Niiꞌninge Paulaꞌ Daraumeempaioꞌ Daang Noruꞌaako Sirakaꞌantavuruꞌnaꞌ
10
(10:1–13:13)
Paulaꞌke Teing Daviraaꞌauꞌning Makuꞌuruꞌnaꞌ
Enang tee, kontampiri ning eentamaramaang diiꞌkoo, ning eeꞌnara Paulaꞌ, tee naning nkaning tooꞌde-nupoonge aaꞌmaamaung, “Tenang nariꞌ karompima aaꞌnaꞌ karoarukooꞌ, teka tenang isipoꞌ otoitaaꞌ aaꞌnaꞌ karamurikooꞌ;” Teka enang ninge daarirerompima Karistooꞌ doonko noruꞌari navu ninka karomanaꞌ diiꞌkoo eentamaramaang teing-eta tontaꞌdariaing. Tenang ning mora teing ning tooꞌdemaamaing turamparama diiꞌkoo niiꞌning nariꞌ turantampiꞌneenga. Aiꞌ teinge ning tasiꞌmaavainge ning kansiꞌnung aarumo siompamaung-pinaꞌ noruꞌmaama aaꞌmaamaung, “Paulaꞌke kiimatamuriarupeuꞌ.” Teka tee bane kansiꞌkoo oꞌnoring, teka turang tovang kansiꞌnupoonge nkoaamanaꞌ nkoampiaung. Tee iriꞌ niiꞌ otoꞌmemurimaung tee kansiꞌnupoong biikaning kapatau-pinaꞌ oroꞌ deeaꞌ, teka tee Kumponing-etaing eeꞌnoko Sietaniꞌ bakaang eꞌmaniang pesiꞌkoo makosie. Tee Kumponing bakaang iriꞌ ninka niiꞌke siinkaꞌparampimaung teing kara dairaiꞌkooning eeꞌnoko ookara daang minkunanka maavaiꞌarima Kumponing tampaꞌ noruꞌkoo paraparaꞌaama minkuaamaing. Eeꞌnoko ookara biikaang mataunanka niiꞌke pinkaꞌampiri bereꞌantavampimaung Karistooꞌ bakaang kara narung siompaavaꞌnaang. Enang tee teing-eta tontaꞌdariri otoriko ning mora teing ning tooꞌdemaamaing kiimatavarampaing ookara biikaning taarapiikananka-koo.
Kapooꞌ diikaang duta-koo uroꞌkanooꞌke otoing ee ooveriaꞌ otong? Arekeeꞌkoo ning Kumponinge diiꞌ tare-koo miruꞌmuuꞌnung-koo ampankeenaꞌdorimaang niiꞌninge tosiraariko? Naning Karistooꞌ bakaang kara-okovui-nka-pinaꞌ noruꞌari otoing deekoꞌ tee ning teeꞌ Karistooꞌ bakaang kara-okovui-nka-pinaꞌ noruꞌmuainge teeꞌ baka noruꞌaramanaꞌ nariꞌ. Aiꞌ Kumponinge taaꞌniꞌantamui pakumumaung, eeꞌnoko naninge maiaꞌantamuarupeuꞌ bane deepoꞌ daangamaramaung-pinaꞌ noruꞌmura, Kumponinge makosi-antamumanaꞌ nantoong tare-koo minkuanko. Teka aaꞌdampimang, tee diiꞌ tare-koong iriꞌ Kumponinge amuuꞌnung tee diiꞌ orari-anta-koong deeaꞌ nka diiꞌ puring-anta-koong, nkaang karavoto diiꞌ avoroꞌanta-koong-pinaꞌ noruꞌeriꞌneeng. 10 Aiꞌ diiꞌkoo niiꞌninge aaꞌperikooꞌ, “Paulaꞌke bakaning karavotonanka-koo aaꞌnaꞌ purimpari ivekung kara daarivukooꞌ, teka niiꞌ ninka oꞌnori amaiaaꞌomaung eeꞌnoko bakaang kara tariiꞌoarukooꞌ.” 11 Teinge teeꞌ kareaamainge eeꞌ tasiꞌpaavaing: Tee aaꞌ kapooꞌ oovunamuriiꞌ otoaꞌ teing-koo aing-koo aaꞌning-koo, karavoto daariamaung tenang isipoꞌ oꞌnoitaaꞌ eeꞌnoko tee kapooꞌ ninge nkoampaing tenang diiꞌ ninka nariꞌ oꞌnori.
12 Ning tee makosi-pinaꞌ dooremaravaung teing-koo maavaiꞌarima nau-antanuka tamparimaing ninka navaatang-koo otoꞌkoo, eeꞌnoko teing ninka naroꞌ basi tang-koo biiꞌka pankenanka tamparimaing ninka. Teka teing mataunaꞌ nkoariaꞌ biiꞌka miruꞌaamanaꞌ ooai paaravarima daang makosi-antavarikooꞌ. 13 Ning tee, teing-pinaꞌ deeaꞌ. Ninka doore karoma Kumponinge miruꞌmuuꞌnooꞌ divuꞌampaukaꞌnung. Teka miring-koo biivimaravaing deekoꞌ tee makosi miruꞌmuuꞌnooꞌ basiarioꞌ biivimaravaing nantoong tare-koo miruꞌmuuꞌnooꞌkoo, eeꞌnoko diiꞌ teinge nkaang tanata-koo kuunge otoring. 14 Ning taapoꞌ toonampaꞌ Ovoringe miruꞌmuuꞌnooꞌketa tenang diiꞌ tautaurampima, aiꞌ tenang tutung ning diiꞌanko mera tampara doorenang Karistooꞌkoong naurampiruꞌnang Ovoring bakaang iriꞌ oroꞌparavaruuꞌnung dei ning Ovoringe miruꞌmuuꞌnooꞌketa taapoꞌ toonamaung tammeripeuꞌ. Teka teeꞌ nkomaravaꞌ, aiꞌ tenang tutung mouꞌnang Ovoringe iriꞌ amuuꞌnung tee taaꞌniꞌpoi ning-koo oroꞌparako diiꞌke ooverima domang bereꞌdariruꞌnung Ovoring-aape. 15 Eeꞌnoko diiꞌkoo mintoomaramanaꞌkoo daangamarama niiꞌning biikaang nko-nko noruꞌansi deepoꞌ daangamaravaung. Nkaang pia tee diikaang masikaꞌanta deto nariꞌ dupui otoꞌkoo bera niikaang mintoong diiꞌkoo aaꞌnaꞌ kato pankaꞌparavainge. 16 Aaꞌnoainaꞌ, doorenang tampara napoꞌ daankiampiai diiꞌankoita kato anatenairu-koo. Aiꞌ ning niiꞌnung bakaang nko-nko-koo daangang-koo piamoaꞌ bakanooꞌke nkovuing-koo. 17 Teka Daari Meekunge eeꞌ minkuvui otong,
“Naning daangang-koo piavora deekoꞌ tee-koo Ovoring-koo daangamparavaing.” (Jeremaia 9:24)
18 Aiꞌ naning baka daangamparama makotuarupeuꞌ, teka Ovoringe daangampuko deekoꞌ makosi.