoni oyana elal. Wami bilibili ni sikala wewel bwabwatana Yupeleitis elana. Hiti wali labi gegewena ni ahe ge ni lok ni na ana siga Hoga Mediteleiniya. Log 31:6,8; Hib 13:5 Nige gamagal etega ni papakokovewa yawalim miminana elana. Na labewa ni ola Mosese ya labe. Nige na eguluwagiwa, alou owa ya sauga gegewena.
Log 31:6,7,23 “He nu gasisi ge atem ni matuwa, kaiwena owa gamagalau ya nu nulil ge nuku na nuku minaa panuwa toto ya bateli tubumiyau elal. Iyai te nu gasisi ge atem ni matuwa. Nu matahikagiwa logugui gegewena toto no totuwalali Mosese i pewa nu henapuan. Nu toulil pasapu, bahi nu liliolak labem awomwa o ebo gegebamwa, inoke hauna labi nu noek ge hauna ebo nu ginol, nasi ni waisi. Nu nuwahikan Logugui ana buki ya nu vasili hikahikani. Lana ge bulina nu minuwanuwatu-an, inoke nu matahikagiwa ge logugui gegewena toto hi leli lowan nu henapuagil. Inoke nu mibubun ge hauna gun ebo nu ginol nasi ni waisi hot. Iyaka ya ba haba eliyam te nu gasisi ge atem ni matuwa. Bahi lovakun ge bahi ati bwanabwana, kaiwena hauna labi nu noek, nau Yehoba wam Yabowaine alom ya.”
Yosuwa wana Baaba Un Lubeni, Gada ge Un Manasa Awalehina elal
10 Yosuwa i baek un maisena ge maisena wali tohouwa elal i ba, 11 “Ku nopain abaholaviya ge nuku baek gamagalau elal nuku ba, ‘Wami bugubugul ge amiu nuku lovivina-an, kaiwena lan eton ya i mina abwe ta egon, Wewel Yolidani ta kalapanet-an ge ta nok labi toto Yehoba wala Yabowaine i pepem wala panuwa.’ ”
12  AlGe 32:28-32; Log 3:18-20; Yos 22:1-6 Yaka i baek al un Lubeni, Gada ge un Manasa awalehina elal i ba, 13 “Ku nuwahikan Yehoba wana totuwalali Mosese wana baaba eliyamiu i ba, ‘Yehoba wami Yabowaine iyaka i paveyaho-agimiu, ge bilibili toto ya Wewel Yolidani labi leunati i pewa eliyamiu wami panuwa.’ 14 Natumiyau ge wami bwasumu nihi miminaa te wami panuwaa e, yaa komiu tolohaveyan gegewemiu wami elohaveyan nuku bugulan, inoke nuku houwa-agima ge wewel Yolidani ta kalapanet-an. Ama talimiyau nuku labema ga 15 ana siga Yehoba wala Yabowaine ni paveyaho-agima ni ola iyaka i ginol eliyamiu, ge bilibili toto Yehoba i pepem naha ahe ge naha minaan. Enaa abwe nuku sikalim wami panuwa ya elana, toto Yehoba wana totuwalali Mosese i pewa eliyamiu Wewel Yolidani labena leunati.”
16 Inoke Yosuwa anana hi lahe hi ba, “Bugul gegewena naha ginol ni ola hauna toto iyaka u baunan eliyama. Ge ebo hauna labi elana nu patunama, nasi naha nok. 17 Wam baaba naha henapuan ni ola valila Mosese wana baaba ha henapuan. He ha awanun ya te Yehoba wala Yabowaine ni minaa eliyam, ni ola valila i minaa Mosese elana. 18 Henala ebo ni awatautau-agiwa ge nige wam baaba ni hehenapu-an, he ni aliga. Iyai te nu gasisi ge atem ni matuwa.”

1:3: Log 11:24-25

1:5: Log 31:6,8; Hib 13:5

1:6: Log 31:6,7,23

1:12: AlGe 32:28-32; Log 3:18-20; Yos 22:1-6