19
Paulaꞌ Epeses Basiarara Tampaꞌ Koong-antavuruꞌnaꞌ
Tenang Apolos teke Koorin-navuntuꞌ Akaiaꞌnameensiꞌkoonooꞌ otoko Paulaꞌ Kalesia-nameensiꞌ sipura kansiꞌke iuꞌpoꞌnairue nanuuꞌ bera Epeses-namono-koo tavoꞌaruꞌ. Teka niiꞌning Karistooꞌ sionuka kuneꞌuruꞌ. Eeꞌnoko teie aaꞌpuruꞌ teing, “Diiꞌke ee Tanuaang Meekung nkaveruꞌnung tenang diiꞌke masikaꞌantaverira tee?” Eeꞌnoko teinge aaꞌpauꞌ, “A, niiꞌke bakei taaravampiaꞌ tee Tanuaang Meekung otoing deekoꞌ.” Eeꞌnoko teie aaꞌpuruꞌ teing, “Diiꞌ aminamuriiꞌke meekaꞌantarariruꞌnung?” Teinge aaꞌpauꞌ, “Jooni Minkinara bakanamuriiꞌke meekaꞌantamariruꞌnung.”
Eeꞌnoko Paulaꞌke aaꞌpuruꞌ teing, “Joonie tee nantoong orakaꞌ nko-ita bereꞌariko ntong-koo minkivurima meekaꞌantavurikoꞌnung nauvurima tee naning damaꞌ poaing masikaꞌantavaavaꞌnaang, eeꞌnoko aaꞌdampimang, tee masikaꞌantavaavaꞌnaang nauvuruꞌnung tee Jiisuuꞌ.” Teeꞌ taaravaara teing tenang teeꞌ meekaꞌantavariruꞌ Ovoring Jiisuuꞌ bakaang miring-koo. Eeꞌnoko tenang Paulaꞌke bakaang bireng panteꞌurioꞌ teing tee Tanuaang Meekunge maantoꞌuruꞌ, eeꞌnoko niiꞌnaꞌ karai kareauꞌ, napoꞌ tarampeeariruꞌ. Teinooꞌ nantoong nanaiꞌketa kenaanka-pinaꞌ ookara.
Teketa beekuri kaara-koo Doong Uaanaꞌmung kante tee pava dootuuꞌnava Juꞌnupoong biikanava-koo kuung tumparama kara siraꞌpukoꞌ avoroaꞌ. Teing ninka tataꞌeema niiꞌning arooꞌantavurikoꞌ Kumponing bakaang muuꞌkoo tasiꞌpai tung-koo. Teka tenang niiꞌning kontevoroma, masikaꞌanta-koo kupiꞌoroma, nantoong-koo oosiariruꞌning-koo dutakanooꞌke tee taung Karistooꞌnavung orakaꞌ minkuaakoꞌ. Eeꞌnoko Paulaꞌ teing-eta ketaꞌparuꞌ Karistooꞌ sionuka nariꞌ tee ninka. Eeꞌnoko doong kante tataꞌeekoꞌ teke bare-antanava miring Tairanus-nava-koo. 10 Tee aung tee kemareꞌka-koo teeꞌ nkoaruꞌnung. Teeꞌkoo ookutunairue Eesia-nameensiꞌkooninge Ovoring bakaang kara taaravauꞌ, Juꞌnupoong eeꞌnoko teing Juꞌdeeaing.
Maꞌnaange Siiva Baurukaaꞌ Tavuruꞌnaꞌ
11 Eeꞌnoko Kumponinge Paulaꞌkoo amutemuriiꞌ kapooꞌ taꞌnintaꞌning oroꞌantavuuꞌ. 12 Eeꞌnoko teeꞌkoo Paulaꞌ bakaning ankisipiꞌnanka eeꞌnoko baaronanka maroita nkavai nanaakoꞌ siipa-poꞌnupoong-anko, eeꞌnoko siipai tenang sipurikoꞌ teing, eeꞌnoko maꞌnari orananka bakoarikoꞌ.
