22
Balak Wara i Porai Balaam kurina
Damanina ba Israel biyisi Moab guburinai si wagawaga si nae Jordan okowina parina si kwanatu ba sepinai wai Jericho. Kata Zippor natuna Balak awaika Israel biyisi Amori biyisi kurisi si wosei wai i kinana roboi. Moab biyisi Israel asi koroto si kinani wai si nagara saburere bisuwona Moab biyisi nagara i bobunuisi. Ba Moab biyisi Midian warawaraetesi kurisi si wona, “Niko koroto kaikapo wawasi sina bomsiri wai bull mekabage gwanewa te kanikani wai nanakasike sina kam pupuna taveyei.”
Kona maranai wai Moab biyisi asi taupauma Balak, kawariyonayona i porai si nae Beor natuna Balaam ana kupura Pethor okowa parinai i mamana wai si yorei. Balak i wona, “Dam Egypt yai si verakasibau ba dobu si bonuwei ba gwabiku ai si kwanatu. Karaku ke botu nikosi pipiya kuna kaonawaisi kairavina kosi kuriku wai si maragata saki. Memena bage ana getawanisi ba niko kupurai ana kwabina taveyisi. Kairavina a kuiri kata kosi ke bigairenisi wai bibigairenisi ba pipiya ke kaonawaisi wai te paipaiwara.”
Moab biyisi ba Midian biyisi asi warawaraetesi si kawa wai suwarina si yauni ba si tauya Balaam kurina ba Balak awaika i wonei wai, si karaberei. Balaam kurisi i wona, “Niko pomnai kau kupama kona terei, ba Bada mekabage ina kaobeyiku wai ana wonimi.” Kata Moab babadisi yabata si mana ba si dauwa.
Ba God i botu Balaam kurina ba i wona, “Mekosi pipiya yabata ko mamana?”
10 Balaam God kurina i wona, “Moab biyisi asi taupauma Zippor natuna Balak niko wara i porai kuriku. 11 ‘Dam Egypt yai si verakasibau ba dobu si bonuwei. Karaku ke botu kairaviku kuna kaonawaisi. Memena bage karaku mosi animsi beyisi ba niko kupurai ana kwabinisi sina kasibau.’ ”
12 Saba God Balaam i wonei, “Kega yabata kona nae. Ba kega kuna kaonawaisi kairavina Yauku, ai gairenisi.”
13 Balaam didibarai i bomsiri ba Balak ana babadisi i wonisi, “Ko veramaga ami ku kupura kairavina Bada i gesiku kega yabata tana nae.”
14 Ba Kata Moab babadisi si veramaga Balak kurina ba si wona, “Balaam i totoyana wai kega yabata ka botu.”
 
Kata Balak babadisi damana i porasi Balaam kurina. Ba i wonei kata iti maisa sakiyei maranai ita nae ba Israel biyisi ita kaonawaisi. Saba niko maranai wai God, Balaam i wonei kata pipiyisi yabata sita nae Balak kurina ba God awaika ita wonei wai nanakasike ita wosei.
Balaam ana Donkey
21 Ba Balaam didibarai i bomsiri ba ana donkey i bobunagi ba Moab babadisi damana yabata si nae. 22 God wai i yagisi saki maranai Balaam ana ku donkey i geru ba ana saibisaibirisi ruwamo yabata si nenae, wai Bada ana aneya ana ketai i msiri kata ita gebeyei.* Jude 1:11 23 Balaam ana donkey aneya i kinani seri yaronai ba ketai i msiri wai i utusaira ku kwapu. Balaam donkey i ravi ba i taina bibiri ku keta. 24 Damanina ba Bada ana aneya vine baosi ruwamo garisi basusi yai keta kiudunai i msiri. 25 Maranai donkey Bada ana aneya i kinani wai ku gara i ratu ba kaena iuna raturatui wai yebo ba i ravi meyei. 26 Damanina ba Bada ana aneya yogina i nae ba keta kiudunai i msiri kega rubana ku geduna kona kasuna itimsi taibira. 27 Maranai donkey Bada ana aneya i kinai wai Balaam tepanai ba i kenokira kata Balaam i yagisi ba donkeyna ana ruwakunai i ravi. 28 Ba Bada donkey kawana i botatari ba Balaam kurina i sisiya, “Awaika a wosei kurim wai mara tonu ku raviku?”* 2 Peter 2:15,16
29 Balaam donkey i kaobeyei, “Balaam i para, ku wosiku wai kau kinana bage neganega, seri yaroku ai, wai karaku ata kasibunuim!”
30 Donkey Balaam kurina i wona, “Yauku donkeyna kesanina niko mara veoromina ke gerugeru. Meyana nikasike kurim a wosei kona kega?”
“Kega,” Balaam i wona.
31 Damanina ba Bada Balaam matana i botatari ba aneya i kitai ana seri yaronai i bokabari ba keta basunai i bimsiri. Kata gayamina i tere kirei ba i peku ku tano. 32  Bada ana aneya i toirubai, “Awaika kairavina am donkey nikosi mara tonu ku ravi? Yauku a botu am keta ata gudui kairavina am wagawaga kuriku kega gairena. 33 Ba donkey i kitaiku wai nikosi mara tonu i utusaira ba kega wai karaku ata kasibunuim ba donkey ita mana.”
34 Damanina ba Balaam Bada ana aneya i wonei, “Yauku piragagoyo a wosei, kega a kuiri kata ketai ku bimsiri kata kuti gesiku. Kega ke binuwagaire wai kata ana veramaga.”
35  Bada ana aneya Balaam i wonei, “Nikosi pipiya yabata ko nae saba, awaika ana wonim wai kona, wata ki sisiyei.” Damanina ba Balaam, Balak ana babadisi damana yabata si nae.
 

*22:22: Jude 1:11

*22:28: 2 Peter 2:15,16