44
Ikiavɨra Itir God uan gumazamizibar akurvasi
1 Ikiavɨra Itir God ghaze,
“Ia Israelia, ia Jekopɨn anabamɨn adarasi, ia oragh!
Kɨ uabɨ ia amɨsevezɨ, ia nan ingangarir gumazamizibar iti.
2 Kɨ Ikiavɨra Itir God, kɨ fomɨra ian ingarigha ia gamizɨ, ia ikɨzir vamɨran oto.
Ia uan amebabar navir averiabar ikezɨ, me tɨghar ia batamin dughiam, kɨ ian ingarigha deravɨra ian gari.
O Jesurun, ia nan gumazamizibar ikiasa kɨ fomɨra ia ginabagha gɨfa.
O Jekopɨn anabamɨn gumazamiziba, ia nan ingangarir gumazir aghuibar mɨn iti.
Kamaghɨn amizɨ, ia atiatingan markɨ.
3 Aisaia 35:7; Joel 2:28; Jon 7:38; Aposel 2:18Kɨ mati gumazim dɨpam isɨ nguazir dɨpaba puvatɨzibagh ingɨva,
egh dɨpam damightɨ, a nguazir mɨdiaribar ivemaram.
Kamaghɨra, kɨ uan Duam isɨ ian boribagh ingɨva,
ian ovavir boriba deragh me damuam.
4 Eghtɨ me deraghvɨra aghungam, mati grazir garir dɨpaba itibar mɨn ganganiba deragham.
Egh mati, temer faner mɨriabar aghuibar mɨn ganam.
5 Eghtɨ Kantrin Igharazibar Gumazamiziba, men tarazi nɨghnɨzir gavgavim nan ikiam.
Men tarazi kamagh mɨkɨm suam, ‘E Ikiavɨra Itir Godɨn adarasi.’
Men tarazi suam, ‘E Jekopɨn anabamɨn adarasi.’
Eghtɨ tarazi uan agharibar kamaghɨn osiram, ‘E Ikiavɨra Itir God baghavɨra iti darasi.’
Men tarazi suam, ‘E Israelian adarasi.’ ”
Gumazir asebar marvir guabar ingariba, me bar ongani
6 Aisaia 41:4; 48:12; Akar Mogomem 1:8; 1:17; 22:13Ikiavɨra Itir God, a Israelian atrivim,
a men Akurvazir Gumazim, a Ikiavɨra Itir Godɨn Gavgaviba Bar Itim,
A kamaghɨn mɨgei, “Kɨ Ikiavɨra Itir God,
kɨrara kɨ bar faraghavɨra ikia, egh bar gɨn ikɨva abuan ikɨvɨra ikiam.
Ezɨ godɨn tam ua itir puvatɨ.
Kɨrara, kɨ God.
7 Tinara, nan mɨn gari?
Godɨn tam ikɨva, a uabɨ nan damazimɨn uan eghaghanimɨn gun e mɨkɨm.
Egh uabɨ abigh uan otevibar en akagh.
Kɨrara bar fomɨra gumazamizibar ingarigha nguazir kam gatɨ.
Eghtɨ godɨn tam ti guizbangɨra ikɨva, a bar fomɨra otozir biziba ko bizir gɨn izamibar gun e mɨkɨmtɨ,
e bar moghɨra bizir kabagh fofogham.*Hibrun akam deragha vezɨn kamɨn mɨngarim abigha an gun mɨkemezir puvatɨ.
8 Godɨn Araziba 4:35; 4:39; Aisaia 41:22; 43:10-12Nan gumazamiziba, ia nɨgh akongɨva atiatingan markɨ.
Bizir otivamin kaba, kɨ fomɨra dar gun ia mɨkemegha gɨfa.
Ezɨ ia uan damazibar dar ganigha na gɨfo,
egh kotɨn aven ia nan gun mɨkɨm.
Godɨn tam ua itir puvatɨ!
Bar puvatɨ.
Kɨ uabɨra kɨ ian dagɨar ekiamɨn mɨn itima, ia nan aven uari modi.
Kɨ bizir kam bar a gɨfo, a bar guizbangɨra!
9 “Gumazir marvir guabar ingariba,
men ingangariba dagheba puvatɨgham.
Ezɨ nedazir me gara da bagha bar akongezir kaba,
da pura bizir kɨnibar mɨn iti.
Ezɨ aser kabar ziaba fer gumazamiziba,
me mɨtatemɨn aven iti moghɨn, bizitamɨn ganigh a gɨfoghan kogham,
kamaghɨn kotɨn aven me uan asebar akuragh deraghvɨra da bagh mɨkɨman kogham.