13 Tenang tee Juꞌkoo niiꞌning nankaiꞌnupoong avitoitoi osinankai nanaakoꞌ maꞌnari orananka bataꞌkoo, eeꞌnoko niiꞌning teing-koo Jiisuuꞌnung miring-koo nantoong-eta maꞌnari bataꞌkoo piavorokoꞌ aaꞌpaavaꞌnaang, “Niiꞌke Jiisuuꞌnung miring-koo, tee eeꞌnara Paulaꞌke daankivumaung, aaꞌdampimang: Daꞌ maꞌnaang tenkeniai.” 14 Teing nankaiꞌnupoong-koo namaiaꞌke ˜kenaanka-taae teeꞌ eeꞌnaꞌ nko-koo paaravaakoꞌ. Temaiaꞌ narung pankaing piristiꞌ baurukaaꞌ miring Siiva, Juꞌnupoong-koong. 15 Teka teeꞌ paaravaako teie maꞌnaang orarai temaiaꞌ makuꞌurima aaꞌpuruꞌ, “Ninge Jiisuuꞌ noruꞌansi oꞌnong eeꞌnoko Paulaꞌ noruꞌansi oꞌnong, teka diiꞌ baata?” 16 Eeꞌnoko tee naning eeꞌnara maꞌnaang orara-poꞌnung teing-koo dau toꞌdiꞌarara ookara apooꞌuri murasiavurioꞌ teva-ita simpeng mmariauꞌ erenge sisiꞌarima.
Paulaꞌke Epeses-nupoong Siꞌnooraꞌuruꞌnaꞌ
17 Eeꞌnoko ookarai Epeses-nupoonge noruꞌauꞌ ookaviturai aaꞌnoko Juꞌnupoonge eeꞌnoko Juꞌdeeainge. Teeꞌ taaravaara avoroꞌ kuung kaiꞌaruꞌ teing-koo, eeꞌnoko Jiisuuꞌnung miring daangampauꞌ. 18 Eeꞌnoko teing-koo mmauꞌ baito-nupoong otorokoꞌ marunu makempai. Eeꞌnoko teinge nankaiꞌ nkonuka-koo nkoaruꞌnaꞌ taaravaara siraꞌpariruꞌ teing kapooꞌ orakaꞌ nkoaakoꞌning. 19 Eeꞌnoko biikaning buukunanka teing marunu daariari otokoꞌning oosiaara, bane mooꞌ pankainge, ntaꞌke tai-antavauꞌ ookarai ooaioꞌ. Tee-koo mooꞌ deeruaama naroꞌka naruaape kokoreiꞌ (50,000) nantoong naꞌmung doong mooꞌkoo makosi deeruauꞌ. 20 Aing ookara kapooꞌ doore-antavaioꞌ Ovoring bakaang kara purimpari beremparuꞌ urikung onou puruꞌui.
Epeses-nupoonge Paulaꞌkoo Naampa Pankaing Nkoauꞌnaꞌ
21 Enang tee teketa aung eeꞌ oroꞌ kapooꞌ nkoaruꞌnooꞌketa, Paulaꞌ bakaang tanuaange pia-antavuuꞌ Masedoniaꞌnameensiꞌ eeꞌnoko Akaiaꞌnameensiꞌ danto beeroꞌuritaaꞌ Jerusalemaꞌaape beeꞌnaang. Aaꞌpuuꞌ, “Jerusalemaꞌ meraiꞌnange teketa napoꞌ Roomaꞌ beeroꞌkoo aaꞌnaꞌ piamoi otong.” 22 Eeꞌnoko kenaankara bakaning-koo pakupakunanka-koo Masedoniaꞌaape botovuretuꞌ, Timoti naanka Erasitas. Tee eeꞌnara Paulaꞌ teke Eesiaꞌke niiꞌning napoꞌ doong otouꞌ.
