1 Kata bidamanina i mana ba ka tauya ku Italy kupurina maranai, Paul patupatumisi mutusi yabata, taupauma ana abiabiyisi kesana, kana waba Julius ku yarona si terisi. 2 Adramyttium asi ku waka ka geru ba ka kuka ba kasibau tore baranai, ba moyu nununai ka nae ku Asia kupurina. Ba Aristarchus, Thessalonica sebare Macedonia kupurinai i botu wai kona yabata.

3 Mara i tom wai ka verakasibau ku Sidon,*Sidon ba ku Caesarea wai 120 km rubana. ba Julius ana yagaire yai Paul i boterei i gakira turaturana, kurisi kata ana waina awaika wai siti baisi. 4 Ba namai ka rukasibau mena ba Cyprus neyarina, wakunai wata ka nae, kairavina sibe i tobeyebeyi kai. 5 Ba boga tara yaraga kai garubonei ku Cilicia kupurina, ba Pamphylia kupurina wata ba ku Myra meyaginai ka riu, kona wai Lycia kupurina kamonai. 6 Namai Julius waka i panani i nenae ku Italy wai i uwana geyikai.

7 Ba kao pesarisi kega ka nae yagiyagina, ba kai baga saki, yepo ka riu ku Cnidus. Saba sibe i tobeyebeyikai wai, ka kuka kai garubona ku Crete neyara wakunai wata ka nae, ba Salmone ka tupasairei. 8 Tore baranai kai baga ka botu ku (kupura kana waba) Moyu Gairena, Lasea meyagina gwabinai.

9 Mara i veoroma saki namai sibe goyona kairavina kai baga ba enagai ama bowagawagana wai aba naganagarina, ba nuwatoai wata ka veravera. Kairavina karaku wai bisiya Kaona†Nikona wai Bisiya Kaona Jew biyisi asi mara kaobaisiyena, ba kaikapona kesana. Kona kaonai si bisisiya ba priest kaikaposi pipiya asi pirago goyo kairavisi i puyopuyo bunuwa (Lev 16; 23:26-32, Num 29:7-11). Kona maranai wai September damonai, kona October dagudagunai. ikakaba. Paul i kaobinonorisi, 10 “Pipiya, a kinakinani wai ata wagawagana wai, ina piropiro saki ba goyo kaikapona sakina ina tupuwa waka kurina, ba sawara ba yebo kota kurita wai nina tana kai mana.” 11 Saba taupauma ana abiabiyisi asi bada, Paul ana sisiya ita nonori wai saba, waka aba yabiyabi biyina, ba waka badana ana sisiya i nonori. 12 Ba bodu maranai wai kega moyu gairena ba namai kata mana, wai koroto kaikapona asi waina kata vera damana ku Phoenix‡Phoenix ba ku Moyu Gairena ana rabaraba wai 64 km ku marasipuna mena. ba namai kata koba. Kona wai Crete biyisi asi moyu gairena, okowa sibena ba kariwabo sibena matasi.

13 Ba kariwabo i dagui i tosisini maranai si nosi kata rubana si wosei wai, asi sopo si taina geyei ba, Crete torena baranai wata si kuka si nae. 14 Kega rabarabana ba sibe kaikapo sakina yabarata neyarai i botu. 15 Kata waka i ravi wai kega rubarubana sibe kata gebeyei, wai ka boterei i kasi nunurikai. 16 Neyara yogiyogina kana waba Cauda, wakunai wata ka nae, ba kai baga saki kata, bi tarabonabona wakana yogiyogina kata taina geyei. 17 Ba saibisaibirisi si taina geyei ba, waka kaikapona dobona uramai si kausi, si tombibiri ba si kau kikisi, kairavina si nagara ku Syritis maratete siti garu geyisi wai sopo si garu kirei ba nuwatoai i kasi nunurikai. 18 Ba mara i tom wai sibena i vera tupetupena wai waka enaga ba sibe i torikarikai wai waka sabisabirisi sawara si garu kikirana. 19 Ba kao bitonuinai, waka bagibagi sawarisi mutusi si garu kikirana. 20 Kao pesarisi kamonai, kao ba gwamegwame kega ka kinana, ba sibe kaikapona i veravera tupetupena wai, ama nota si peku kata kega kata yawasa.

