30
1 Sauga Letiyeli i atena iya nige bosowaina Yakobo natuna etega ni ab, inoke talina Leya i lamwa pulowanan. Yaka i baek Yakobo elana i ba, “U paliyanagau. Ebo nigeya, he binimala na aliga ya!”
2 Inoke Yakobo Letiyeli i hugaan ge i baek elana i ba, “Nau nige Yabowaine i oola. Iya te i kausiwa ge nige u aab!”
3 Yaka Letiyeli i baek elana i ba, “No totuwalali loloyowanina yovana Bilha hiwe. Alom nuku kenukenu, inoke ebo ni liyan ge ni ab, wawayau na awa natunagil. Yaka iya eliyana natuwau nihi gan.”
4 Inoke Letiyeli Bilha i pek Yakobo elana i tabwa lagona al. Inoke alona hi kenukenu, 5 yaka i liyan ge Yakobo natuna melutau etega i ab. 6 Inoke Letiyeli i ba, “Yabowaine iyaka i awa sapusapu-agau, ge no awanun i hago, yaka natu melutau etega i pem.” Inoke alana i tun Dani.*Pana Hibilu elana alan “Dani” ana sapu te “i awa sapusapu-agau.”
7 Bilha i liyan al, yaka i ab palabuina Yakobo natuna melutau. 8 Inoke Letiyeli i ba, “Ya logasisi nabi taliu elana ge ya lake.” Inoke alana i tun Napitalai.*Pana Hibilu elana alan “Napitalai” ana sapu te “ya logasisi.”
9 He Leya i atena te iya iyaka ab i pahanateli-an, inoke wana totuwalali loloyowanina yovana, Silpa, i pek Yakobo elana i tabwa lagona al. 10 Silpa Yakobo natuna melutau etega i ab. 11 Yaka Leya i ba, “No waisi ya pwawa te.” Inoke alana i tun Gada.*Pana Hibilu elana alan “Gada” ana sapu te “no waisi ya pwawa.”
12 Silpa i ab palabuina Yakobo natuna melutau. 13 Yaka Leya i ba, “Ya yaliyaya hot! Nasi yowau nihi awa yaliyaya-agau.” Inoke alana i tun Aseli.*Pana Hibilu elana alan “Aseli” ana sapu te “yaliyaya.”
14 He witi ana lovetomwa ana sauga elana, Lubeni i na uleya yaka mwawin alana mendeleik*Mendeleik enona hi patuwalali wali esawasawal, tage yowau bolo nige hi liliyan ni label nihi liyan. enuna i pwawal. Inoke enona enuna i bugulan ge i na i pek hinana Leya elana. Yaka Letiyeli i awanun Leya elana i ba, “Tab bosowaina mendeleik enona toto natum i pwawa, enuna nu pem elau?”
15 Yaa Leya i baek elana i ba, “Lagou iyaka u oe. Nige mananana, yaka nuwam al mendeleik enona toto natu i pwawa nu ahe?”
Yaka Letiyeli i baek elana i ba, “Ebo mendeleik enona toto natum i pwawa nu pem elau, inoke molana nasi bulina alom ge Yakobo nuku kenu.”
16 Kokoyavi o elana, Yakobo i sikalem uleya, inoke Leya i na i pwawa kamwasaa ge i baek elana i ba, “Nasi bulina alou owa ta kenu, kaiwena mendeleik enona toto natu i pwawa, eliyana iyaka ya pwamolawa.” Inoke bulin o Yakobo alona ge Leya hi kenu. 17 Yaka Leya i liyan ge i ab panimala panunana Yakobo natuna melutau, kaiwena wana awanun Yabowaine i hago. 18 Yaka Leya i ba, “Yabowaine mola waiwaisana i pem, kaiwena valila no totuwalali yovana ya pek lagou elana.” Inoke alana i tun Isaka.*Pana Hibilu elana alan “Isaka” ana hago i ola “mola waiwaisana.”
