3
1 Kɨ dɨmagaribar zurara akuava, irebabar gumazir kɨ ifongezir kamɨn gari.
Egha irebamɨn aven kɨ pamtemɨn a gɨnɨghnɨgha danganiba bar a buriavɨra ikia ghua,
egha an apizir puvatɨ.
2 Kɨ irebamɨn aven dɨkavigha, nguibar ekiamɨn aven a buriagh arui.
Kɨ nguibar ekiamɨn tuaviba ko, gumazamiziba uari akuvir danganiba ko danganiba bar dagh arui.
Egha kɨ bar ifongezir gumazir kam buria,
egha kɨ a batozir puvatɨ.
3 Ezɨ nguibar ekiam geghuvir gumaziba arua iza na bato.
Ezɨ kɨ men azara,
“Gumazir kɨ ifongezir kam, ia ti an ganiz, o puvatɨ?”
4 Egha kɨ me ategha ghua
maghɨra gumazir kɨ ifongezir kamɨn api.
Kɨ a bagha ghua a muki,
egha kɨ an ataghɨraghan aghua.
Egha kɨ a inigha uan amebamɨn dɨpenimɨn ghu,
egha ga amebar na batezimɨn danganir akuimɨn aven ghu.
5 O Jerusalemɨn amiziba, kɨ kamaghɨn ian azai,
ia dian asɨzir atiar aghuibagh nɨghnigh,
egh na ko akam akɨrigh suam,
ia ga uaning gifongezir arazim, an tuavim apɨran markɨ,
egh ikɨ mangɨtɨ gan ifongiam gɨvagham.
Onger akar namba 3
Amizir igiamɨn onger akam
6 Bizir tizim gumazamiziba puvatɨzir danganim ategha izi?
Bizir kam, mati mɨgharim me sanda ko pauran anezir, me iter balsan eborimɨn ingarizim tuema an mɨgharim otifi.
Ezɨ an mughuriam,
mati pauran aghuir dagɨar ingangaribagh amir gumaziba amadim.
7 Ia gan! Me akuriar aghuim inigha a gupugha izi.
Ezɨ Atrivim Solomon uabɨ a gaperaghav iti.
Ezɨ 60plan mɨdorozir gumaziba a ko izi.
Me Israelian mɨdorozir gumazibar tongɨn itir mɨdorozir gumazir gavgaviba.
8 Me fomɨra dughiar avɨribar mɨsoke.
Egha me mɨdorozir sababar mɨsogha bar fo.
Me bar moghɨra vaghvagha uan mɨdorozir sababa suiki.
Me fo, apaniba dɨmagaribar iza me mɨsosi,
kamaghɨn amizɨ, me deravɨra uari bagha gara iti.
9 Atrivim Solomon uan gumazibav kemezɨ,
me kantri Lebanonɨn temer aghuiba inigha
a bagha akuriar aghuimɨn ingari,
mati dɨpenir muziarir mam.
10 Akuriar aghuir kamɨn sueba, me silvan dar ingari,
ezɨ an dabirabir danganim me golɨn an ingari.
Ezɨ me akuriar aghuir kamɨn danganir apiaghirimɨn pilo, atrivimɨn inir pɨghaghevimɨn anevara.
Jerusalemɨn amiziba deravɨra dabirabir kam asɨngi.
Me atrivim bagha ingangarir kam damuasa bar ifonge.
11 O Jerusalemɨn amiziba, ia azenan izɨ Atrivim Solomonɨn ganigh.
Atrivimɨn dapanir asuam an dapanimɨn iti.
Atrivim Solomon amuimɨn itir dughiamɨn, an amebam dapanir asuar kam isa an dapanim garu.
Ezɨ dughiar kamɨn a bar akonge.