104
Ikiavɨra Itir God biziba bar
dar ingari, ezɨ e an ziam fam
dar ingari, ezɨ e an ziam fam
1 Kɨ uan navir averiamɨn
Ikiavɨra Itir Godɨn ziam fam!
O Ikiavɨra Itir God, nan God, nɨ bar pɨn iti.
Nɨn ziam bar pɨn ikia
egha nɨ atrivir bar ekiam.
2 Aisaia 40:22; Daniel 7:9Angazangarim nɨ avara, mati gumazim inim avara.
Nɨ overiam atɨzɨma mɨkoveziba bar iti,
mati gumazim purirpenim asaragha benimɨn a ikezɨma a iti.
3 Onger Akaba 18:10Nɨ uan dɨpenim dɨpar pɨn itibagh isɨn an ingari.
Ezɨ overiamɨn mɨghariba, da mati nɨn karis,
ezɨ amɨnim nɨ atera zui.
4 Hibru 1:7Nɨ amɨnim amadima, a nɨn akaba atera zui.
Ezɨ nɨ overiamɨn onɨmariba ko avir mɨzariaba dagh amima,
da nɨn ingangarir gumazibar iti.
5 Nɨ fomɨra nguazir kam atɨzɨ,
a bar deraghavɨrama aperagha gavgafi.
Egha bar mozorozir puvatɨ.
6 Nɨ ongarim atɨzɨ a ikia
inimɨn mɨn nguazim avara.
Ezɨ dɨpar kam mɨghsɨaba bar ada avara.
7 Nɨ gɨn ongarim pamten a mɨkemezɨ an arav ghu.
Nɨn tiarim ararimɨn mɨn dagarvazima,
ongarim a baragha a foregha ghugha gɨfa.
8 Ongarim mɨghsɨaba bar da ategha
afora danganir zaribar uaghire.
Egha danganir ongarim ikiasa nɨ inabazir kamɨn,
a datɨrɨghɨn an ikia kamaghɨra iti.
9 Jeremaia 5:22Ongarim ikiamin danganim, nɨrara an abaragha gɨfa,
eghtɨ ongarim nɨ atɨzir danganir kam gitavɨraghan kogham.
Gɨn ongarim ua nguazir kam bar an evaraghan kogham.
10 Nɨ nguazimɨn aven ivemarir dɨpabagh amima,
da nguazir averiamɨn otivigha danganir zaribar afora,
egha mɨghsɨabar tongɨn ivemara uaghiri.
11 Asɨzir atiaba dɨpar kam api,
ezɨ donkin atiaba dɨpar kamram api.
Ezɨ kuariba ua men pɨrir puvatɨ.
12 Overiamɨn pɨn mɨghagha aruir kuaraziba iza,
temer dɨpar mɨriamɨn tuivighav itibar uan mɨkonibar ingari.
Egha ter aguabar apiaghirava arai.
13 Nɨ uan Nguibamɨn ikia egha amozim amadi,
a mɨghsɨabagh isɨn izi.
Nɨ ingangarir aghuim gamua nguazir kamɨn akurazɨ,
bizir aghuiba nguazir kam bar a gizɨfa.
14 Nɨ bulmakauba apir dadabagh ami da otifi.
Ezɨ e gumazamiziba oparir biziba,
nɨ uaghan dagh amizɨ da otivizɨ,
e dar dagheba isi.
15 Nɨ en akurazɨma, e wainɨn ikarɨziba opara dar ovɨziba mɨrmɨra,
dar dɨpaba apa en naviba bar akonge.
Egha en guaba taghtaghasa, e olivɨn temebar borem isa uan guabagh azui.
Egha e dagheba opara, da apava, en mɨkarziba gavgafi.
16 Amozim izima,
Lebanonɨn temeba dɨpar avɨrim isi.
Sidan temer kabanang,
Ikiavɨra Itir God fomɨra da opari.
Ezɨ kar an temeba.
17 Sidan temer kaba,
kuaraziba iza dar uan mɨkonibar ingari.
Ezɨ kuarazir fɨrir ruariba
temer painbar uan mɨkonibar ingari.
18 Memen atiaba mɨghsɨaba itir danganibagh arui,
ezɨ iriaba mɨghsɨabar itir dagɨar toribar modi.
19 Nɨ iakɨnimɨn ingarigha,
azenir vamɨran iakɨniba vaghvagh dar dughiabar ada arɨki.
Ezɨ aruem magɨramin dughiam gɨfo.
20 Nɨ mɨtatem gami, a dɨmagaribar otifi.
Ezɨ dɨmagaribar asɨzir atiaba arui.
21 Laionba asɨziba buria pamten dei.
Egha asɨzir nɨ me ganɨdiba buri.
22 Aruem anadima me uamategha ghua,
uan mogomer danganibar zui.
23 Gumaziba uan ingangaribagh amua ghua garima,
aruem uaghiri me gefi.
24 O Ikiavɨra Itir God, nɨ bizir bar avɨrimɨn ingari!
Nɨ bar fofozir ekiam ikia
bizir avɨrir kaba bar dar ingari.
Ezɨ bizir nɨ ingarizir kaba
nguazim bar a gizɨfa.
25 Ongarim bar ekefe,
ezɨ angamɨra itir bizir avɨriba iti,
osirir ekiaba ko doziba, ko bizir igharaziba an iti.
Ezɨ e da mengan ibura.
26 Jop 41:1; Onger Akaba 74:14; Aisaia 27:1E gari, kuriba ongarim gisɨn ivemara zui,
ezɨ maburan osirir ekiar nɨ faragha ingariziba
ongarimɨn ikarara uari akura uanaga izaghiri.
27 Angamɨra itir biziba bar nɨrara gari,
mɨtiriam men azir dughiam
nɨ dagheba me danɨngasa me nɨrara mɨzuai.
28 Nɨ dagheba me ganɨdima me api.
Nɨrara dagher aghuiba me ganɨdi,
men naviba izevegha tughatɨ.
29 Guizbangɨra, nɨ akɨrim ragha me gasarazɨ me atiati.
Men angamɨra itir ikɨrɨmɨrim, nɨ me dama a inizɨ me ariaghire,
egha men mɨkarziba ua nguazir mɨnemniamɨn oto.
30 Nɨ ikɨrɨmɨrir angamɨra itim anɨdir amɨnim me ganɨngizɨ,
me angamɨra iti.
Nɨ nguazimɨn bizir igiabagh amima
da otifi.
31 E ghaze, Ikiavɨra Itir Godɨn gavgavim ko angazangarir ekiam zurara ikɨ mamaghɨra ikiam.
Eghtɨ Ikiavɨra Itir God, bizir a ingariziba bagh bar akongegham.
32 A nguazimɨn garima,
mɨkɨmkɨzim puram a batifi.
A dafarim mɨghsɨabagh arɨzima,
mɨghariba pura dar otifi.
33 Kɨ angamɨra itir dughiar kam
kɨ Ikiavɨra Itir Godɨn ziam fam.
Kɨ Ikiavɨra Itir God bagh ighiabar amu,
egh an ziam pɨrafegh gɨn ovengam.
34 A na gamima, kɨ bar akonge.
Kɨ kamaghsua ifonge,
a nan onger akabagh ifuegham.
35 Nan ifongiam kamakɨn,
nɨ arazir kurabagh amir gumazamiziba bar me gasɨghasɨkigh.
Gumazamizir kuraba bar moghɨra gevegh
ua ikian kogham.
Kɨ uan navir averiamɨn aven
Ikiavɨra Itir Godɨn ziam fam!
Aleluia!
E Ikiavɨra Itir Godɨn ziam fam!