9
Paulaꞌke Boonko Otoi Mooꞌ Kerempuuꞌnaꞌ Biikaang Baito Paku-koo
1 Enang tee, ninka teeꞌ orokomarako diiꞌkoo niiꞌninge tokomeriko tee aaꞌpamaang: Arekeeꞌ, ning ee naning pankaing deeaꞌ? Ning ee kara-okomui-nka deeaꞌ? Ninge ee Jiisuuꞌ Karistooꞌ ooampaꞌ? Diiꞌ ee sinananka deeaꞌ nkaang nko-nko-koo tee-koo Ovoring-koo? 2 Ning niiꞌning-koo kara-okomui-nka deeaung deekoꞌ ning tee diiꞌkoo siraꞌmari oꞌnopeuꞌnung ning Kumponing-koo kara-okovui-nka, diiꞌ dootuuꞌnupoong deentariruꞌnung-koo, ning taaramerira. 3 Nkaang kara-dimpaꞌ teing ning tokomaamaing-koo aung: 4 Arekeeꞌ? Ning ee tauraꞌmaravaꞌ diiꞌankoa taamang-koo nai-koo ntong tovang-koo? 5 Ning ee tauraꞌmaravaꞌ dootuuꞌkoonani nampansira nariꞌ nanuꞌkoo teeꞌ Piita, eeꞌnoko Ovoringe baaraꞌmainkaang eeꞌnoko niiꞌning kara okovuri nkanuka nanaamanaꞌ? 6 Arekeeꞌ, neeꞌ Baanabas naanka nanaankai kemuriiꞌka nko-nko nkoampematoainge mono bauꞌkoonge mantaꞌparioꞌ? 7 Baa naning tee piatooronuka˜koong tavuꞌkoo nanuma taamange baka bauꞌaramaung? Baie tee taamang keempuma sinang nkavuaung? Baie tee naning kauꞌkarenaumo-navontu bauꞌurimaung baka maaꞌkuaꞌ? Otoaꞌ. 8 Eeꞌnoko nantoong biikaang noruꞌ narung teeꞌ minkuamaang ee? A, Moosesi-nung botoi teeꞌ nariꞌ napoꞌ minkuvui otomaung. 9 Eeꞌpinaꞌ daariari otong,
“Boromakaꞌkoong muring daiꞌeriaukaꞌ uiteꞌkoong˜ sinang kauꞌke keꞌdeeꞌkoo botoverima, tee-koo uiteꞌkoo maaꞌkuainaꞌ.” (Boto 25:4)
Kumponinge ee boromakaꞌ narung noruꞌuitaaꞌ teeꞌ minkuvuuꞌ? 10 Niiꞌ ee teeꞌ minkumuriaꞌ? Tee aaꞌ niiꞌ minkumurima teeꞌ daari-antavuuꞌnung. Aiꞌ tee naning kansiꞌmeemeng tee sinang nkavuainaꞌ noruꞌuitaaꞌ teeꞌ meemeng-koo makosi. Eeꞌnoko tee naning sinang-bireꞌ tee sinang-koo niiꞌnariong nkavuainaꞌ noruꞌuitaaꞌ bireꞌkoo makosi. 11 Tee tee enang ninge Tanuaang bakaang kara diiꞌkoo keempansi dei, arekeeꞌ, baruꞌ ee aaꞌnaꞌ mankiꞌdori noruꞌerimang ning pakumeripeuꞌnaꞌkoo? 12 Niiꞌninge diiꞌ eeꞌ noruꞌdaariko, “Niiꞌ bakei bauꞌmaariiꞌnaang,” ninge teeꞌ nariꞌ baruꞌ deto basinooꞌ noruꞌdampipeuꞌ. Nka tee ninge bane makotuioꞌ tee nkomaravaꞌ. Ninge arikananka bane tokoonamuriiꞌ doonko tamung meuꞌpamaung Karistooꞌkoong doorenang tampara arikaꞌantavamiꞌneeng-koo. 13 Diiꞌke ee noruꞌeriaꞌ teing Kumponing bakanava-koo mintoomparimaing teing tee, tee taamang teva-ita nkavamaung? Teing boontudomai mintoomparimainge tee, taamang-koo biikanariong napoꞌ tevaro-ita nkavaamaunge. 14 Teeꞌkoo Ovoringe botomuruꞌ niiꞌ bakaang kara tampara nkavampiri daankiampimaing niikanariong teka tee-koo doorenang tampara-koo nkakampiainge.
