3
God kantriba bar dar gumazamiziba akuvagh kotiam damuam
1 Egha Ikiavɨra Itir God ghaze:
“Ia oragh! Gɨn izamin dughiamɨn,
kɨ Jerusalem ko Judan gumazamizibar amightɨ,
me ua deragh otivigham.
2 Eghtɨ kɨ kantriba bar dar gumazamiziba bar me inigh izɨ,
danganir zarir mamɨn otogham.
Me danganir zarir kam kamaghɨn a dɨbori, God Gumazamiziba Tuisɨsi.
Kɨ kagh me akuvagh,
arazir me nan gumazamizibagh amiziba bagh akam me gasam.
Gumazamizir kaba, me nan gumazamizir kɨ ua bagha inabazibara.
Kantrin kabar gumazamiziba, nan nguazim inigha
anebɨgha uarigh anɨngi,
egha Israelia inigha tintinimɨn kantrin igharazibar ghue.
3 Egha me nan gumazamiziba bagha satu gikarara
uari uari amɨsevegha gari,
terara vaghvagh me iniam.
Egha me Israelian otariba amaga, dar ikarvazimɨn, uari bagha tuavimɨn amiziba isi.
Egha me Israelian guivir doziba amaga,
uari bagha dagɨaba isa wainɨn dɨpabagh ivesi.
4 Aisaia 14:29-31; 23:1-18; Jeremaia 47:1-7; Esekiel 25:15--28:26; Amos 1:6-10; Sefanaia 2:4-7; Sekaraia 9:1-7; Matyu 11:21-22; Luk 10:13-14“Ia Tair ko, Saidonɨn nguibamningɨn adarazi ko, Filistian kantrin danganiba bar,
ia manmaghɨn na damuasa?
Ia ti ghaze, Kɨ arazir kuram gamizɨ, ia na ikarvaghasa a?
Ia kamaghɨn nɨghnɨghtɨ, kɨ zuamɨra ian arazir kuram ikaragham.
5 Kɨ fo, ia nan gol ko, silvan biziba ko, bizir aghuir iveziba bar pɨn kozir avɨriba sara,
inigha ghua uan asebar ziaba fer dɨpenibar da arɨki.
6 Ia Tair ko, Saidon ko, Filistiaba, ia Jerusalem ko, Judan danganir igharazibar gumazamiziba inigha,
bar saghon ghua me amada,
ezɨ Grikba me givezezɨ,
me pura men ingangarir gumaziba ko ingangarir amizir kɨnibar otifi.
7 Ezɨ datɨrɨghɨn kɨ ua me inightɨ,
me ua danganir ia me amangiziba ategham.
Eghtɨ ia me gamizir arazimra,
kɨ a ikarvagh ia damuam.
8 Kɨ Judabar amamangatɨghtɨ, me ian otariba ko guivibagh ivezam.
Egh me inigh Sabean kantrin ikɨzir saghon itimɨn me amadagham.
Kɨ Ikiavɨra Itir God, kɨ mɨkemegha gɨfa.”
9 Egha God akar kam Kantrin Igharazibar Gumazamizibar tongɨn mangɨ a mɨkɨmasa Joel mɨkeme,
“Ia God ko mɨdorozim damusɨ biziba akɨr ikɨ,
egh mɨdorozir gumaziba bar men diaghtɨ,
me izɨ uari akuvagh, egh mɨsoghsɨ mangam.
10 Aisaia 2:4; Maika 4:3Ia uan nguazibagh tuir ainbav soghtɨ, da mɨdorozir sababar mɨn otifigh.
Egh uan sabar ikɨzɨrɨzir azenibar ingaribav soghtɨ, da afuzibar mɨn otifigh.
Eghtɨ gumazir gavgaviba puvatɨziba, uaghan mɨdorozir gumazibar otivam.
11 Ia kantrin roghɨra itibar gumazamiziba, ia bar moghɨra zuamɨra izɨ,
danganir zarir kamɨn uari akufagh.”
O Ikiavɨra Itir God, nɨ uan mɨdorozir gumazir gavgaviba amadaghtɨ,
me izɨ apanir kaba ko mɨsogh.
