18
Koorin-nupoong-koo Mmauꞌ Bereꞌariruꞌnaꞌ
Teketa Aateni-namono sipura Akaiaꞌnameensiꞌkoo pareꞌarama Paulaꞌ Koorin-namono-aape beuꞌ. Teka narung Juꞌnupoong-koong kuneꞌuuꞌ miring Akuila, baꞌaang ninka Pirisila ninka, teenooꞌ Poontusi-nameensiꞌkoong, damaꞌke Itali-nameensiꞌketa pouꞌnung tenang teie Kalodiasie daurarong˜ pankainge Juꞌnupoong Roomaꞌnamono-ita tenkenaavaꞌnaang tampurioꞌ. Eeꞌnoko Paulaꞌke tering eeꞌnaring oovureeꞌnaang beuꞌ. Tering tering kaandesi tuaꞌurema baavevurekoꞌ mooꞌaama barenanka kanisiiaakoꞌ. Eeꞌnoko Paulaꞌ tering-pinaꞌ nariꞌ nko-nko nkovukoꞌnung deemparako kaandesi tuaꞌ tering ninka nariꞌ pakuvurema otorouꞌ. Eeꞌnoko pava dootuuꞌnava Juꞌnupoong biikanava-koo Doong Uaanaꞌmung kante bema teke teing ninka tataꞌeekoꞌ eeꞌnoko teka niiꞌning Juꞌnupoong eeꞌnoko Juꞌdeeaing arooꞌantavuruꞌ.
Tenang Sailas naanka Timoti Masedoniaꞌnameensiꞌketa poresioꞌ Paulaꞌ daankinang narung-koo avaruꞌ siraꞌpuma Juꞌnupoong-koo tee Pakoꞌpariꞌniiꞌ domampuri tarevuriainooꞌkoo nempaakoꞌnung tee eeꞌnara Jiisuuꞌ. Eeꞌnoko tenang teinge niiꞌning Juꞌnupoonge turampaama orakaꞌ minkuaako tee bakaang mononopaꞌketa daꞌmong tankavuma aaꞌpuruꞌ teing, “Enang aaꞌ diiꞌka arisirariaing. Kumponinge maromuuꞌnooꞌ nkanooꞌ dupeansing. Enang-eta tee ning Juꞌdeeaing-anko meeꞌnaang.” Eeꞌnoko dootuuꞌnava-ita tenkenura naning bakanava-koo beuꞌ miring Sisias Taastas, Kumponing-koo dootuuꞌarakoꞌnung. Bakanava pavanava dootuuꞌnava-ita dueꞌke otokoꞌ. Eeꞌnoko Karisipasie teing Juꞌnupoong biikanava pava dootuuꞌnava-koo pankainge Ovoring masikaꞌantavuuꞌ bakanava-nupoong nariꞌ tee ninka. Eeꞌnoko mmauꞌke Koorin-nupoonge Paulaꞌ taaravaara masikaꞌantavaara ntong-koo minkiarira meekaꞌantavariruꞌ.
Eeꞌnoko niiꞌnaꞌmung muunga Ovoringe Paulaꞌkoo oroꞌparara aaꞌpuuꞌ, 10 “Aroreaukaꞌ, siraꞌpeai dooroontaravaꞌ, aiꞌ ning tee daꞌ ninka nariꞌ oꞌnong. Naninge daꞌ taruaukaꞌnung daꞌ baikeruuꞌnaang, aiꞌ ning nantoong mmauꞌ otoꞌmemung anke amono osi pankamono-koo nkaning deempariaining.” 11 Eeꞌnoko teke tee Paulaꞌ namareꞌketa nautaakaara otouꞌ teing-koo meuꞌke tee Ovoring bakaang kara nau-antavurima.
12 Teketa tenang teie ovoꞌmaꞌ miring Kaalioꞌ teꞌ Akaiaꞌnameensiꞌ tarevukoꞌnang Juꞌnupoonge nariꞌ tapoꞌeera Paulaꞌ turampaama barampaara tuutunang-koo uroꞌkanooꞌ donkong-antavauꞌ aaꞌpaama, 13 “Aunge naninge tee nantoong Kumponing-koo daang dootuuꞌariiꞌnaang aavavurimaatoing botoi orokovui otoinaꞌ nko-antavurima.”
14 Teka tenang Paulaꞌ karooꞌnaang nkoarako Kaalioꞌke aaꞌpuruꞌ teing Juꞌnupoong, “Ee aing Juꞌ, aung kapooꞌ tuumpierimaung orara nko-nko deekoꞌ niiꞌnooꞌ naning aaꞌnaꞌ orari-anta-koong deekoꞌ tee ninge arooꞌdampiaing diiꞌ taara-koo. 15 Teka aung kapooꞌ tee kara-koo miruꞌnanka-koo eeꞌnoko mirinanka-koo tataꞌ eeꞌnoko diiꞌka diikaang boto-koo, ninge simpeꞌkoo piamoaꞌ. Diiꞌka simpeꞌeriaing.” 16 Eeꞌnoko teeꞌ minkuvura teie bataꞌuruꞌ teing teketa kara simpeꞌdoma-ita. 17 Eeꞌnoko teketa teinge Siosienis kompauꞌ, eeꞌnara Juꞌnupoong biikanava pava dootuuꞌnava-koo pankaing, eeꞌnoko muraꞌauꞌ teka kara simpeꞌdoma uroꞌkanooꞌka. Teka Kaalioꞌ aung-koo kapooꞌkoo taraꞌoaruuꞌ.