15 Teka teing aing ning-koo makosining tee ninge nkavampaꞌ, eeꞌnoko ninge aung nka-koo tampama daariampaꞌ. Makosi, ning moompaing nkavampaꞌ. Naninge daang-antamuaukaꞌnung ning daangamarinaꞌkoo. 16 Tee, eeꞌ: Ninge daankiama tee doorenang tampara tee, tee kapooꞌ ning daangamaravaukaꞌnung tee-koo. Tee, niiꞌnavung taung oꞌnoaꞌ, aung tee daankinang nkoamaaꞌnoaing. Tee doorenang tampara daankiamparui dei ning tee baruꞌ orakaꞌ toraꞌpampeuꞌ. 17 Aung amuriiꞌ nko-nko arooꞌansi nkoampaing deekoꞌ teie tampaꞌ makuꞌmuaing, teka arooꞌamparuko etumuioꞌ nkoampaing deekoꞌ tamung nkoamaaꞌnoaing mooꞌdopa. 18 Aiꞌ ning aremuriiꞌ mooꞌ kompampaing? Tee aaꞌ nkaang mooꞌ eeꞌ oroꞌ: tee kapooꞌ ninge nka-koo makosi karakara tampara-koo tee ninge nkavamparuing. Tee kara tampara ninge daankiansing kapooꞌ otoaruing. Tee tee eeꞌnara nkaang mooꞌ.
Paulaꞌ Baka Avarakoꞌnaꞌ Ookara Nantoong-koo
19 Ning mooꞌ nkavama naning-koo botovotonaaꞌ deeaꞌ, teka ning ninka ootukunung biikaang botovotonaaꞌ deeng-antamaramaung nantoong mmauꞌ Karistooꞌkoo baramparamaꞌnaang. 20 Juꞌnupoong-ankoi tee ning Juꞌnung deemaramaung Juꞌnupoong baramparamaꞌnaang. Teing Moosesi-nung boto-koo kuung otoromanaꞌ ning teeꞌ nariꞌ tee boto-koo kuunung-pinaꞌ deemaramaunge teing baramparamaꞌnaang, bane tee ning tee boto-koo kuung oꞌnoaꞌ. 21 Juꞌdeeaing baramparamaꞌnaang Moosesi-nung Boto-koo damaꞌdue otoromaing ning tee tee boto-koo damaꞌdunung-pinaꞌ deemaramaung. Aꞌnooꞌ tee Karistooꞌ bakaang boto-koo kuung deemari oꞌnoitaaꞌ Kumponing-nung boto-koo damaꞌdue oꞌnoaung. 22 Aruaruꞌoromaing-ankoi ning teeꞌ nariꞌ aruaruꞌmomaunge teing baramparamaꞌnaang. Amentemeng-koo bereꞌmaramaung aaꞌpama, “Makosinaꞌ nkomarama niiꞌning baramparampainaꞌ.” 23 Tee ookara kapooꞌnanka ninge nkoamaung tee bereng-anta-koo tee doorenang tampara, tee-koong biraanke mmauꞌ ninka nariꞌ kompampiiꞌnaang toꞌbii-antamaramaung.
Niiꞌ Ookara Boonko Noruꞌmariri Taremariai Mooꞌ Paning-koo Nka-koo
24 Toꞌbii-anta tee kapooꞌ masikung, aiꞌ diiꞌke ee noruꞌeriaꞌ teing nantoong kuaꞌparimaing deikooꞌkoo tee kuaꞌparimaung namuꞌ, teka narunge mooꞌ nkavumaung. Teeꞌ nariꞌ kuaꞌdariaing mooꞌkoo nkakiriainaꞌ. 25 Ookara moru-nupoong tee paaravarimaung biiꞌka tampaꞌ tanatavariiꞌnaang ootukunairu-koo. Biikaang mooꞌ tee tamung baaꞌkoong baakopo, daꞌdeng maraꞌomaung; teka niikaang mooꞌ tee pankaroonge otoꞌ. 26 Teeꞌkoo toꞌbii-antamari ning kuaꞌmaramaung. Ning tamung auviꞌau kiꞌbitu baiꞌampaung, meuꞌpansi naroꞌ. 27 Nkaang mono doonko siꞌmari meung-antamaramaung Karistooꞌke bamuuꞌnaꞌ otoꞌkoo aaꞌpama, “Damaꞌke ninka duaꞌmaraꞌneenga niiꞌning daankiarankotaaꞌ.”