77
Gumazim osɨmtɨzim itir dughiamɨn a God ko mɨgei
Asap onger akar kam osiri.
An onger akar kamɨn faragha zuir gumazim Jedutun gɨnɨghnɨgh a bagha onger akar kam osiri.
1 Onger Akaba 3:4; 142:1Kɨ osemegha uabɨn akurvaghasa arava God ko mɨgei.
A na baraghasa kɨ pamten an dei.
2 Osɨmtɨziba na bativir dughiaba,
kɨ Ekiam buriava an dei.
Kɨ dɨmagaribar uan dafariba favɨra ikia a ko mɨgɨa,
navir amɨrizim inizir puvatɨ.
3 Kɨ God gɨnɨghnɨgha nan navim arai.
Kɨ God gɨnɨghnɨgha nan navim bar na basemezɨ
damaziba nan sɨri.
(Ighiam gamua an suiam
atugha avughsegha ua
ighiam gami.)
atugha avughsegha ua
ighiam gami.)
4 God na gamima kɨ dɨmagaribar akuir puvatɨ.
Nan navim bar na basemezɨ kɨ mɨkɨman asa.
5 Kɨ dughiar fomɨra ghueziba ko, azenir fomɨra ghuezibagh nɨghnɨsi.
6 Onger Akaba 4:4; 42:8Kɨ dɨmagaribar uan onger akar kam gɨnɨghnɨsi.
Kɨ nɨghnɨgha ikia, egha uabɨra uabɨn azangsɨsi:
7 “Ekiam zurara akɨrim ragh na gasam o?
Egh a ua na gifongeghan kogham o?
8 An apangkuvir arazim nan ikiavɨra iti, o puvatɨ?
A na ko dɨkɨrɨzir akar kam na ko ikiavɨra iti, o puvatɨ?
9 God en akurvaghasa ua nɨghnɨsi o puvatɨ?
An en apangkuvir arazim, an adarim ti anepɨrighama?”
(Ighiam gamua an suiam
atugha avughsegha ua
ighiam gami.)
atugha avughsegha ua
ighiam gami.)
10 Kɨ nɨghnɨzir kam gamua nan navim na baseme.
Ezɨ kɨ ghaze,
“Godɨn Bar Pɨn Itim, datɨrɨghɨn nan akurvaghan aghua.”
11 O Ikiavɨra Itir God, kɨ dɨgavir kuram gamir araziba ko,
ingangarir ekiar nɨ faragha amiziba, kɨ uamategh dagh nɨghnɨgham.
12 Kɨ guizbangɨra dɨgavir kuram gamir araziba ko,
ingangarir ekiar nɨ faragha amiziba, kɨ uamategh dagh nɨghnɨgham.
13 O God, arazir nɨ amiba, da bar deragha guizbangɨra zue.
Ezɨ godɨn ifavaritamɨn gavgavim nɨ gafirazir puvatɨ.
14 O God, nɨrara mirakelbagh amua,
uan gavgavir ekiam Kantrin Igharazibar Gumazamiziba bar men aka.
15 Nɨn gavgavimra nɨ uan gumazamizibar akuragha me ini.
Gumazamizir kaba, me Jekop ko Josepɨn ovavir boriba.
(Ighiam gamua an suiam
atugha avughsegha ua
ighiam gami.)
atugha avughsegha ua
ighiam gami.)
16 O God, fomɨra dɨpaba nɨn gara nɨn atiati.
Ongarir konimɨn aven, mɨkɨmkɨziba tintinibar otifi.
17 Ezɨ amozir ekiaba izaghirima,
onɨmariba danganiba bar dar taghtasi,
ezɨ arariba pamten dagarvasi.
18 Nɨn arariba amɨnir ekiamɨn tongɨn dagarvasi.
Ezɨ onɨmariba taghtagha bar nguazim gisɨsi,
ezɨ nguazim mozorogha sɨvaghsɨvasi.
19 Nɨ ongarir torimɨn arua zuima,
tuavir aruim, ongarir konimɨn iti.
Ezɨ nɨn diaritam tuavir kamɨn itima,
gumazitam an ganizir puvatɨ.
20 Nɨ sipsipbar garir gumazimɨn mɨn, gumazamizibar faragha ghua me inigha zui.
Egha ingangarim Moses ko Aron ganɨngizɨ, aning men faragha ghua men gari.