12
1 Taninuways asibabaw tasiyas kweiboug, isimounids bwein. Kadiloka ya̱kids bitatoukums va̱gan bitasawls bwein, ked towen waseg. Kwanad moumouvit bitalev. Sinap kalbaleb bitapiyev peinan mouvitan isilbwadeid. E, kadiloka bitatoukums bitasawls bwein dakeds towen wamatads.
2 Yeisuw takinbunikes, mtowen datamumugs peinan isimounid bwein, mamagina absilamaw son abiyokous mtowen. Kweiboug Yeisuw nises ven watinow, nanon nag inek liba̱lab mwa̱saw-nen, tage bo ikakin igaw tut wanakougwaw mo bimwa̱saw. Mapuna itam klos mamyuyan-nen, musinan klos ikaptul; ikous, Yowbad mo isek a̱ban wanaka̱tay, inakabkaleiwag waseg.
Yowbad iyadumwa̱luds
3 E, taninuways Yeisuw. Takalbalebs singaya ikamliwes, tage nag ipiyev inawotet towen. Yakamiy ma̱wan, awoum bikawegweis woumiy. Awoum bukusoumats, awoum.
4 Yakamiy nukuvvatays waseg sinap kalbaleb, tage nag kweitan bwabwagan kuba̱nes wawoumiy, nag kukwanigs ma̱wan Yeisuw, nag.
5 Adok kunumlaves inageiguy towen nidokeimiy nitun tonen, liva̱nen nises mamagina:
“Natug yak, kukin daGuyaws biyadumwa̱lum, awoum kupiyev.
Kukin new bikow beiweim, awoum beivag ampwa̱yat.
6 Kukin daGuyaws sivinan ya̱kids, mo biyadumwa̱luds.
O kukin bita̱meid nitun ya̱kid, mo bikow nanew beiweid.”
7 Kukin abamiy bigeg, bweina kutoukums, peinan iyadumwa̱lumiy. Yowbad idokeimiy nitun yakamiy. Peinan timdayas tasiyas bo iyadumwa̱luds nitsiyas ya̱kids.
8 E, babaw ya̱kids ma̱wan. Kukin tamam nag biyadumwa̱lum, adok nag natun tonen ya̱koum. Adok tobwag gamag natun ya̱koum.
9 E taninuways, timdayas ven watinow biyadumwa̱luds mo bitagoulus tasiyas. Ikadiloka bitagoulus beibwein Tamads walba̱lab, peinan kululuwads nises waseg towen. E, bitagoulus towen mo bitamovs.
10 Timdayas ven watinow tut kayakus waseg, kukin beitam ninous mo biyadumwa̱luds, tage Yowbad iyadumwa̱luds va̱gan bikatimweis adsinaps kamnat, mamagina ansinap tonen kamnat.
11 Tut towen waseg biyadumwa̱luds mo bigidaged wouds; tage nag bikalin nuwads waseg. Igaw gog tut wanakougwaw anagids mo bitaba̱nes, mamagina adsinaps didumwal son niwal. Kukin bika̱kin matads peinan a̱bads igeg tut towen, igaw wanakougwaw mo bitaba̱nes anagids.
12-13 Kadiloka bukutawtouns, miked bukuva̱ges va̱gan bukusawls beibwein, mo tasiyas takagayals nag bikalouws, tage beibwein kikeis tasiyas mo bitawtouns.
Awoum bitapiyev Yowbad nasiwa̱youb
14 Kutoukums va̱gan simiyas biba̱nes niwal wasigeis yakamiy. Kutoukums va̱gan amisinap bikamnat. Kukin gog nag, nag bukukines daGuyaws.
15 Kuvna̱seimiy. Yowbad nasiwa̱youb awoum biyamkwen kavel wasigeis yakamiy. Awoum mwasanin bikameiliws mo biyagageimiy babaw yakamiy; ma̱wan nugwed bitatom kan mo biyageg.
16 Awoum ge teitan bikanavay mav. Awoum teitan bipiyev sinapun Yowbad, ma̱wan Isaw kweiboug, peinan nigimwal kan, sivtanok ikam, mo taman kiyayan isek bwadan, maysan kan.
17 Kukwakins tut wankuyeim Isaw mo ivag sivinan nakiyay towen; nag gog. Ta-ma̱wan. Isaw singay sivinan bikatilow ansinap, ivva̱lam silma̱nin, tage nag kweitan ked iban.
18-19 Davanuys nitameis kweivaw. Nag ma̱wana ven towen nitassikes, nag ma̱wana kov nigidaged, nag ma̱wana dadub son libgagay o bwaw, o bwa̱gig aygan, o aygan towen tasiyas niliganes mo ilansa, “Awoum vayuwein aygan bisekeids ma̱wan.”
20 Peinan bo iwenes Yowbad anilivan mamagina:
“Awoum gamag o aleimiy bimeis wa̱koy. Kukin aleimiy na̱tan beim, kuweiys dakul waseg, beimat.”
21 E, youd towen nikines, singay ivag aspwa̱yat. Moses-vak ilana,
“Itatat woug, agpwa̱yat.”
22-24 Ya̱kids gog nitameis koy yagan Sayon, Yowbad Tamwamov inaven, Yelusalem walba̱lab. Min-liba̱lab singay babaw katuyouns nimeis silma̱nin sagal avakaein, sisiyas Yowbad angamag babaw niginsaps, yiges bo ilel walba̱lab, sisiy takalawagein youd babaw, mtowen Yowbad, siney kululuwes-wan tasiyas tadidumwals bo niva̱ges bwein asisinap tasiyas, sisiy Yeisuw, mtowen nilivkaes kweivaw kaleiwag, buya̱vin tonen waseg isiwyoubuds, mamagina isiwlikeids va̱gan bitanekes Yowbad. Nag ma̱wana buya̱vin Eibel kweiboug.
25 Kuvna̱seimiy. Awoum ge bukupiyaves mtowen nidibakeimiy. Kweiboug gamag mwasanin ipiyaves towen niguyeids ven watinow, mo ilivatus kalbaleb. Magat bitapiyaves mtowen walba̱lab niguyeids, singaya kalbaleb bitalivatus.
26 Kweiboug aygan ivag mo igewn ven watinow. Tage nagein ilivnek mamagina:
“Sivyuwein bavag mo beigewns ven watinow son liba̱lab.”
27 Ilana, “Sivyuwein,” peinan beigewn mo beikous ven tasiyas, peinan nibunis. Tage youd mwasanin ta-ma̱wan beigewns mo bisesus bisigagas.
28 Kadiloka bikalin nuwads, peinan davanuys kweivaw singay tawtoun; ta-ma̱wan beigewn. Takaleiwag ven towen Yowbad. Adsinaps bwein waseg mo bitayakawanes, bitagoulus, bitavna̱ses beibwein.
29 Peinan daGuyaws mamagina kov ikika̱yeil.