Paulaꞌ Bakanooꞌ Toroarara Teketa Napoꞌ Beemuꞌpinamuꞌ Nanuꞌ Tutumparuꞌnaꞌ
18 Teketa damaꞌke Paulaꞌ mmauꞌ doong teke otouꞌ, eeꞌnoko teketaꞌ ning eeꞌnoko teing niiꞌning baito-nupoong siꞌnooraꞌmurira Siiria-nameensiꞌaape toroaraaꞌnaang danto tenkenuuꞌ Pirisila daring Akuila nariꞌ. Bera Siensiria-namono-koo basiaruꞌ. Paulaꞌ tee temuꞌ kapooꞌ nko-koo marakavaruꞌnung Kumponing-koo, eeꞌnoko Juꞌ biikanaꞌ siompui tenang-eta deto dapo totoꞌparavaꞌ otokoꞌ. Bera enang dupe-antavura dapo apukaꞌpari napuꞌarara aareri-koo koinaara kato berouꞌ Eesia-nameensiꞌaape. 19 Eeꞌnoko Epeses-namono-koo basiarara Juꞌnupoong biikanava pava dootuuꞌnava-aape nanura Juꞌnupoong ninka tataꞌeekoꞌ. 20 Teinge pankaroong otooꞌnaang niaꞌaioꞌ tee kupiꞌouꞌ. 21 Teka siꞌnooraꞌurima aaꞌpuuꞌ, “Ning tee diiꞌanko toromaravaing napoꞌ, Kumponing-nung pia deekoꞌ.” Teketa Akuila daring Pirisila nariꞌ sipurima aareri-koo koinura tenkenuuꞌ Epeses-namono-ita.
22 Tenang tee Sisariaꞌnamono-koo siarara deto Jerusalemaꞌ bera teka dootuuꞌnupoong karavuri doonko tankinuuꞌ bakanooꞌ Antiokoꞌ. 23 Eeꞌnoko teke niiꞌning doong otora tenkenuuꞌ osinanka beeroꞌurima Kalesia eeꞌnoko Pirisiaꞌnameensiꞌkooning ookara Jiisuuꞌ siompaakoꞌning puring-antavurima.
Apolos Tampaꞌ Daankiaruꞌnaꞌ Teke Epesesie
24 Paulaꞌ Kalesia-nameensiꞌke teeꞌ koroarako tee naning Juꞌnung miring Apolos, Aleksandaria-namono-koong tee Epeses beuꞌnung maneenaꞌ minku bauko, eeꞌnoko Daari Meekung-koong kara tampaꞌ tasiꞌpui otokoꞌnunge. 25 Teenooꞌ tee naning Ovoring bakanavung-koo niiꞌnooꞌ basinooꞌ tampaꞌ barearuꞌnung, eeꞌnoko domang-eta karoma koontoꞌnaꞌ toꞌbiiari Jiisuuꞌ nau-antavurikoꞌ eeꞌnoko meekaꞌanta-koo Joonie Minkinara meekaꞌantavurikoꞌnameng nameng noruꞌui.
26 Avoroaꞌ kara tutumpuuꞌ teke Juꞌnupoong biikanava pava dootuuꞌnava-koo, teka tenang Pirisila daringe Akuila taaravureta teringe bokuvureta aaꞌnaꞌ deto kankenkankeng-antavuretuꞌ Kumponing bakanavung. 27 Eeꞌnoko tenang Akaiaꞌnameensiꞌaape pareꞌaraaꞌnaang piavoioꞌ teinge baꞌmaikoriꞌke baito-nupoonge puring-antavauꞌ eeꞌnoko Karistooꞌ sionuka-navitu-anko karavoto˜ daariauꞌ tee tampaꞌ onkeonkeꞌaavaꞌnaang. Tenang tee teꞌ tavoꞌarara teie aaꞌnaꞌ pakuvuruꞌ teing Kumponinge piaavuriko masikaꞌantavauꞌning. 28 Aiꞌ teie tee karikaꞌkoo meuꞌka tataꞌeema apooꞌuri Juꞌnupoong siraꞌpui nauvurima aaꞌpukoꞌ, “Daari Meekunge tee eeꞌ siraꞌpui otong tee Pakoꞌpariꞌniiꞌ domanturi tareruriainooꞌkoo nemperimaung tee eeꞌnara Jiisuuꞌ.”