9
Koorin-nupoonge Judiaꞌnupoong Pakuaariainaꞌ
Ee aing, aung aꞌnooꞌ tamung diiꞌke noruꞌeri otoing daariamang teing niiꞌning Kumponing bakaning meekupoong paku-koo. Ninge noruꞌansi otong diiꞌ Koorin-nupoong aaꞌnaꞌ paku-koo piarori otong, eeꞌnoko teeꞌkoo ninge diiꞌ Akaiaꞌnameensiꞌnupoong daangantampimaung aing Masedoniaꞌnameensiꞌnupoong-ankoi eeꞌ nauarama: diiꞌ boonamareꞌketa maamurariruꞌning tee avuavuꞌ nko-koo eeꞌnoko diiꞌ teeꞌ dompirompiꞌdoriko ooraarira teing-koo mmauꞌ daaꞌariruꞌ teeꞌ nariꞌ nko-koo. Teka ninge teing aing niiꞌmaikororiꞌ botoaransinooꞌ tee nkaang kara biivintampimaung-koong tamunsiꞌnung deemparavarooꞌnaang diikaang avuavuꞌkoong eeꞌnoko diiꞌ maamurariri tampaꞌ nkoveriko ooraariiꞌnaang teeꞌ nariꞌ minkuamanaꞌ. Teka diiꞌ daangantampimanooꞌkoo ning maiaꞌmoꞌneenga tenang Masedoniaꞌnameensiꞌnupoong niꞌninka nariꞌ merira diiꞌ maamurariaruko oorarampira. Eeꞌnoko diiꞌ teie, maiaꞌdoripeuꞌ. Teeꞌkoo ninge eeꞌ noruꞌansing: ainge niiꞌmaikororiꞌke tutung beeroꞌdaarima pakuraariiꞌ naang tampaꞌ maamurariri dupe-anta-koo tee avuavuꞌ avusiroꞌdariri nko-koo mauꞌdariruꞌnung. Bera ning moma tampaꞌ maamuari otoko ooampai tee diikaang avuavuꞌ domang-eta avusiroꞌari avuꞌ deempari otoko, minkuminku-poꞌnung deeaꞌ.
Aung kapooꞌ diiꞌke noruꞌeriaing: Naning tee okiꞌning sinang keempumaung tee okiꞌning kavumaung. Eeꞌnoko baa naning mmauꞌ keempumaung tee mmauꞌ kavumaung. Narunge baka bakaang domange miruꞌuainaꞌ avuai, domang mankiꞌdori averiꞌneenga. Niiꞌnarai botovuainaꞌ avuaukaꞌ, aiꞌ Kumponinge tee naning arooꞌketa avuꞌ nkovumaung piaavumaung. Eeꞌnoko Kumponinge tee aaꞌnaꞌ aruripeuꞌ apukaꞌdarimanooꞌketa deto, eeꞌnoko bera teie teing-koo apukaꞌdarimaing-koo ookara batei-koo makosiri otoꞌderuriaing, eeꞌnoko enang tee dau basinooꞌ otoꞌderuriaing ookara tampeng nko-nkonanka-koo niiꞌning paku-anta-koo makosinaꞌ. Teeꞌ Daari Meekung-koo aaꞌpuuꞌnooꞌka daariari otoinaꞌ,
“Teie bakaang avuavuꞌnanka bereng-antavuuꞌnung teing-koo ataꞌoiꞌnuka-koo, eeꞌnoko tee bakaang aarumo koontoꞌ tee teeꞌ nariꞌ otoi otomatoaing.” (Kena 112:9)
10 Kumponinge tee keenkeeng nkonuka sinang avurimaung eeꞌnoko damaꞌke keenavaang tampeng avurikooꞌ nantoonge nai-koo, eeꞌnoko teeꞌ nariꞌ teie eeꞌnarai deepoꞌ amutemuꞌke sinananka duꞌantarerurimatoaing, mmauꞌ kaverima tankaamperimaatoainaꞌ tampara aarumoi meenaꞌdori. 11 Eeꞌnoko diiꞌ teing anatenairu-koo maantoꞌduri otoriaing tampaꞌ avusiroꞌdariri otoriainaꞌ ookara batei-koo, eeꞌnoko teeꞌ nariꞌ avusiroꞌdariri tee diikaang avuavuꞌ niikaang bireng-koo siperiko teinge Judiaꞌnupoonge Kumponing-koo tampaꞌ tampaavaing. 12 Tee aung pakupaku diiꞌke nkoveriaing tee, teing Kumponing bakaning meekupoong naing paku-koong deeaꞌ kapooꞌkoo apukaꞌpariko, teka tee Kumponing dotuaravai amutemuꞌke teinge napoꞌ Kumponing-koo tampaꞌ tampaako. 13 Eeꞌnoko teie nko-nko tamparai diiꞌka tasiꞌantarariaing-koo nantoonge tee Kumponing pankaing-antavaavaing, diiꞌke tee doorenang tampara Karistooꞌ bakaang mavoꞌperi siraꞌperimaung-koo tee meumperi. Enang tee diikaang avusiroꞌdariri avuavuꞌ teing-koo eeꞌnoko niiꞌning-koo averereriaing ooaara Jerusalemaꞌnupoonge Kumponing daangampaavai. 14 Eeꞌnoko biikaang kunsi-koo diiꞌ pakuraarima pankaruntoonge noruꞌdaariaing tee-koo Kumponinge aaꞌnaꞌ deto basinooꞌ avusiroꞌantaruruꞌnung-koo.
15 Tampara masikung Kumponing-koo tee-koo bakaang avuavuꞌ minku-paaꞌkoo.