45
Ikiavɨra Itir God, atrivimɨn ikiasa Sairus amɨsefe
1 Onger Akaba 107:16; Aisaia 40:4Ikiavɨra Itir God, a Sairus atrivimɨn ikiasa anemɨsevegha gɨvagha, gavgavim a ganɨngi.
Eghtɨ a kantrin igharazibav sogh,
men atrivibar gavgaviba agɨvaghtɨ, me aghumsɨgham.
Eghtɨ kɨ pura Sairus bagh men nguibabar dɨvazibar tiar akaba kutɨ,
gumazitam ua da dukuman koghtɨ, Sairus aven mangɨ, uan apaniba dɨkabɨnam.
Egha Ikiavɨra Itir God kamaghɨn Sairus mɨgɨa ghaze:
2 “Kɨ nɨn faragh mangɨ danganir fɨghtɨzibar amightɨ, da magɨrɨ voroghɨra ikiam.
Egh dɨvazir gavgavimɨn tiar akar ekiar me brasɨn ingariziba akararigham.
Egh ainɨn igugunir ekiar me tiar akaba gavgavim dar anɨngasa atɨziba dar ghoregham.
3 Ua Me Ini 33:12; 33:17; Aisaia 41:23; 43:1Kɨ dagɨaba ko bizir aghuir nguibar kamɨn gumazamiziba danganir mogomebar atɨziba,
inigh nɨ danɨngam.
Eghtɨ nɨ kamaghɨn fogham, kɨ Ikiavɨra Itir God, Israelian God,
kɨ uabɨ nɨn ziam dɨborogha, ua bagha nɨn dia.
4 Aisaia 44:1; 1 Tesalonika 4:5“Nan ingangarir gumazim Jekop, an adarazi Israelia,
me gumazamizir kɨ ua baghavɨra mɨseveziba,
kɨ men akurvaghasa nɨn diazɨ nɨ ize.
Nɨ guizbangɨra na gɨfozir puvatɨ,
ezɨ kɨ nɨn ziam dɨborogha nɨn diagha ziar ekiam nɨ ganɨngi.
5 Godɨn Araziba 4:35; 4:39; Aisaia 44:8; 46:9Kɨ uabɨra, kɨ Ikiavɨra Itir God, ezɨ ua godɨn igharazir tam itir puvatɨ.
Kɨ uabɨra iti, ezɨ ua godba bar puvatɨ.
Nɨ na gɨfozir puvatɨ,
ezɨ kɨrara kɨ gavgavim nɨ ganɨdi.
6 Onger Akaba 102:15; Aisaia 37:20; Malakai 1:11Kɨ kamaghsua, nguazir kamɨn gumazamiziba,
me aruem anadir naghɨn ikia ghua aruem ghuaghiri naghɨn tu,
me bar moghɨra fogh suam,
kɨrara kɨ Ikiavɨra Itir God,
ezɨ ua godɨn tam itir puvatɨ.
Kamaghɨn amizɨ, kɨ bizir kabagh ami.
7 Kɨrara, kɨ mɨkemezɨ, angazangarim ko mɨtarmem oto.
Egha kɨrara gumazamizibagh amima, me deravɨra iti.
Kɨ me gamima, me osɨmtɨzir ekiaba batifi.
Kɨ Ikiavɨra Itir God,
kɨrara bizir kabagh amima da otivaghiri.
8 “O overiam ko ghuariaba,
ia nan akurvazim ko dughiar aghuim, gumazamizibagh ingɨ,
mati amozim nguazim giri.
O nguazim, nɨ mati, nɨ uan akam akarigh, nan akurvazim inightɨ
an aghungɨva arazir aghuim damightɨ, a gumazamizibar navibar aven ikɨ gavgavigham.
Kɨ, Ikiavɨra Itir God,
kɨ uabɨ uan gumazamizibar akurvaghasa bizir kabar ingarizɨ da otifi.”
Ikiavɨra Itir God uabɨra biziba bar dar gari
9 Aisaia 29:16; Jeremaia 18:6; Rom 9:20E gumazamiziba, God en ingari, e mati pura bizir kɨniba.
Kamaghɨn gumazir Godɨn atara a mɨgeim, a bar ongani.
Gumaka, a bar ikuvigham.
God mati gumazir nguazir mɨnebar ingarimɨn mɨn iti.
