79
Israelia uarir akurvaghasa God ko mɨgei
Asap onger akar kam osiri.
1 2 Atriviba 25:8-10; 2 Eghaghaniba 36:17-19; Jeremaia 52:12-14O God, Kantrin Igharazibar Gumazamiziba nɨn nguazimɨn ize.
Egha Dɨpenir nɨ ua bagha inabagha itim gamizɨ, a bar moghɨra nɨn damazimɨn mɨzegha ikufi.
Egha me Jerusalem bar a gasɨghasɨki.
2 Me nɨn gumazamizibav soghezɨ me ariaghirezɨ,
me nɨn ingangarir gumazir kabar kuaba isa kuaraziba ko asɨzir atiabar daghebar mɨn dagh anɨngizɨ, da da ame.
3 Me nɨn gumazamizibav soghezɨ me ariaghirezɨ,
men ghuziba dɨpamɨn mɨn Jerusalemɨn nguibar averiam bar a gɨmɨri.
Ezɨ gumazir men kuabar suigh me mozibar arɨghamitam ua itir puvatɨ.
4 Gumazamizir en boroghɨra itiba e dɨpova, en ingaravaka,
akar kurabar e mɨgei.
5 Onger Akaba 85:5; Esekiel 38:19O Ikiavɨra Itir God, nɨ en ataravɨra iti o?
Nɨ dughiar ruarimɨn en atar ikɨ kamaghɨra ikiam o?
Nɨ navim en ikuvigh, nɨn anɨngagharim avimɨn mɨn isi kamaghɨra ikiam o?
6 Nɨ kantrin nɨ gɨfozir puvatɨgha nɨ ko mɨgeir puvatɨziba,
nɨ men atartɨ deragham.
7 Me kamaghɨn amua, Jekopɨn ovavir boriba bar me mɨsuagharigha,
men nguazim bar a gasɨghasɨki.
8 Onger Akaba 106:6; Aisaia 64:9Nɨ en inazir afeziaba amizir arazir kurabagh nɨghnighɨva, pazɨva e damuan markɨ.
En nɨghnɨzir gavgaviba datɨrɨghɨn bar iraghuegha gɨfa.
Kamaghɨn, nɨ zuamɨra en apangkufigh.
9 2 Eghaghaniba 14:11; Onger Akaba 25:11; 31:3O God, nɨ Godɨn En Akurvazim.
Nɨ uan ziar ekiam bagh nɨghnigh en akuragh uam e inigh,
en arazir kuraba gɨn amadagh.
10 O God, Kantrin Igharazibar Gumazamiziba manmaghsu kamagh e mɨkɨmam,
“Ian God mana?”
Nɨ uan gumazamizibar ghuziba ikarvagh,
Kantrin Igharazibar Gumazamiziba mɨzazim me gasɨtɨ e ganika.
11 Nɨ kalabusɨn itir gumazamizibar ararem baragh.
Nɨ uan gavgavir ekiamɨn, gumazir apaniba mɨsueghtɨ aremeghasava amiba,
uam men akuragh.
12 O Ekiam, apanir kaba akar kurabar nɨ mɨkeme.
Kamaghɨn, nɨ men arazir kurar kaba ikaragh bar moghɨra me agɨfa.
13 Nɨn gumazamizir nɨn sipsipbar mɨn itiba,
zurazurara nɨ mɨnamam.
En ovavir borir gɨn otivamiba,
me uaghan nɨn ziam fɨ kamaghɨra ikiam.