21
Mota Kwari Kadakadarina
4 Ba Israel biyisi Hor koyanai si tauya si nae Enaga Taratarana parinai wata Edom si yewo bibiri. Saba pipiya si yewo yepo si netotoyana, 5 ba pipiya God ba Moses si kaosairei, si wona, “Awaika kairavina Egypt yai ku urabai kai ba kupura momnai kana rabobo? Nina wai kam kega ba okowa kega ba niko kam sinikikaiyina kega ama waina!”
6 Ba Bada mota gomara rutainisi ku kamosi i poraisi ba pipiya si kanisi wai Israel biyisi pesarisi si rabobo.*1 Corinthians 10:9 7 Ba pipiya si botu Moses kurina ba si wona, “Yakai Bada ba kom matami yai kai sisiya wai piragagoyo ka wosei. Ke rupari kata Bada mota kariki yai ina yauna taveyana.” Kata Moses pipiya kairavisi i rupari.
8 Bada Moses kurina i wona, “Mota ke wosei ba ku ariri ke kasiratui ba ki totori. Ba kotoi wata mota ina kani wai, ina gagawa motana ina kinani wai ina yawasa.” 9 Kata Moses mota kwari kadakadarina i wosei*2 Kings 18:4 ba ku ariri veoromina i kasiratui ba i totori.*John 3:14 Ba kotoi wata mota i kanikani wai mota kwari kadakadarina i kinakinani wai i yawayawasa.
Si Wagawaga ku Moab
10 Israel biyisi si tauya mena wai Obot yai si kwanatu. 11 Ba Obot si kasibau taveyei si nae Iye Abarim kupura mom Moab kao e gegae wai namai yebo si kwanatu. 12 Ba namai si nae ba Zered kawa sanaginai si kwanatu. 13 Ba namai si nae ba Anon okowina parinai si kwanatu, kona wai kupura momna ba i nae ku Amori kupurina kata Arnon wai Moab ba Amori biyisi asi biparaparata.
Sihon ba Og
21 Ba Israel biyisi kawariyonayona si poraisi Sihon Amori biyisi asi taupauma sita wonei, 22 “Ke kinana momikai ba am kupura kamonai wata kana nae. Kega kani utusaira ku kwapu kona ku vine baona kona meo doguai okowa kana toma. Ba totorina taupauma ana keta badai ka nenae yepo kani garubona.”
23 Saba Sihon kega i damanina kata Israel ana kupura kamonai wata sita nae ba ana abiabiyisi ereonowasi i bobunagisi ba i kasibau ku kupura momna Israel ita gebeyesi. Maranai i verakasibau ku Jahaz wai Israel biyisi yabata si rauwa. 24 Saba Israel biyisi si kasibunuwanisi ba asi tano Anon okowinai ba i nae ku Jabbok Ammon parasina, kairavina asi parata wai gari bibirisi.
25 Ba Israel biyisi Amori biyisi asi meyaga kaikaposi ereonowasi si yauna si karisi yai Hesbon ba meyaga yogiyogisi yabata.
31 Ba Israel biyisi Amori biyisi asi kupurai si mana.
Taupauma Og Israel Byisi si ge binubai
32 Moses nanaga biyisi i poraisi si nae ku Jazer murinai wai Israel biyisi meyaga yogiyogisi kona kupurinai si yauna ba Amori biyisi nai si mamana wai si kwabinisi si kasibau. 33 Ba si msi taibira ba keta si bonunui si gae ku Bashan, saba Bashan taupaumina Og ana abiabiyisi ereonowasi si kasibau ba Edrei yai si panapanana ba yabata si abiya. 34 Bada Moses kurina i sisiya, “Kega kuna nagarei kairavina ana pipiya ereonowasi ba ana tano yabata ku yarom a tereterisi. Mekabage Amori biyisi asi taupauma Sihon Heshbon i bitaupauma wai kurina ku wosei wai kesanina ke wosei kurina.” 35 Israel biyisi Taupauma Og natunatuta yabata ba ana abiabiyisi ereonowasi si kasibunuwana kega kesana yawayawasina si boterei. Damanina ba Israel biyisi asi tano ereonowana si yauni si karisi yai.