80
Israelia ua tugh gavgavighasa, God ko mɨgei
Asap onger akar kam osiri.
Gumazir ighiabar faragha zuim, a gumazamizibav kɨmtɨ, me tiarir kamɨn gɨn mangɨ ighiar kam damuam, “Akar Dɨkɨrɨzir Gavgavimɨn akɨmarir aghuim.”
1 Ua Me Ini 25:22O Israelia geghuvir gumazim, nɨ deravɨra e barakigh.
Nɨ sipsipbar mɨn Josepɨn ovavir boribagh eghuva, deragha men gari.
Nɨ uan atrivir dabirabim gaperaghav ikia, enselɨn bar gavgavibar pɨn iti.
Nɨ uan angazangarim e gisiragh.
2 Nɨ Efraim ko, Benjamin ko, Manase, men anababar ovavir boriba, nɨ uabɨ men akagh.
Nɨ uan gavgavim akagh izɨ en akuragh.
3 O God, nɨ uamategh e inigh izɨtɨ
e ua dɨkavigh tuivigh, fomɨra ikezɨ moghɨn ua ikiam.
Nɨ uan angazangarim e gisiragh,
en apangkuvigh en akuraghtɨ,
e ovengan kogham.
4 O God, nɨ Ikiavɨra Itir Godɨn Gavgaviba Bar Itim.
Nɨ dughiar bar ruarimɨn uan gumazamizibar atara,
me nɨ ko mɨgeir mɨgɨrɨgɨaba nɨ da barazir puvatɨ.
5 Nɨ e gamizɨ, e bretɨn mɨn uan temeriba apava,
kavɨn temerir izɨvɨrɨzim, dɨpamɨn mɨn uarir guri.
6 Nɨ gumazir en boroghɨn itibar arirazɨ, me iza en nguazim iniasa uariv sosi.
En apaniba e dɨpovava en ingaravati.
7 O Ikiavɨra Itir Godɨn Gavgaviba Bar Itim, nɨ uamategh e inigh izɨtɨ,
e ua dɨkavigh tuivigh, fomɨra ikezɨ moghɨn ua ikiam.
Nɨ uan angazangarim e gisiragh,
en apangkuvigh en akuraghtɨ e ovengan kogham.
8 Aisaia 5:1-7Nɨ uan gumazamiziba wainɨn ikarɨzimɨn mɨn Isipɨn me asigha me inigha ize.
Nɨ Kantrin Igharazibar Gumazamiziba batuegha,
men nguazibar uan gumazamiziba, wainɨn ikarɨzimɨn mɨn me arke.
9 Nɨ wainɨn ikarɨzir kam bagha nguazim azenegha anekara.
Ezɨ an aghua an biba bar nguazim giraghuzɨ,
an aghua ghua bar uabɨ aroke.
10 Wainɨn ikarɨzir kam aghua, ekɨva an dughuazim mɨghsɨaba bar ada aghuazɨ,
an aghariba sidan temer ekiaba bar ada avara.
11 An aghariba aghua ghua Mediterenianɨn Ongarir Ekiamɨn tugha,
iza Yufretisɨn Fanemɨn tu.
12 Nɨ datɨrɨghɨn manmaghsua wainɨn azenim avɨnizir dɨvazim bar anekaragharɨki?
Gumazamiziba datɨrɨghɨn tuavimɨn daru, an ovɨziba okɨmam.
13 Dar atiaba a dɨkabɨntɨ,
asɨzir atiaba anemam.
14 O Godɨn Gavgaviba Bar Itim, nɨ uam e gɨnɨghnɨgh,
uan Nguibamɨn pɨn ikɨ vangɨnan wainɨn ikarɨzir kam deraghvɨra an gan.
15 Nɨ uabɨ uan agharir guvimɨn wainɨn ikarɨzir kam akara.
Nɨ wainɨn biar igiam akarazɨ an aghua gavgavigha gɨfa.
16 En apaniba anetugha a isa avim mɨkɨnigha gɨfa.
Nɨ uaghan me atugh me gasɨghasightɨ deragham.
17 Nɨn gumazamizir nɨ ua bagha inabaziba,
nɨ me gamizɨ me ekevegha bar gavgafi.
Nɨ men akuragh deragh men gan.
18 Nɨ kamagh damightɨ e uam akɨrim ragh nɨ gasan kogham.
Nɨ en akuraghtɨ e angamɨra deravɨra ikɨ nɨn ziam fam.
19 O God, nɨ Ikiavɨra Itir Godɨn Gavgaviba Bar Itim,
nɨ uamategh e inigh izɨtɨ,
e ua dɨkavigh tuivigh fomɨra ikezɨ moghɨn ua ikiam.
Nɨ en boroghɨn ikɨtɨ, nɨn angazangarim e gisiraghtɨ, nɨ deragh e damu.
Egh en apangkuvigh en akuraghtɨ e ovengan kogham.