4
Limi ana Totaltal Hi Pihigelgel-agil
1 Un Yuda ge Beniyamina ali topihigelgel wasa hi hago te Yudiya bolo valila hi mibwabwali labi Babiloniya heliya iyoho Limi Bwabwalena etega hi taltal Yehoba Isileli wali Yabowaine kaiwena. 2 Yaka hi nem Selababel ge tini ona wali tohouwa elal hi ba, “Naha labemiu alomeyau komiu ta taltal, kaiwena ama al ge ha kukululu wami Yabowaine elana i ola te komiu. Powon ha awaawaginol elana, i telipunaa sauga toto Asiliya wali kin Esalhadon i ahema ha nem labi ya elana, ana siga sauga ya.”*Sauga Asiliya abalogugui Isileli labi Sameliya hi pakokovel, yaka labi getogal gamagaliliyau enuna hi ahe tukagil hi minaana Sameliya elana. Heliya hi kukuluek totoliya wali yabowaineyau elal, yaa hi tapwalolo al Yehoba elana kaiwena hi ba iya labi o ana yabowaine.
3 Yaa analiya Selababel, Yesuwa ge Isileli ali tini ona wali tohouwa hi lahe hi ba, “Nige bosowaina alomeyau komiu Yehoba wana Limi Bwabwalena ta tal. Ama totoma abwe naha tal Yehoba Isileli wama Yabowaine kaiwena, ni ola Pesiya wali kin Sailusa wana logugui i baunan eliyama.”
4 Inoke gamagalau bolo hi miminaa labeliyaa Yudiya yayaluwaliya hi pwapweyata ge hi palovakun-agil yaka hi bakuhu taltal. 5 I ola al, mani elana labi o ana tologugui nuwaliya hi gove yaka hi pihigelgel Yudiya elal ge wali tuwalali hi papulowan. Wali ginol i olaola ya to kin Sailusa wana logugui ana sauga bwalibwaligena elana, ge i na ana siga Pesiya wali kin Dalaiyas wana sauga logugui gamwanaa.*He baliman ana yapu tabam 10-15 te hi bahuku limi taltal, i na ana siga baliman 520 M.K. He kin etega al i gan alana Kambises i tologugui Sailusa ge Dalaiyas ali hawawala. Puna 24 al nu kite.
Topihigelgel Enuna Yelusalema ana Tal Papasikal Hi Pihigelgel-an
6 He baliman hi gewi i mowasi, kin Seksis wana sauga logugui ana abatelipuna elana,*Limi Bwabwalena ana taltal hi telipuna-an enaa, baliman ali gewi 50 abwe kin Seksis wana sauga logugui i telipuna baliman 486 M.K. elana. He puna 6-23 nige i liliwanan pihigelgel toto i gan sauga Limi Bwabwalena hi tal pasikal, yaa pihigelgel enuna al liwaniliya sauga toto Yudiya nuwaliya panuwa ana gana nihi pahe pasikal. Yuda ge Yelusalema ali woliwoli ana leta etega ali topihigelgel hi leli yaka hi patuna kin elana.
7 Baliman hi gewi al ga i mowasi, kin Ataseksis wana sauga logugui gamwanaa*Kin Ataseksis i tologugui baliman 465-424 M.K. elal. He Limi Bwabwalena ana taltal hi telipuna-an enaa, baliman ali gewi 70 ge pwatanaa abwe liwan ya ana sauga., yaka Bislam, Mitledat ge Tabil aloliyau wali pan totuwalali leta etega hi patuna i na kin Ataseksis elana. He leta o pana Alameik elana hi leli ge abwe ana baaba hi pasikal kin kaiwena.*Esila 4:8–6:18 hi leli pana Alameik elana, nige pana Hibilu i oola. 8 Tologugui Lehum ge toleleli Simsai te leta o hi leli Yelusalema ana tomina wasaliya ge hi patuna kin Ataseksis elana. He ana baaba i ola hiwe:
9 Atema owa kin. He ama, tologugui Lehum ge toleleli Simsai, alomeyau toyatala ge wama pan totuwalali ona, ge alomeyau al Pesiya, panuwa Elek, Babiloni ge Susa, labi Elam gamagaliliyau, 10 ge boda gegewel al bolo valila Asiliya wali kin alana bwabwatana Asulbanipal i ahemeya wama panuwa ona elal, i telema panuwa Sameliya ge panuwa ona al elal wewel Yupeleitis labena leupai.
11 Leta ya i nowa kin Ataseksis elam, i neem ama wam totuwalali bolo ha minaana wewel Yupeleitis labena leupai.
12 Nuwama owa kin nu atena te Yudiya bolo hi egonana ei ge hi nem eliyama, iyaka hi na wali panuwa Yelusalema hi tatal pasikal, panuwa o wasana i bwata heliya toawatautau ge toginol naknak. Heliya iyoho gana ana wauwau hi abububun ge ana hawawal ona hi kakaukaus.
