PILLIMON
Poll-ni Yi PILLIMON Pepá Topa Sirim Bukele
Poll-ni Pepá Topa Sirim Ilinga Ung-Pulu Mare
Poll molupa tirim mele ung-pulu mare kene yu-ni pepá topa sirim-manga ung-pulu mare kene buk-gomú 682 molemú.
‘Pepá ili Rom ka-lkuna pepa kene turum.’ niku piliilimili. ‘Epesas kene Pillipai kene Kollosi kene taon akumanga yambumanga pepáma yu ka-lku tiluna pepa kene turumko.’ niku piliilimili.
Pillimon yu yi-auliele molupa yambu mare yunga kongun we kende-mande tenjiku méle kaluli naa liili yambuma nokupa mulurum. Yunga kongun we tinjili yi te, Onesimas niliele, takara topa kolea-auli Rom purum kene Poll-nga ungele piliipa numanu topele topa ‘Krais sika.’ nimba tondulu mundupa piliirim. Pe yu-ni Poll nukurum.
Kongun we kendemande tinjili yambuma takara toku pulimelé kene Rom-gapmaneliinga ung-mani te-ni nimba mele: ‘Aku-siku mong liingéliinga “Pundu tangi.” niku toku konjai.’ nimba pirim. Akiliinga-pe Poll-ni Onesimas numanu monjupa Pillimon pepá topa sipa kene nimba mele: ‘Yu alsukunu lkuna liikunu “Ang.” nikunu táka-niku nukui.’ nirim. Akiliinga-pe Poll-ni Pillimon aku-sipa mele mawa tembandu sumbi-sipa naa nimba ui ung mare we nirimaliinga ung marenga ung-pulele mindili sipu piliilimulu. Takara topa purum yi Onesimas-nga bili kolomong-kelú 10 pulu monjupa nimba, pepále topa pora simbandu kamu ung te mawa tirim.
Ya ung-pulele pora nikem.
1-25 pali Pillimon-nga Kongun We Tinjili Kendemande-Yili Ui Takara Topa Purum, Yi Akili Penga Numanu Topele Topa Krais-nga Yili Mulurum Kene Poll-ni Yu Pillimon Mulurumna Kelepa Liipa Mundurumeliinga Ungele
1
1-3 Poll-ni Pepále Tombandu Pulu Monjupa Turum Ungele
1-2 Na Poll, Krais Yesos-nga kongun tenjiliáliinga ka-lkuna peliu yili, na kene oliunga angin Timoti wasie molupulu kene pepá ili topu siker.
Olsunga aima pulu lelemú yi Pillimon, tapú-topu kongun telemulu yili, nu kene, oliunga kimulu Apia kene, oliu wasie tapú-topu ele tili yi Akipas kene, Krais-nga yambu-talape Pillimon nunga lkuna máku tolemele yambuma kene, eni pepá ili topu siker.
Oliunga Lapa Pulu Yili kene Auli Yesos Krais-seleni eni we kondu kolkulu, ‘Eni numanu waengu nipili táka-niku molangi.’ niangli.
4-7 Pillimon Ulu-Kaíma Tepa Mulurum Mele Piliipa Kene Poll-ni Numanu Sipa Pulu Yili-Kene “Angke” Nirim Temanele
4-5 Nanga pulu lelemú yi ⸤Pillimon⸥, nu Auli Yesos ⸤molupa, oliunga nimba tinjirim mele tenjilimále⸥ ‘Sika’ nikunu tondulu munduku piliikunu molkunu, Pulu Yili-nga yambuma pali numanu monjukunu mollu mele piliipuliinga Pulu Yili-kene popu topu ung nimbúndu taki-taki nunga mawa tenjipu, nanga Pulu Yili-kene “Angke” niliu. Pulu Yili-kene nunga mawa tenjipu kene, ‘Nu-kene oliu ‘⸤Yesos Krais⸥ sika.’ nimbu tondulu mundupu piliilimuláliinga numanu tiluna pupili tapú-topu molemulu ulele-ni nu aima piliipa kungnjuliele sipili. Piliipa kungnjuli akili pemba kene Krais-nga méle kaí oliu silimú liilimuluma kamu tondulu mundukunu piliani.’ niliu. Ang, nu-ni Pulu Yili-nga yambuma numanu monjukunu kene numanu kaí pípili mulungí uluma tinjirinu mele piliipuliinga na numanu sipu numanu aima tondulu pupili moliu.
8-22 Poll-ni Pillimon-ndu “Onesimas Kelku Lkundu Liikunu Kene ‘Nunga Kandi-Angin Mele Mulupili.’ Ni.” Nirim Ungele
Na-ni nu ulu te “ti.” nimbu mawa tembu teker akili nu-kene olsu Krais-nga yisele molembuláliinga “Nu-ni aima sika ti.” nimbu tondulu mundupu kapula nilka akiliinga-pe ⸤nu-ni tellu mele niker aku-siku molkunu Pulu Yili-nga yambuma kondu kolkunu tellu⸥ akiliinga ⸤aku-sipu naa nimbú⸥. Numanu munjuli ulele-ni olsu liipa tere lenjipa ‘Tiluna molambili.’ nilimú-na aku-sipu molembuláliinga na-ni ⸤“Nu i-sikunu ti.” nimbu tondulu mundupu naa nimbu, “Ulu te teani.” nimbu⸥ nu táka-nimbu mawa tembu teker. Sika na Poll, na yi-andale, Krais Yesos-nga kongun tenjiliáliinga ka-lkuna peliu, na aku-sipu yili moliáliinga 10 nanga málu Onesimas-nga mawa tenjipu kene “⸤Pillimon⸥ nu-ni ⸤Onesimas⸥ yu tekunu konjani.” niker. Na ⸤Poll⸥ ka-lkuna pepu ⸤Onesimas⸥ yu ungma nimbu sirindu kene yu ⸤numanu topele topa⸥ ‘Sika’ nimba tondulu mundupa piliipa ⸤Krais-nga yili⸥ mulurum mele molemáliinga ekupu yu nanga málu ⸤mele⸥, na yunga lapale moliu. 11 Ui sika yu-ni nunga kongun kaí te mimi-sipa naa tinjirim akiliinga-pe ekupu nu-kene olsu wasie yu-ni mimi-sipa liipa tapunjupa kongun tenjimba yili molemú.