21 Ba kega ka kam yepo kao biyamo si kakaba murinai, Paul basusi yai i msiri ba i wona, “Pipiya, au sisiya kota nonori ba kega Crete, tati sumarei wai niko goyona kega tata panani, ba sawara kega tati siwasiwana. 22 Ba a kaobitoraimi kata koi maragata! Kega kesana kotoi ana yawasa ini siwani, saba waka wata ina rukwauruba. 23 Yauku niko God karinai ba a bosaibisaibirei wai, pomai ana aneya i msi ratu kuriku, 24 ba i wona, ‘Kega kuna nagara Paul, kom Caesar naonai kuni msiri, ba God ana binuwanuwana kurim wai, pipiya yabata ko bowagawaga wai ereonowasi sina yawasa.’ 25 Kona kairavina koi maragata! Basuna God a bigeruwei ba i woniku wai nanakasike ina tupuwa. 26 Saba neyara kesanai ina kasi geyita.”

27 Taparoro ruwamo si kakaba pomnai, Mediterranean Enaginai karaku wata yoyo si tanikai pom basunai wai, waka pipiyisi damisi si yauni kata, matapa ku tepa ka veraverakasibau. 28 Kona kairavina rubana uramina si garu kirei ba si panani kata enaga raguna si yauni wai 120 meter rubana ba mara yogina murinai si yauni wai 90 meter rubana. 29 Si nagara kata waka ku akima iti kam gaeni, wai sopo asi bata waka murinai si garu kikirana, ba asi waina mara ita tom yagina wai kairavina si rupari. 30 Waka pipiyisi asi waina sita vera siti sumarisi, bitarabonabona wakana yogiyogina si tere kirei ku enaga, ba si wose bage asi waina sopo waka naonai siti garu kikirana. 31 Saba Paul, abiya badana ba abiabiyisi kurisi i wona, “Abisiri yai waka pipiyisi kega sina mana wai kega tana yawasa.” 32 Damanina abiabiyisi urama si tara yaragi ba bitarabonabona wakana yogiyogina si karuwei.

33 Mara i tomtom wai, Paul i baba tupetupena kata sita kam, i wona, “Taparoro ruwamo ko binuwapoya saki kairavina kega ko kam. 34 A kaotupetupenimi kata kam kona kam wai kona yawasa. Kega uyawim kesana gayamimi yai ina siwana.” 35 Nikona i wonei murinai, bread i yauni ba ereonowasi naosi yai, God kurina i kaikaiwa. Damanina ba i kiyatomni ba i kani. 36 Ba nikona si kinani wai nuwanuwasi i tora ba ereonowasi si kam. 37 Ba ereonowakai wakai ka geru wai ama 276 rubana ka geru. 38 Si kam siyabagi i kakaba murinai, waka bi tapeyanina kairavina wai wheat si garu kikirana ku boga.

39 Mara i tom wai kupura si buruburuwei saba moyu segasegana si kitai, ba si damanina kata waka nakai siti garu geyei. 40 Sopo uramisi si yaraga ba bogai si boterisi si sonaga, ba yabiyabi uramisi si botavetaveyana ba waka naona kukana si taina geyei, ba ku sibe matana si tupa tatari, ba waka ku tore mena si vera geyei. 41 Saba waka sega maraetena i gaeni wai, kona i ravi ba naona i garu geyei. I kirai wai kega rubana ita bokwayo, ba waka murina yoyo kaikaposi si kasi rikarikai.

42 Ba abiabiyisi asi waina, patupatumisi siti kasibunuwa kata kega kesana kotoi ita toiya ita bogae ba ita vera. 43 Saba abiabiyisi asi bada ana waina Paul yawayawasina ita mana wai i gesisi. Ba iyabosi toiya si kuiri wai i kaotuneisi siti nao siti sou ku enaga, ba sita toiya ku tepa. 44 Ba mutusi toiya kega si kuiri wai waka i kasirikarikai wai keyamisi si botawani, ba nanakasike pipiya ereonowasi yawayawasisi ku tepa si botete gae.