19 Yaka abwe Leya i liyan al ge i ab pasikisina Yakobo natuna melutau. 20 Inoke i ba, “Yabowaine o mulolu waiwaisana etega i muloluan eliyau, yaka nasi lagou ni awatauwagau, kaiwena natunau melubolau sikis ya abil.” Inoke alana i tun Sebuloni.*Pana Hibilu elana alan “Sebuloni” ana hago i ola “awatauwan.”
21 Sauga etega al abwe Leya yova etega i ab, inoke alana i tun Daina.
22 Yabowaine nige Letiyeli i nunuluwan, wana awanun i hago yaka i ba bosowaina natuna ni gan. 23 Yaka abwe i liyan ge natuna melutau etega i ab, inoke i ba, “O puluwawi iyaka Yabowaine i ahe yoho.” 24 Ge i ba, “Ya awanun Yehoba natu melutau etega al ni pem.” Inoke alana i tun Yosepa.*Pana Hibilu elana alan “Yosepa” ana sapu te “etega al ni pem.”
Yakobo I Gogomwau Nabi
25 Letiyeli Yosepa i ab enaa, inoke Yakobo i baek Leiban elana i ba, “U talamwagau na sikal no panuwaa. 26 Lagowau kaiweliya ya tovelam nabi eliyam, he nu talamwagil na ahel aloliyau ge wawayau, yaka naha egon. Iyaka u atena te ya loaliga nabi ge ya tovelam eliyam.”
27 Yaa Leiban i baek elana i ba, “Ya awanun eliyam bahi nu eguluwagau. He sula ya ab*Sula abab iya siba ginoginolina etega ge eliyana i bosowaina bugul misusumena ta atena. inoke i pamasal te owa kaiwem Yehoba i muloluagau. 28 He molam u baunan na hago inoke na pwamolawa.”
29 Yakobo i baek elana i ba, “U atena ya te ya tuwalali nabi eliyam yaka wam bwasumu hi lowaisi, kaiwena ya matahikagil bubunil. 30 Valila nige ga ya nenem eliyam wam bwasumu nige hi gegewi, yaa sauga ya hi gewi nabi. Hauna labi ya noek ge hauna gun ebo ya ginol, Yehoba i mumulolu-agiwa. He hauna sauga ge na logasisi alowau natuwau wama waisi kaiwena?”
31 Inoke Leiban i nel Yakobo elana i ba, “Hauna gun na pewa?”
Anana i lahe i ba, “Bahi bugul etega nu pepem. Yaa no nuwatu i ola hiwe. Ebo nu talamwi, inoke na tuwalali vevehe al ge wam bwasumu na matahikagil. 32 He lan ebe na na na nosola wam bwasumu ali yawi gegewel gamwaliyaa, inoke sipi tuwaliya bibikena gegewel, ge goti lelemwal o ebo leituntun gegewel, na teli walel. He bolo o nu pem molau.*Sipi gegewel tuwaliya i wawakeki, ehila ya tuwaliya i biki o ebo biki i mihawahawan tuwaliyaa. He sipi bolo o te tage Yakobo ni ahel. I ola al goti gegewel tuwaliya ali kala maisena, enuna hi gigilala ge enuna hi gonugonu. Goti ehila ya wawakeki i mihawahawan tuwaliyaa, inoke hi lemwalemwa (speckled) o ebo hi leituntun (spotted) o ebo hi gayatomwa (striped). He goti bolo o te tage Yakobo ni ahel. 33 Inoke bwaliga etimwawa nu kite pwawa ebo molau ya ahe paolaolaek o ebo ya kakawi. Ebo goti etega tuwana nige ni lelemwalemwa o ni leleituntun, o ebo sipi etega tuwana nige ni bibiki, nu kiteya no bwasumu ali yawi gamwanaa, inoke nu atena te ya kaome.”
34 Anana Leiban i lahe i ba, “I waisi, ta ginol ni ola wam baaba.” 35 Yaa lan o goti melubolau ge meluyowau bolo wawakeki i mihawahawan tuwaliyaa — bolo hi lemwalemwa, bolo hi leituntun ge bolo hi gayatomwa — gegewel Leiban i ahek yohil, avaliyau sipi gegewel bolo tuwaliya i biki. Inoke i telel natunau bolau nimaliyaa. 36 Yaka alonau ge natunau sipi ge goti hi ahel hi na panuwa etega ali bwaga i gan Yakobo elana, ana yapu i ola lan eton ana nawanawa. He Yakobo Leiban wana goti ge sipi bolo i eguluwagil i matahikagil.