Ezɨ e nguazir mɨnebar mɨn, bɨaghiregha pura tintinibar nguazim gireghav iti.
Ia bizir kam gɨnɨghnɨgh.
Nguazir mam ti dɨkavigh mangɨ gumazir a inigha mɨnemɨn ingarizim, kamaghɨn an azaragham,
“Manmaghɨn ami? Nɨ na inigha bizir tizimɨn ingari?”
Eghtɨ nguazim ti kamaghɨn atar mɨkɨmam,
“Nɨ tizim bagha bizir nɨ ingarizir kam, an suighamin agharimningɨn ingarizir puvatɨ?”
10 Eghtɨ gumazitam ti borir bar agheghevitamɨn gan kamagh an amebam ko afeziamɨn azaragham,
“Kar bizir tizim gua a gamizɨ, an oto?”
Gumazir kam, guizbangɨra bar gumazir onganim.
Gumaka, a bar ikuvigham.
11 Ikiavɨra Itir God, a Israelian Godɨn Bar Zuezim.
Egha a Godɨn men ingarizim, a me gamizɨ
me ikɨzir vamɨran gumazamizibar oto, a kamaghɨn mɨgɨa ghaze,
“Ia gɨn otivamin biziba bagh nan azangam.
Egh arazir manam kɨ an gɨn mangɨ uan boribar ganɨva,
egh arazir manam kɨ an gɨn mangɨ uan dafarimningɨn ingangarim damuam,
ia dar amusɨ, bar na mɨkɨman markɨ.
Bar markiam.
Kar nan bizir kɨ damuamibara.
12 Jenesis 1:26-27; Jeremaia 27:5Kɨrara, kɨ nguazimɨn ingarigha,
nguazir kamɨn itir gumazamizibar ingarizɨ, me an iti.
Kɨ uan gavgavimɨn overiamɨn ingarigha pɨn anetɨzɨ, a iti.
Kɨrara, kɨ aruem ko iakɨnim ko mɨkovezibagh ativagha dar gari.
13 Kɨrara Atrivim Sairus gamizɨ,
a nan ingangarir aghuibagh ami.
Tuavir a mangamiba, kɨ dar kɨrightɨ,
a nan nguibam Jerusalem uam an ingaram.
Egh a nan gumazamiziba kalabusɨn ua me fɨrigh, me ateghtɨ me mangam.
Gumazir a givezamiba puvatɨgham, a pura ingaram.
Kɨ Ikiavɨra Itir Godɨn Gavgaviba Bar Itim, kɨ mɨkemegha gɨfa.”
14 Ikiavɨra Itir God kamaghɨn mɨgei,
“Kantri Isip ko Itiopian dagɨaba ko biziba, da Israelia ian biziba.
Eghtɨ apaniba kantri Sabean itir gumazir ruariba kalabus datɨgh, ia bagh me amadaghtɨ me izɨ,
pura ian ingangarir gumazir kɨnibar mɨn ikiam.
Egh me ian guabar uan teviba apɨrigh kamaghɨn mɨkɨm suam,
‘Bar guizbangɨra, God ia ko iti.
A uabɨra bar guizbangɨra God, ezɨ godɨn tam ua itir puvatɨ!’ ”
15 Onger Akaba 44:24; Aisaia 8:17; 57:17Nɨ Israelian God, nɨ men Akurvazir Gumazim,
egha gumazamizir igharaziba, nɨ uabɨn me modi.
16 Asebar marvir guabar ingarir gumaziba
bar guizbangɨra okam nɨghnɨgh bar aghumsigham.
17 Ezɨ Ikiavɨra Itir God, Israelian akuragha gɨfa.
Egh a me damightɨ, me zurara deraghvɨra ikɨ mamaghɨra ikiam.
Egh okam nɨghnɨghan kogh,
aghumsɨghan kogham.
18 Ikiavɨra Itir God,
anarɨra God.
A nguazim ko overiamɨn ingarizɨ, aning gavgavighavɨra iti.
Nguazim pura ikiasa God an ingarizir puvatɨ.
Biziba ko gumazamiziba bar moghɨra nguazimɨn ikiasa, an an ingari.
Egha a ghaze, “Kɨrara, kɨ Ikiavɨra Itir God,
ezɨ ua godɨn tam ua itir puvatɨ.