12 Ekupu yu nu molluna “Kelkunu pui.” niker akiliinga-pe okum kene na aima numanu buni tekem. 13 Na-ni temani-kaiéle topu silsiliipu andurundeliinga na liiku ka siring kene ka-lkuna peliáliinga Onesimas-ni nunga alko topa “Na liiku tapunjukunu ka-lkuna nokani mului.” nilka 14 akiliinga-pe “Nu-ni aima sika na liiku tapunjani akiliinga nu molluna yu ui naa upili. Yu pipi sipu nunga nimba na liipa tapunjupili.” nimbu we karaye tepu naa nimbú. ‘Nu-nunu numanale-ni piliikunu kene teani.’ nimbu ‘nu molluna yu upili.’ niker. ⸤Nu molluna ombá kene yu penga molupa temba mele nu-nunu pi liani!⸥
15 Pe nu mulunina ⸤Onesimas⸥ alsupa sukundu omba nu-kene kam-kamu molumbandu yu ui laye-selenga nu molluna mundupa kelepa kolea tenga purumunje. 16 Akiliinga-pe aku lem yu nunga kongun we tinjili kendemande-yili mindi molumbandu aku-sipa ulele wendu naa urum. Yu sika nunga kongun we tinjili yili molemú akiliinga-pe ekupu akili mindi mólu. Ekupu nunga angenale kepe molumba kene nu-ni yu aima numanu munjunéliinga aku-sipa mele ulele wendu urumunje. Na-ni Onesimas aima numanu monjupu ‘Yu nanga aima sika kandi-anginelenje.’ nimbu piliiliu. Pe yu-kene nu-kene wasie Auliele-nga angininglu-sele mulungléliinga kepe, yu nunga angenale molupa kendemande-kongunale tenjipa konjumbaliinga, ‘nu-ni Onesimas yu numanu monjuni mele olandupale, na-ni yu numanu monjuliu mele mandupa.’ nimbu piliiker.
17 Akiliinga, ‘Na nu-kene wasie Krais-nga kongunale tapú-topulu telembulu.’ niku piliillu lem na olka kene “Wasie molambili ui.” nilkena mele ⸤Onesimas⸥ yu ombá kene “Wasie molambili ui.” niani. 18 Onesimas-ni nu-kene ulu te tepa kis-sirim, mola yunga pundu te nu-kene angiliirim lem akuma Onesimas-ndu “Pundu tui.” naa nikunu, munduku kilui. Pundu akuma pali na-ni tombáliinga nanga bili tunjui. 19 Na Poll, na-nanu pundu akuma tombaliinga nanga kili-ni nanga bili pepá ilinga tokur. Akiliinga-pe nu na-kene pundu te angiliimú, ‘pundu akili naa nindu lem nu we piliikunu mollu.’ nimbu piliiker. Nu na-kene pundu angiliimú akili, na-ni nu liipu tapunjurundeliinga nu kona molku konjukunu mindi puni ulele nu-kene pelemú kanili. 20 Ang, ‘Auliele-nga kongun te tenjambu.’ nikunu na liiku tapunjukunu ulu kaí te ti. Olsu Krais-nga yisele molembuláliinga nu-ni na numanu kaí pípili ulu te ti. 21 Na aima mimi-sipu piliiker: ‘Na-ni “Ti.” niker ungele nu aima piliiku liikunu tiní.’ nimbu piliipuliinga pepá ili nu topu siker. ‘Na-ni nu “⸤Onesimas-kene⸥ teani.” nimbu mawa teker akili nu-ni aima olandupa yu liiku tapunjukunu tiní.’ nimbu piliiker.
22 Na ung te wasie mawa tekerko: Na piliikerele, ‘Eni Pulu Yili-kene nanga niku popu toku mawa tenjilimele mele yu-ni piliipaliinga ‘Na eni molemelena wambu.’ nimbá.’ nimbu piliiker. Akiliinga ‘na nunga lku ombu pembáliinga lku-sulumina te teku mimi tekunu nosunjui.’ ⸤nimbu mawa teker⸥.
23-25 Poll-ni Pepá Topa Pora Sipa Kene “Mului.” Nirim Ungma
23 Yi Epaporas, yu Krais Yesos-nga kongun tinjirimeliinga yu ka siring, ekupu olsu wasie ka-lkuna tapú-topulu pelembulale, yu-ni “Nu kapula molluye?” nimba, nimba mundukum. 24 Na-kene wasie tapú-topu kongun telemulu yi Mak kene Aristakas kene Dimas kene LLuk kene enini “Nu kapula molluye?” nikimiliko.
25 Auli Yesos Krais-ni eninga minima we kondu kolupa mulupili molai.
 
⸤Aku manda niker.⸥