10
Tampaꞌ Taremariaꞌ Domaang Duaꞌampiꞌneeng Juꞌnupoong-koo Nkoaruꞌnaꞌ
1 Enang tee mmaikoriꞌ, ninge noruꞌantarampiiꞌnaang diiꞌ piamoing teing niumaraang Isireeli-nupoong-koo nkoaruꞌnaꞌ tasiꞌperiiꞌnaang. Teing ookara kamoꞌka boonge nanauꞌning, eeꞌnoko ookara pirung meuꞌ totoꞌpai tankinauꞌ. 2 Eeꞌnoko tee kamoꞌnaanka-koo pirung kuunge nanauꞌnung miruꞌnooꞌ tee ookara teeꞌ meekaꞌantavariruꞌ Moosesi-koo kuung-nupoong deemparima. 3 Eeꞌnoko arikanameensiꞌke nanaama taamang tovang ntong otoaꞌnameensiꞌke ookarai taamang tee narung Tanuaang-etaing naiaakoꞌ. 4 Eeꞌnoko ookarai teri nari ntonari Tanuaang-etanari naiauꞌ, teieta boiaꞌ Tanuaang-aapeita tuuvuko. Eeꞌnoko tee enang noruꞌampiri otong tee boiaꞌ tee Karistooꞌ eeꞌnara teing ninka nanaakoꞌnung. 5 Nka, bane ookara biraanke-poꞌnupoonge, daping ookara-koo teing-koo Kumponing tee dotuaravarukoꞌ biikaang aarumo orara-koo, eeꞌnoko nanaama avitoitoi booroma biikaang mono deraꞌorokoꞌ meeꞌboraꞌ sirakamaaꞌkoo.
6 Teing eeꞌning kapooꞌ nkoaruꞌning teing taaꞌniꞌanta niiꞌkoo niiꞌ koono-anta-kooning orakaꞌnko piamoriꞌneeng-koo teing-pinaꞌ. 7 Teeꞌkoo kumponing tositosinanka daangamperereriaꞌ otoaing teing-koo niiꞌninge nkoaakoꞌnaꞌ. Daari Meekunge tee naumurimaung teinge kumponing tositosinanka siong-koo barearikoꞌnaꞌ aaꞌpuma,
“Teing nantoong paroro pankaing nkoaama, taamang ntong tovang naiaama, donkonaaraiꞌnange moruarima siong-antaveekoꞌ.” (Toro 32:6)
8 Eeꞌnoko kaukauro nkoveriaukaꞌnung. Teing-koo niiꞌning teeꞌ otorokotaaꞌ kenaanka kivora-ita beenaumo kokoreiꞌ [23,000] duaꞌarira boorouꞌ. 9 Eeꞌnoko niiꞌ Karistooꞌ iirang-antanaꞌ nkomariaukaꞌ. Teing-koo niiꞌning teeꞌ nkoarikotaaꞌ boorokoꞌ boruꞌke kakiaariko. 10 Eeꞌnoko ukuusirariaukaꞌ Kumponinge pakururiaung-pinaꞌ tantarima. Teing-koo niiꞌning teeꞌ nkoarikoꞌning Orari-antai booꞌantavuruꞌ. 11 Aing teing kapooꞌ teing-koo nkoaruꞌning niiꞌke oo-koo taaꞌniꞌantananka, Kumponinge daari-antavuuꞌning koono-antamurima niiꞌ asiꞌnaroong-koo oꞌnorining naumurima tutunaꞌnupoong nkoarima opariruꞌnaꞌ biikanaroong-koo. 12 Teeꞌkoo nauramaang, daꞌ purintari donkonii otomaung-pinaꞌ noruꞌdari deekoꞌ bakei tampaꞌ masikaꞌ tanatararavaing duaꞌdaraꞌneeng-koo. 13 Teka tenang kapooꞌ arikung deekoꞌ aiꞌ orara aarumo-koong piai meuꞌduko deekoꞌ eeꞌ noruꞌeaing: daꞌ ookara paara-anta puruꞌkoo makosi. Mmauꞌ daꞌkoo uroꞌnupoonge nantoonge temuriiꞌ paara-anta kuneꞌauꞌnung. Kumponinge bakaning sipuriaung, eeꞌnoko teie tee paara-anta tauraꞌpuaukaꞌnung daꞌ puruꞌkoo, teka tenang paara-anta poko teie tee daꞌ puring-antaruaing mmariꞌnavung nauruma.
