1 Maranai yawayawasi kai kabo tetegae wai kabo panani, kata neyarina wai kana waba Malta. 2 Neyara biyisi asi yagaire i rakata saki kurikai. I kusakusana ba yaugura kairavina wai keyama si kasiri ba ereonowakai si kaikaivikai. 3 Paul keyama i tubitaura ba i kasikasiri ba mota goyona keyama borana damina i yauni wai nimana i rosai. 4 Maranai neyara biyisi motana si kitai nimanai i roroke wai si kaoboneyana, “Niko sebare memena bage kasibunuwa bitana ba bagunai bogai itoiya gae, saba biuwa ina yauni wai kega ina yawasa.” 5 Saba Paul motana ku keyama karakarasina i kasitaveyei, ba kega kesana goyona i panani. 6 Ba neyara biyisi si nosi bage ita boruruwei kona ita peku ita rabobo. Saba si potapota kabakaba ba kega kesana awaika kurina i tupuwa si kinani wai, asi nota si birai ba si wona, “Niko sebare wai kona god.”

7 Ka botetegae gawarina gwabinai wai neyara kaiwabona kana waba Publius ana kupura. Kona i kaikaivikai ba ka nae ana ku yove mena ba kao tonu i payapayayikai. 8 Ba Publius tamana wai nai, i gubaga i dudauwa, sini borabora ba kamo vera i yauni. Paul i nae i kinani ba i rupari i kakaba wai, nimana ku tepana i terei ba i yawasi. 9 Damanina ba nikona i tupuwa wai, gubagubagisi ereonowasi si botu wai i yawasisi. 10 Kona kairavina keta pesarinai si bopuyopuyokai ba ka bobunaga kata tauya wai, kama keta tamasina si berikai.

11 Nawaravi tonu murinai, ba bodu ba sibe kairavina waka neyarai i mamana wai, ka geru ba ka nae. Wakana wai Alexandria biyisi asi waka, ba tarabibisaka asi ruwamo Castor ba Pollux gayamisi waka naonai si taura. 12 Ka verakasibau ku Syracuse meyagina ba kao tonu namai ka mana. 13 Ba namai ka kuka ka nae ku Rhegium, meyagina mena ka verakasibau. Mara i tom ba yawara sibena i kasibau wai, kao ruwamo ba ku Puteoli ka verakasibau. 14 Ba namai bigeruwana biyisi mutusi ka pananisi, ba si baba kata taparoro kesana yabata kata mana. Damanina ba nanakasike ka botubotu, yepo muri yai ku Rome ka verakasibau. 15 Rome bigeruwana biyisi wara si nonori kata ka botubotu wai, mutusi si botu ku Appius bigimona gawarina, ba yebo mutusi si botu ku meyaga kana waba Tavern asi Tonu ba namai si vera beyikai. Paul i kinanisi wai nuwanuwana i tora ba God i kaikaivi. 16 Maranai ka verakasibau ku Rome wai, taupauma ana abiabiyisi asi bada i damanina kata Paul ikesina, ita matupa ba abiabiyina kesanaikei ita potapotai.

17 Kao tonu murinai, Paul, Jew biyisi asi babada i yorisi si notuwa. Ba Paul kurisi i wona, “Warewaresiku, bagunai wata kega goyona a wosei ata pipiya kurisi, kona wawata asi dudura ai kasikotobi, saba Jerusalem yai si patumiku ba Rome biyisi ku yarosi si teriku. 18 Kosi si buibuiyiku ba asi waina sita tombauniku, kairavina au goyona kega, ba rabobo sarobina ata yauni. 19 Saba Jew biyisi si kaosaira wai nota a yauni kata, Caesar kurina ati baba,*Acts 25:11 ba kega au pipiya, damana ati kunumakisi kairavina. 20 Kona basuna, ai baba kata ata kinanimi ba yabata tati sisiya. Israel biyisi asi Baibaiyawasina Kaobaisiyena kairavina wai yauku chain yai si kausiku.”

21 Ba kosi si kaobeya, “Yakai kega pepa kesana Judea yai ka yauni kom ibi sisiyim, ba kega kesana waresita namai i botu wai am goyona i sisiyei kona i kaobigoyonim. 22 Saba ama waina am nota kana, kuiri kata pipiya kupura ereonowanai, ami bikeresiyana te kaobisipuwei.”

23 Kata kao kesana si binei, Paul sita nonori kairavina ba koroto kaikapona kona kaonai si notuwa, Paul kurina ba didibarai i dagui God ana basileiya, i bibeyebeyisi yepo i pom ba Moses ana kairuwana, ba peroperoveta asi kiruma i mamatarei kurisi kata, nikosi sisiya ereonowana Iesu kairavina wai i nuwatainisi kata siti geruwei. 24 Ba mutusi awaika i sisiyei wai i nuwatainisi ba si geruwei, saba mutusi kega si geruwana. 25 Ba kosi wata kamosi yai kega si nuwanuwa kesana ba si bibogoritana wai Paul ana sisiya pusirina i terei, “Kanuma Kaobaisiyena i suwona, maranai wawami kurisi peroveta Isaiahi ana kiruma kamonai i wona,

28 Kona kairavina au waina kona kuiri kata God, ana bibiyawasina wai Gentile kurisi i porai, kata sina nonora!” 29 Ba nikosi wona i sisiyana i kakaba wai Jew biyisi ereonowasi, ikesisi si kawapata ba ere yagisisi si gorita.*Niko kewa kiruma wadubosi mutusi kamosi yai kega e mamana.

30 Bodu ruwamo kamonai, Paul ana yove i bimaisani wai namai i mamana, ba iyabosi wata si botubotu si raugenari wai i bikaikaivisi. 31 Ere tepa torana God ana basileiya i raumamarei ba Bada Iesu Baibaiyawasina Kaobaisiyena kairavina i beyebeyena ba kega kesana kotoi i gesei.