Kamaghɨn amizɨ, me onganigh aghumsigham.
10 Me manmaghɨn nɨghnigha, aser kabar marvir guabar ingari?
Nedazir kɨnir kaba, tong bar men akuraghan kogham.
11 Ia gan! Gumazamizir dɨgɨribagh amir kaba, me pura nguazir kamɨn itir gumazir kɨnibara,
egha marvir guabar ingari.
Kamaghɨn amizɨ, gumazamizir marvir guabar ziaba feba,
me bar aghumsigham.
Kɨ ghaze, me bar izɨ nan damazimɨn kotɨn tuifigh.
Bar guizbangɨra, kɨ me damightɨ,
me bar atiatigh bar aghumsigham.
12 “Gumazir ainbar bizibar ingara foziba,
me ainba isa avim garɨgha aser kabar marvir guabar ingari.
Me uan gavgavibar haman suigha ain mɨsogha,
nedazir kabar ingari.
Egha me dar ingarir dughiabar, mɨtiriam men aghɨtɨ
me dɨpaba ko daghebar aman koghtɨ,
men gavgaviba bar moghɨra gevegham.
13 “Ezɨ gumazir temebar nedazibar ingara foziba,
me temem inigh marvir guam akɨrsɨ, an abaragh bar deraghvɨram anekɨrigham.
Egh fɨnfɨnimɨn marvir guar kamɨn nedazim tememɨn bar deravɨra an apan an osiram.
Egh gɨn tuizim inigh osizirimɨn gɨrara mangɨ, aneghoreghtɨ,
gumazir igiar bar diritamɨn nedazim bar deravɨrama otogh gan ikiam.
Eghtɨ me marvir guar dɨghorezir kam inigh,
a isɨ uan aseba feir dɨpenimɨn anetɨgham.
14 Me temer sidaba isa ingangarir kam gami.
Me faraghavɨra ruarir ekiabar ghua okɨn temer igiar aghuibar gara dagh ifefi,
egha me uaghan amozimɨn dughiam mɨzua iti.
Eghtɨ amozim izɨtɨ, da aghung mangɨ ekeveghtɨ,
me mangɨ da okegh izɨ ingangarir kam damuam.
15 Temer kabar maba me dar daziba isava aviba arɨgha dar fɨi.
Egha maba me da arɨzi da isima, me dar bretba tue.
Egha me temer otevir igharazimɨn marvir guamɨn ingari,
egha an damazimɨn tevimning apɨrigha an ziam fe.
16 Me temer kam isa arazir kabar a gami.
Me anebɨgha a isa uan dagheba ko asɨziba tuava,
apa uan kuvibav gori da ghua bar izefi.
Egha uaghan, me avimɨn fɨngasa aviba arɨsi.
Me avimɨn fɨa ghaze, ‘Avim bar deragha nan mɨkarzimɨn izima, kɨ bar deragha uabɨ barasi.’
17 Egha temer kabara, me uari uan marvir guabar ingari.
Egha me teviba apɨra dar ziaba fe.
Egha me kamaghɨn dɨa mɨgei,
‘Nɨ nan god, kamaghɨn amizɨ, nɨ nan akuragh.’
18 “Gumazamizir kamaghɨn amiba,
me bar guizbangɨram ongani.
Bizitam ti men damazibagh amizɨ, me damazir okavɨrɨziba ikia bizibar gari puvatɨ.
Bizitam ti men nɨghnɨzibagh amizɨ, me ghua bar ongani.
19 Gumazim nɨghnɨzir aghuim ikɨ, arazir kam tuisɨgh egh kamaghɨn mɨkɨmam,
‘Kɨ temer otevir kabar mabar avim atɨ,
egha uaghan bretba ko asɨziba tuegha da ame.
Egh tizim bagh kɨ an otevir kam inigh, bizir bar kurar kamɨn marvir guamɨn ingarigh,
uan tevimning apɨrigh an ziam fam?’
Guizbangɨra, gumazamizir onganir kaba, me nɨghnɨzir aghuiba puvatɨgh mɨgɨrɨgɨar katam damuan kogham.
20 Men nɨghnɨziba bar ikuvizɨ, me bar arazir kuram gami.
Egha mati gumazim averenim ame.
Gumazamizir kaba deragh ikiamin tuavitam itir puvatɨ.
Egha me kamaghɨn fozir puvatɨ, bizir me suizir kaba, da pura temer kɨniba,
da guizɨn godba puvatɨ.”