12 Ezɨ God kamaghɨn mɨgei:
“Kantribar gumazamiziba bar, dɨkavigh danganir zarir kamɨn izɨ.
Me danganir zarir kam kamaghɨn a dɨbori, God Gumazamiziba Tuisɨsi.
Kɨ danganir kam daperagh,
Israelɨn boroghɨn itir kantribar gumazamiziba bar men arazir kuraba tuisɨgham.
13 Aisaia 63:3; Hosea 6:11; Matyu 13:39; Akar Mogomem 14:14-20; 19:15Ikɨzir kaba, me bar gumazamizir kuraba!
Kamaghɨn amizɨ, ia sabar ikɨzɨrɨziba inigh me aghor, mati daghem anigha gɨfa.
Egh pamten me dɨkabɨn, mati gumazim wainɨn ovɨziba dɨkabɨri danganimɨn da dɨti.
Ezɨ wainɨn dɨpaba bar izɨvagha fasfasi.
Eghtɨ, gumazamizir kaba kamaghɨra bar ikuvigham.”
14 Gumazamizir bar avɨrim, bar avɨrasemegh kotiam bagh danganir zarir kamɨn uari akuvagham.
Ikiavɨra Itir God Izamin Dughiar Ekiam,
bar dughiar ovezimɨn danganir zarir kamɨn otivam.
Danganir zarir kamɨn ziar igharazim,
God Ivezir Kuram Gumazamizibar Anɨngasa Mɨkeme.
15 Eghtɨ aruem ko iakɨnim mɨtarmeghtɨ,
mɨkoveziba ua isian kogham.
God uan gumazamiziba bar deravɨra me damuam
16 Amos 1:2Ikiavɨra Itir God, Jerusalemɨn aven Saionɨn Mɨghsɨamɨn pamtemɨn deima,
an dɨmdiam mati ararim dagarvasi, ezɨ overiam ko nguazim nɨsi.
Ezɨ God uan gumazamizibagh eghufi, eghtɨ me ikuvighan kogham.
A Israelian mogomer danganimɨn mɨn iti.
17 A kamaghɨn mɨgei,
“Dughiar kamɨn ia Israelia fogham, kɨrara kɨ Ikiavɨra Itir God, ian God.
Saion, nan mɨghsɨamra, kɨ danganir kamɨn iti.
Kɨ Jerusalem damightɨ, a nan nguibar ekiamra ikiam,
eghtɨ azenan itir darazi uam an aven mangan kogham.
18 Dughiar kamɨn, wainɨn azenir avɨriba otivigh mɨghsɨaba avegham,
eghtɨ mɨghsɨar muziariba bar, bulmakaun avɨriba dar ikiam.
Eghtɨ gɨn Judan nguazimɨn itir daghurir dakeziba, dɨpar avɨriba zurara dagh izɨvagh ivemaram.
Eghtɨ dɨpatam Ikiavɨra Itir Godɨn Dɨpenimɨn ikegh azenan izɨ,
emɨr ivemar Akasɨn Temeba Itir Danganir Zarimɨn mangam.
19 Isipɨn kantri ko Idomɨn kantri, aningɨn mɨdorozir gumaziba iza,
Judaba ko mɨsogha, pura gumazamizir osɨmtɨziba puvatɨziba,
me mɨsoghezɨ me ariaghire.
Kamaghɨn amizɨ, Isipɨn nguazim danganir mɨdiarimɨn mɨn otogham,
eghtɨ Idomɨn nguazim danganir kɨnimɨn mɨn otoghtɨ,
gumazitam uam an ikian kogham.
20-21 Eghtɨ gumazir, gumazamizir kabav soghezɨ me ariaghireziba,
kɨ men arazir kurar kamra ua me ikarvagham.
Osɨmtɨzim itir gumazir kaba,
kɨ men tav ateghtɨ a ikian kogham.
Eghtɨ nan gumazamizir Jerusalem ko Judan danganir igharazibar itiba,
me zurara ikɨ mamaghɨra ikiam.
Eghtɨ kɨ Ikiavɨra Itir God, kɨ Saionɨn Mɨghsɨamɨn ikiam.”