Ovoring Bakaang Taamang Maꞌnari Biikaang Ninka Pitueriaukaꞌ
14 Tee tee mmaikoriꞌ ee, baariꞌantarariri otoriai kumponing tositosinanka siong-eta. 15 Ninge daariamang diiꞌkoo diiꞌ onou-poꞌnupoong noruꞌdampima. Tasiꞌperi pinkaꞌeriai kapooꞌ ninge naurampimatomaung diiꞌ. 16 Tereng biraanke-nareng biraanke-antavampima-narenge ee niiꞌ naroꞌkamuriaunge tee ninka ereng Karistooꞌ bakaang ninka? Tevioꞌ taamanavioꞌ pisiꞌmeerimanavioꞌke ee naroꞌkamuriaunge Karistooꞌkoo mono ninka nariꞌ? 17 Tee aaꞌ naroꞌkamurimaung, aiꞌ tevioꞌ tee navioꞌ masikavioꞌ. Bane mmauꞌke niiꞌ, narung mono deeng-antamurimaung naroꞌke tevioꞌke pisiꞌmeerima ookara. 18 Oovereriaing teing Isireeli-nupoong Kumponing siompaamanaꞌ. Tenang taamang naiaama Kumponing-anko boonturomai darimpaamaung, arekeeꞌ, Kumponing ninka ee teing naroꞌkavariaung? 19 Enang arekeeꞌ miruꞌari otong? Kumponing tositosi ee kapooꞌ masikung? Aiꞌ tee kumponing tositosi-koo darimpaamaung ee kapooꞌke? 20 A, teeꞌ deeaꞌ. Tee ninge minkuamaatomaung kapooꞌ tee teing Juꞌdeeaing boontuarima, Daari Meekunge minkuvui otoinaꞌ aaꞌpuma,
“Teing maꞌnari-koo boontuarimaing, Kumponing-koo deeaꞌ.” (Boto 32:17)
Eeꞌnoko piamoaꞌ maꞌnari ninka pisiꞌdeeriiꞌnaang. 21 Diiꞌ tuaantariaukaꞌ ookarenta-ita, aaꞌnoko Ovoring bakanareng-eta eeꞌnoko maꞌnari biikanareng-eta. Teeꞌ nariꞌ napoꞌ ookavaakoꞌka-ita nariꞌ taamaniriaukaꞌ, aaꞌnoko Ovoring bakanavaakoꞌketa eeꞌnoko napoꞌ maꞌnari biikanavaakoꞌketa. Teeꞌ makosinaꞌ deeaꞌ. 22 Arekeeꞌ, Ovoringe iirai uipaariiꞌanta-koo piamorimaunge? Arekeeꞌ, niiꞌ tee-koo ee dau basinooꞌ iirakutanankai?
Piaa Siompampiri Tanatamariaing Karistooꞌ Bakanaꞌ Paaravampima
23 Diiꞌke aaꞌperimaung, “Amutemuriiꞌ kapooꞌ tauraꞌpari otong niiꞌke nko-koo.” Nka tee, ookara kapooꞌ pakupaku-poꞌnung deeaꞌ nantoong-koo. Amutemuriiꞌ kapooꞌ tauraꞌpari otong niiꞌke nko-koo masikaꞌ, teka ookara kapooꞌnankai puring-antamuriaung. 24 Naning baka tanatavarama otoaukaꞌ. Ookara tee narunaꞌ narunaꞌ tanatameeriaing tampaꞌ otoꞌkoo. 25 Tee eeꞌpinaꞌ: Kara otoaruko deekoꞌ kapooꞌnanka baaveroma baaveaavaining tee makosi, naieriaing, nka niaꞌkiriaꞌ boontunang-koo dariniiꞌpinaꞌ norunoruꞌerima. 26 Aiꞌ “Ootukunung kansiꞌpoꞌ tee Ovoring bakaang.” 27 Eeꞌnoko daꞌ naninge masikaꞌanta otoꞌevuaunge bokuruko nanuꞌkoo piarora deekoꞌ makosi, naieaing ookara kapooꞌ aruaining niaꞌkiaꞌ boontunang-koo dariniiꞌpinaꞌ norunoruꞌera. 28 Teka niiꞌnung naninge aaꞌduko deekoꞌ, “Aung kumponing tositosi-koo dariniiꞌ,” tee, teeꞌpuko naieaukaꞌ. Tevunge tee naning bakaang masikaꞌanta orariearupeuꞌ eeꞌnoko bakaang domang mooavari otopeuꞌ. 29 Ninge daꞌ dakaang domang minkuampaꞌ, tee bakaang domang minkuamaang. Bane niaꞌkiaꞌ naiemaung, niiꞌnunge ooruma orakaꞌ noruꞌduꞌneeng. 30 Ninge tee naiamira deekoꞌ Kumponing-koo tampara tampampeuꞌ, teka naiampaukaꞌnung. Piamoaꞌ niiꞌnunge ning orakaꞌ noruꞌmuuꞌnaang. 31 Teeꞌkoo taamang-koo naikima ntong tovang-koo, aming kapooꞌ nkoveaing-koo, nkoveaing ootukunung kapooꞌ Kumponing pankaing-anta-koo. 32 Niiꞌnung naning duaꞌantaveaukaꞌ, arera, Juꞌnung deekoꞌ, Juꞌdeeaing-koong deekoꞌ aiꞌ Kumponing bakaning dootuuꞌnupoong-koong deekoꞌ, teeꞌ nariꞌ ookara nantoong ninge dotu-antavaramaung avuntevunge. 33 Ninka paku-koo besiꞌmaravaꞌ, teka ookara nantoong paku-koo mooꞌariiꞌnaang.