19 Kɨ saghon ghugha mɨtatemɨn modogha uan akam akurir puvatɨ.
Kɨ uan gumazamiziba, Jekopɨn ovavir boriba, kɨ kamaghɨn me mɨkemezir puvatɨ,
‘Ia pura mangɨ gumazamiziba puvatɨzir danganibar na buri.’
Kamaghɨn puvatɨ.
Kɨ Ikiavɨra Itir God, kɨ guizɨn akam akuri,
ezɨ nan akaba da guizbangɨra zui.”
Nguazimɨn itir gumazamiziba bar Godɨn apengan ikiam
20 Ikiavɨra Itir God ghaze,
“Ia Kantrin Igharazibar Gumazamizir ikiavɨra itir varazira, ia izɨ uari akufagh!
Ia gumazamizir mɨdorozimɨn aven deravɨra ikia, ikiavɨra itiba,
ia bar moghɨra kot bagh izɨ!
Me uan marvir guar me pura ter otevir kɨnibar ingariziba,
da inigha tintinibar dar atera izi.
Kɨ men gara ghaze,
Me guizbangɨra nɨghnɨzir aghuiba bar puvatɨ.
Me uarir akurvaghasa asebar dei,
ezɨ da gumazitamɨn akuraghamin gavgaviba puvatɨ.
21 Ia gumazamiziba bar moghɨra izɨ kotɨn aven uari bagh mɨkɨm.
Ia fofoghsɨ uarira uarir azangsɨgh suam,
godɨn manamra a fomɨra bizir datɨrɨghɨn otivasa mɨkemeziba,
da datɨrɨghɨn guizbangɨrama otifi?
Kɨrara, kɨ God, kɨ bizir kabav kemezɨ, da datɨrɨghɨn otifi.
Ezɨ ua godba puvatɨ.
Kɨ Godɨn arazir aghuibaram amim, egha kɨ ian Akurvazir Gumazim.
Ezɨ ua godba puvatɨ, kɨrara kɨ God.
22 Onger Akaba 22:27; 65:5“Ia nguazir kamɨn saghon itir danganibar gumazamiziba, ia bar na bagh izɨ.
Kɨrara kɨ God, ezɨ godɨn tam ua itir puvatɨ.
Kamaghɨn amizɨ, ia na bagh izɨtɨ,
kɨ ian akurvaghtɨ, ia deravɨra ikiam.
23 Jenesis 22:16; Rom 14:11; Filipai 2:10-11; Hibru 6:13Kɨ Ikiavɨra Itir God, kɨ uabɨ uan ziamɨn pɨn akakagha mɨkeme,
egh kɨ uan akam akɨrigha mɨkemezir bizir kam, kɨ a giraghan kogham.
Nan mɨgɨrɨgɨam kamakɨn,
gumazamiziba bar moghɨra nan guamɨn teviba apɨrigh nan ziam fam.
Egh me akam akɨrigh suam,
e uari Godɨn apengan ikiam.
24 Egh me kamagh mɨkɨm suam,
Godra arazir aghuimɨn en akurvagha gavgavim e ganɨdi.
Eghtɨ gumazamizir an anɨngagheziba, bar moghɨra an damazimɨn izɨ,
egh aghumsɨzir ekiam inigham.*Hibrun akam deragha vezɨn kamɨn mɨngarim abigha gun mɨkemezir puvatɨ.
25 Eghtɨ Israelian ovavir boriba, Ikiavɨra Itir God me damutɨ,
me uan apaniba abɨragha ziar ekiam inizir bizir kam bagh
bar akuegham.”
45:1: Onger Akaba 107:16; Aisaia 40:4
45:3: Ua Me Ini 33:12; 33:17; Aisaia 41:23; 43:1
45:4: Aisaia 44:1; 1 Tesalonika 4:5
45:5: Godɨn Araziba 4:35; 4:39; Aisaia 44:8; 46:9
45:6: Onger Akaba 102:15; Aisaia 37:20; Malakai 1:11
45:9: Aisaia 29:16; Jeremaia 18:6; Rom 9:20
45:12: Jenesis 1:26-27; Jeremaia 27:5
45:15: Onger Akaba 44:24; Aisaia 8:17; 57:17
45:22: Onger Akaba 22:27; 65:5
45:23: Jenesis 22:16; Rom 14:11; Filipai 2:10-11; Hibru 6:13
*45:24: Hibrun akam deragha vezɨn kamɨn mɨngarim abigha gun mɨkemezir puvatɨ.