13 I ola al, nu atena te ebo panuwa ya nihi tal pasikal ge ana gana nihi pahe haba, nasi nige takis tomaha ona nihi pwapwamola eliyam, yaka wam mani nige ni bwabwata nu pwapwawa. 14 Ama ha bateli naha totuwalali elam ge wama bateli o ha nuwahikan, nige nuwama i oola heliya owa kin nihi papuluwawi-agiwa ni ola to. Heiya te kaiwena leta ya ha leli ge wam wasa ha pewa ei. 15 Ha nuwatu te nu ba wam totuwalali nihi loya labi ei ana kin houhouwel wali tuwalali wasana ana buki ona gamwaliyaa. Nasi nu pwawa te panuwa ya heliya toawatautau ge pulowan hi gewi hi ginolil kin ge gavana ona elal, i telipunaa tubuliyau houhouwel wali sausaugaa i nem ana siga sauga ya. Heiya te kaiwena wali panuwa, Babiloni hi apapanak-an. 16 Wam wasa naha pewa te ebo panuwa ya nihi tal pasikal ge ana gana nihi pahe haba, nasi nige al wewel Yupeleitis labena leupai nu lologugui-an.
17 Inoke wali leta lahena kin Ataseksis i patuna i ola hiwe:
Leta ya i nowa tologugui Lehum ge toleleli Simsai eliyamiu, alomiyau ge wami pan totuwalali ona bolo ku minaana Sameliya ge panuwa ona elal wewel Yupeleitis labena leupai.
Ya mulolu eliyamiu.
18 Leta toto ku patunam iyaka hi vasili ge ana baaba hi pasikal ya hago. 19 Ya ba yaka no totuwalali hi loya, ge hi pwawa te panuwa ya wali awatautau liwanina i yapu kin ona elal. Tunahot heliya toteli gegetoga ge toginol naknak. 20 Valila kin gasigasisel hi tologugui Yelusalema, yaka wewel Yupeleitis labena leupai hi logugui-agil ge hi ba takis tomaha ona hi pwapwamola elal. 21 He nuku ba bolau ei tuwalali nihi paveyaho, yaka panuwa ei bahi nihi tatal pasikal ana siga ebo na baya. 22 Nuku matahikan bahi nuwatu ya nuku kikita luwai, eba nak ya ni bwata yaka nau kin no tuwalali ni papulowan.
23 Sauga kin Ataseksis wana leta hi vasili Lehum ge toleleli Simsai aloliyau ge wali pan totuwalali ona elal, yaka etimwawa hi na Yelusalema ge alona wali gasisi Yudiya hi paveyahoil bahi panuwa ana gana nihi papahe al.
Hi Telipuna Limi Bwabwalena Hi Taltal al
24 He iyaka hi bakuhu Yabowaine wana Limi Bwabwalena ana taltal Yelusalema elana,*Limi Bwabwalena ana taltal liwanina puna 24 elana i tubwiem puna 4 ge 5 elana. ge i miola o ana siga Dalaiyas, Pesiya wali kin wana sauga logugui ana baliman labuina elana.*Kila wala kalenda elana baliman 520 M.K. te taltal hi telipuna-an al.
*4:2: Sauga Asiliya abalogugui Isileli labi Sameliya hi pakokovel, yaka labi getogal gamagaliliyau enuna hi ahe tukagil hi minaana Sameliya elana. Heliya hi kukuluek totoliya wali yabowaineyau elal, yaa hi tapwalolo al Yehoba elana kaiwena hi ba iya labi o ana yabowaine.
*4:5: He baliman ana yapu tabam 10-15 te hi bahuku limi taltal, i na ana siga baliman 520 M.K. He kin etega al i gan alana Kambises i tologugui Sailusa ge Dalaiyas ali hawawala. Puna 24 al nu kite.
*4:6: Limi Bwabwalena ana taltal hi telipuna-an enaa, baliman ali gewi 50 abwe kin Seksis wana sauga logugui i telipuna baliman 486 M.K. elana. He puna 6-23 nige i liliwanan pihigelgel toto i gan sauga Limi Bwabwalena hi tal pasikal, yaa pihigelgel enuna al liwaniliya sauga toto Yudiya nuwaliya panuwa ana gana nihi pahe pasikal.
*4:7: Kin Ataseksis i tologugui baliman 465-424 M.K. elal. He Limi Bwabwalena ana taltal hi telipuna-an enaa, baliman ali gewi 70 ge pwatanaa abwe liwan ya ana sauga.
*4:7: Esila 4:8–6:18 hi leli pana Alameik elana, nige pana Hibilu i oola.
*4:24: Limi Bwabwalena ana taltal liwanina puna 24 elana i tubwiem puna 4 ge 5 elana.
*4:24: Kila wala kalenda elana baliman 520 M.K. te taltal hi telipuna-an al.