12
Nathan David i Kaorumatani
1 Bada peroveta Nathan i porai, David kurina, ba maranai i botu kurina wai, i wona, “Sebasebare asi ruwamo meyaga kesana kamonai si mamana. Sebarena kesana marimariyina ba kesana moyamoyakina. 2 Sebare marimariyina ana aba payapayaya si pesara saki, 3 ba sebare moyamoyakina karinai wai kega awaika ba, lamb wasikena wotuna kesanaikei i gimoni. Ba i potai kata natunatuna koi karinai si rakata, ba yabata si kamkam ba si tomatoma, ba yebo tokaranai i dudauwa. Nanakasike bage natuna wasikena.
4 Kao kesana wagawaga biyina i botu marimariyina ana ku yove. Saba sebare marimariyina kega ana waina kata ana aba payapayaya kesana ita kasibunui kam kana wagawaga kairavina ita bobunagi. Saba sebare moyamoyakina ana lamb wasikena i yauni ba kam i bobunagi kana wagawaga kairavina.”
5 David i yagisi saki, sebare marimariyina kurina ba i wona, “Bada yawayawasina kana wabai, niko sebare ina rabobo! 6 Niko wose goyo tavetaveyina i wosei ba, kega i kamyosukuwei, kairavina lamb asi 4 ini tepari sebare moyamoyakina kurina.”
7 Damanina Nathan, David i wonei, “Sebarena wai kom! Bada Israel asi God, nikasike e wonawona, ‘Kom ai boroim kata Israel asi taupauma ba, Saul nimana kamonai a bopaparim. 8 Am bada ana yove a berim ba kaokaowana ku nimam a terisi. Israel ba Judah asi basileiyisi a berim. Abisiri yai nikona i yogiyogi saki wai, yebo kaikapo sakina ata berim. 9 Awaika kairavina, Bada wonana kui kasikotobi ba matanai niko wose goyona ku wosei? Ba Hitti biyina Uriah, Ammon biyisi asi seri yai ku kasibunui ba, kaowana ku yauni i karimi yai. 10 Kona kairavina, karaku ba nakai i nae wai, niko seri kega am yove ina kasibau taveyei, kairavina kui gigimiku ba, Uriah kaowana ku yauni, i karimi yai.’
11 Bada nikasike e wonawona, ‘Am yove damana kamonai kam biuwa ina botu kurim. Ba matami yai kaokaowam, kao boraborai ana yauna ba sebare kesana gwabimi yai ana berei ba debai yabata sina dauwa. 12 Kom baibuni ai nikona ku wosei, saba kom kurim wai debai, Israel biyisi matasi yai ana wosei ina tupuwa.’ ”
Nathan i kaobeyei, “Bada am piragagoyona i yauna taveyei. Ba kega kuna rabobo. 14 Saba niko wose ku wosei wai Bada kana waba ku gigimi, kona kairavina, wai natum sebare kuni tuwei wai ina rabobo.”
15 Nathan i veramaga ana ku yove murinai, Uriah kaowana David karinai pipiyaikei i tuwei wai, Bada gubaga raoboraobo i porai kurina kata i gubaga saburere. 16 David, God i baba kuwakuwayei pipiyaikei ana yawasa kairavina. I siya ba i riu ana ku yove kamona ba pomai wai tano ai i dudauwa maratom. 17 Warawaraetesi ana yove yai, parinai si msiri ba si babai ita bomsiri yabata sita kam saba i totoyana ba kega ana waina yabata sita kam.
18 Kao kana bi 7 kamonai pipiyaikei i rabobo. Ba David ana saibisaibirisi wonina si nagarei. Si wona, “Pipiyaikei yawayawasinai wai, David kurina tabi sisiya ba kega i nonorita. Mekabage tana wonei kata pipiyaikei i rabobo? Muri yai ba ina kayo bisiragena meyei.”
19 David ana saibisaibirisi i kinanisi kosi wata si biponasimsim wai, damina i yauni kata pipiyaikei i rabobo, wai i toiruba, “Kata pipiyaikei i rabobo kona?”
Ba si kaobeyei, “Eee, pipiyaikei i rabobo.”
20 Damanina David tano ai i dudauwa wai i bomsiri ba i towa bunabunaga, i mutu, ba i gara rutaveyei, ba i nae Bada ana ku yove ba i bopepetei. Kona murnai i veramaga ana ku yove ba i baba wai kam si bobunagi ba i kam.
21 Ana saibisaibirisi si toirubai, “Awaika kairavina nikasike ke wosewose? Pipiyaikei yawayawasinai wai ku bisiya ba ku tutou, saba karaku pipiyaikei i rabobo wai ku bomsiri ba ke kamkam!”
22 David i kaobeya, “Pipiyaikei yawayawasina i mamana wai, ai siya ba a tou. A nosi bage Bada iti nuwanuwaniku ba pipiyaikei yawasina ita mana. 23 Saba karaku kona wai i rabobo, awaika kairavina ani siya? Rubana ana yawasa ani neveramagei kona? Kurina ana nae saba kona kega rubana ina veramaga kuriku.”
24 Damanina ba David kaowana Bathsheba i morumorubi, ba i nae yabata si dauwa. Ba i tuwa wai natuna sebare ba kana waba si yorei Solomon. Ba Bada pipiyinaikei i nuwayauyauni, 25 ba Bada i nuwayauyauni kairavina wona i porai peroveta Nathan kurina kata sebareikei kana waba ita yorei Jedidiah.