Ikiavɨra Itir God uan gavgavimɨn, Israelia ua me ini
21 Egha Ikiavɨra Itir God kamaghɨn mɨgei,
“Ia Israelia, ia Jekopɨn anabamɨn adarasi,
ia nan ingangarir gumazamizibar mɨn iti,
egh ia bizir kabagh inɨrɨgh.
Kɨ ian ingara ia gamizɨ,
ia gumazamizir ikɨzir vamɨran otogha, nan ingangarir gumazamizibar mɨn iti.
Eghtɨ kɨ ia gɨn amangan kogham.
22 Aisaia 43:1; 43:25; 1 Korin 6:20; 1 Pita 1:18-19Ian arazir kuraba, kɨ da adegha da isa pɨn da akunizɨ, amɨnim da inigha ghu.
Nɨn arazir kuraba gɨvagham, mati ghuariaba aruem mɨzaraghara anadi, da a sara ghuegha gɨfa.
Kɨ ian akurvagha deravɨra ian gari,
kamaghɨn amizɨ, ia uamategh na bagh izɨ.”
23 Ikiavɨra Itir God uan ziar ekiam ko gavgavim akagha Israelian akuragha ua me ini.
Kamaghɨn amizɨ, O overiam, nɨ ighiabar amu bar akongegh.
Nguazimɨn aven itir biziba bar, ia uaghan tiariba akar.
O mɨghsɨaba ko temer ruarimɨn itiba,
ia uaghan tiariba akar.
24 Aisaia 40:22; 43:14; 45:12“Kɨ Ikiavɨra Itir God, ian Akurvazir Gumazim,
ia uan amebamɨn navir averiamɨn ikezɨ a tɨghar ia batamin dughiamɨn,
kɨ uabɨ, uan adarazir otivasa ian ingari.
Kɨ kamaghɨn ia mɨkɨmasa:
Kɨ uabɨra bizibagh amizɨ da otifi.
Kɨ uabɨra overiam ko nguazimɨn ingarigha,
aning isa aningɨn danganimɨn aning atɨ.
25 1 Korin 1:20Bizir gɨn otivamibar gun mɨgeir gumaziba,
kɨ me gamizɨ, me okam nɨghnɨgha, men mɨgɨrɨgɨaba paza zui.
Ezɨ kukunir gumaziba, kɨ men nɨghnɨzibagh amima, me okam nɨghnɨsi.
Ezɨ fofozir gumaziba, kɨ me gamizɨ, me ongani.
26 Nan ingangarir gumazim nan akam akunɨva,
bizir gɨn otivamiba, kɨ a mɨkɨmtɨ, a mangɨ gumazamizibav kɨm,
eghtɨ kɨ a mɨgeir akar kabar amutɨ, da guizbangɨram otivam.
Kɨ kamaghɨn mɨgɨa ghaze, gumazamiziba ua Jerusalemɨn ikiam.
Egh Judan nguibar ekiaba me uamategh dar ingaram.
Nguibar apaniba asɨghasɨghiziba,
kɨ uamategh da feghtɨ, da dɨkavigh tuivigham.
27 Kɨ kamagh mɨkɨm suam, ongarim nɨ dakegh, eghtɨ a dakegham.
Egh kɨ uaghan faner uaghira ongarim ginivizibar amightɨ, da mɨsigham.
28 2 Eghaghaniba 36:23; Esra 1:2Kɨ ghaze, kɨrara atrivimɨn ikiasa Sairus amɨsefe.
Eghtɨ a nan gumazamiziba deraghvɨra men ganam,
mati sipsipbagh eghuvir gumazim uan sipsipba deravɨra me geghufi.
Eghtɨ a ingangarir kɨ ifongezibar amuam.
A mɨkɨmtɨ, me Jerusalem uam an ingarɨva,
nan Dɨpenim uam anesam.”
44:3: Aisaia 35:7; Joel 2:28; Jon 7:38; Aposel 2:18
44:6: Aisaia 41:4; 48:12; Akar Mogomem 1:8; 1:17; 22:13
*44:7: Hibrun akam deragha vezɨn kamɨn mɨngarim abigha an gun mɨkemezir puvatɨ.
44:8: Godɨn Araziba 4:35; 4:39; Aisaia 41:22; 43:10-12
44:22: Aisaia 43:1; 43:25; 1 Korin 6:20; 1 Pita 1:18-19
44:24: Aisaia 40:22; 43:14; 45:12
44:25: 1 Korin 1:20
44:28: 2 Eghaghaniba 36:23; Esra 1:2