37 Yakobo abwakil alaliya popla, almon ge pelein,*Ebwakil bolo ya, ebo kunisiliya ta puni, he gamwanaa i wawakeki hot. laliya enuna i govel. Yaka kunisiliya i puni hawahawanan ge awalehina i puni teli, yaka wawakeki i masal ge ali awa i palemwalemwa. 38 Yaka ebwakil laliya bolo i puni hawahawanan i pamilil bwasumu wali abaimwim elana, yaka sauga ebo nihi nem im kaiwena, ebwakil iyoho mataliyaa. I pamililiya o, kaiwena sauga ebo bwasumu nihi nem im kaiwena, inoke nihi lolagolagona to. 39 Inoke sauga goti hi lopoipoi, he ebwakil laliya iyoho awoliyaa, yaka natuliyau hi abil hi lolemwalemwa, hi loleituntun o ebo hi logayatomwa.
40 Yakobo sipi i walel abaliya i getoga. Yaka wali sauga lolagolagon elana, sipi i paawona noek wana goti lelemwal ge Leiban wana goti tuwaliya bibikel elal. Yaka sipi hi ab natuliyau tuwaliya i biki. I ginol ola o, inoke iya totona wana bwasumu ali yawi hi gan, yaa nige i tetelel pamaisena alonau Leiban wana bwasumu.
41 He goti meluyowau gasigasisel wali sauga lolagolagon, inoke Yakobo abwakil laliya ni pamilil wali abaimwim elana goti mataliyaa, inoke sauga nihi lopoipoi, ebwakil laliya iyoho awoliyaa. 42 Yaa bolo nige hi gagasisi wali sauga lolagolagon, inoke Yakobo nige abwakil laliya i papamilil mataliyaa. Yaka goti bolo nige hi gagasisi heliya Leiban wana bwasumu, ge bolo hi gasisi heliya Yakobo wana bwasumu. 43 Ginol o eliyana Yakobo i gogomwau nabi. Wana sipi ge wana goti, wana kamel ge wana donki hi gewi nabi, i ola al wana totuwalali bolau ge yowau.
*30:6: Pana Hibilu elana alan “Dani” ana sapu te “i awa sapusapu-agau.”
*30:8: Pana Hibilu elana alan “Napitalai” ana sapu te “ya logasisi.”
*30:11: Pana Hibilu elana alan “Gada” ana sapu te “no waisi ya pwawa.”
*30:13: Pana Hibilu elana alan “Aseli” ana sapu te “yaliyaya.”
*30:14: Mendeleik enona hi patuwalali wali esawasawal, tage yowau bolo nige hi liliyan ni label nihi liyan.
*30:18: Pana Hibilu elana alan “Isaka” ana hago i ola “mola waiwaisana.”
*30:20: Pana Hibilu elana alan “Sebuloni” ana hago i ola “awatauwan.”
*30:24: Pana Hibilu elana alan “Yosepa” ana sapu te “etega al ni pem.”
*30:27: Sula abab iya siba ginoginolina etega ge eliyana i bosowaina bugul misusumena ta atena.
*30:32: Sipi gegewel tuwaliya i wawakeki, ehila ya tuwaliya i biki o ebo biki i mihawahawan tuwaliyaa. He sipi bolo o te tage Yakobo ni ahel. I ola al goti gegewel tuwaliya ali kala maisena, enuna hi gigilala ge enuna hi gonugonu. Goti ehila ya wawakeki i mihawahawan tuwaliyaa, inoke hi lemwalemwa (speckled) o ebo hi leituntun (spotted) o ebo hi gayatomwa (striped). He goti bolo o te tage Yakobo ni ahel.
*30:37: Ebwakil bolo ya, ebo kunisiliya ta puni, he gamwanaa i wawakeki hot.