23 Tee batei-koo tee turang pankaing tavoꞌaruꞌ Karistooꞌ bakanavung tooꞌdempaama. 24 Aaꞌnouꞌ: Epeses-nupoonge teni manikuma kumponing dootuuꞌaakoꞌnani miring Atimasi, eeꞌnoko naning narung miring Demitereasie silivaꞌkoong kapooꞌnanka taꞌnampukoꞌ bakaning ninka okiꞌnarekaꞌ baka-oonanka Atemasi dootuuꞌaakoꞌnava-pinaꞌ nariꞌ oroꞌnanka teni nariꞌ kuunge otoko. Eeꞌnoko nantoonge teni-koo dootuuꞌarimatooꞌnaang mooꞌaako mooꞌ mmauꞌ nkavaakoꞌ teinge kakeꞌiiariri taꞌnampaakoꞌninge. 25 Teeꞌkoo Demitereasie eeꞌnoko niiꞌning nariꞌ nko-nko nkoaakoꞌning naroꞌ bokuvurira aaꞌpuruꞌ, “Ee aing, diiꞌke noruꞌeri otong niiꞌke tee aung-koo amuriiꞌkoo nko-nko-koo mooꞌ mmauꞌ nkavampimaung. 26 Ooverimang diiꞌke noruꞌeri otong teie aunge Paulaꞌke tee arooꞌantavurima bereꞌantavurimang mmauꞌ nantoong aaꞌpuma, ‘Kumponinanka teing birenge nkoaarimaing teing kumponinanka deeaꞌ.’ Teeꞌ minkuvumaung, Epeses-namono-koo naroꞌke deeaꞌ, teka ookutunairu-koo Eesia-nameensiꞌkooning-koo. 27 Eeꞌnoko tee orakaꞌ bakei, aiꞌ niikaang nko-nko pooreꞌaako bakearaaꞌnaang eeꞌnoko napoꞌ tee dootuuꞌnava teni ovorinaang kumponing Atemasi bakanava tamunsiꞌnava deemparaaꞌnaang eeꞌnoko teni bakaang meenasi-eta duaꞌaraaꞌnaang pa, teni eeꞌnani ookara Eesia-nupoong eeꞌnoko ookara kansiꞌnupoonge dootuuꞌaamai.”
28 Eeꞌnoko Demitereasie teeꞌpuioꞌ taaravaara aaꞌnaꞌ masikaꞌ iiravoroma bokiaama aaꞌpauꞌ, “Atemasi teni Epeses-nani ovorinaang.” 29 Teeꞌkoo ookara nantoong temono osi pankamono-kooning purumpurunaving karakararearima naampa ninka ookara naroꞌdoma-aape kuaꞌpariruꞌ Kaiasi naanka Aristakas barantaakiaaresi tenaanka Masedoniaꞌnameensiꞌkoonaanka Paulaꞌ ninka nariꞌ nanaakoꞌnaanka. 30 Paulaꞌ tee teing nantoong karinga kara-koo piavouꞌ, teka teinge Karistooꞌ siompaakoꞌninge orokoauꞌ tee karingai tavaaꞌneeng-koo. 31 Eeꞌnoko napoꞌ niiꞌninge Eesia-nameensiꞌkoo pankenankai baꞌmaikoriꞌke botoarima karai kompai poteauꞌ teꞌ ookara naroꞌdoma beꞌkoo kariarako.
32 Enang tee teꞌ naroꞌarira paapaaꞌarima bokiaakoꞌ avutevuꞌai minkuaama niiꞌninge niiꞌnaꞌ, niiꞌninge niiꞌnaꞌ. Daping ookarai noruꞌaavaꞌ aming-koo teꞌ naroꞌ oosiariruꞌnunge. 33 Niiꞌnung naning teke otokoꞌ miring Aleksandaꞌ, eeꞌnoko Juꞌnupoonge tee karinga-koo uroꞌkanooꞌ donkong-antavauꞌ. Karingai ooaara eeꞌ noruꞌauꞌ, “Aunge pa tampaꞌ noruꞌui otong okoraꞌnooꞌ.” Tenang tee bakaang bireng toonuuꞌ dooroong-antavurira sirakaꞌantavuriiꞌnaang teing. 34 Teka teinge tee Juꞌnupoong-koong tasiꞌpaaraiꞌnange, Atemasi daang tampaakoꞌning-koong, pankaroong kenaanka aua-pinaꞌ bokiaama aaꞌpaakoꞌ, “Atemasi teni Epeses-nani ovorinaang.”
35 Teeꞌ nariꞌ nkoariri otorokoꞌ bera tee osi tarenung pora dooroong-antavurira aaꞌpuruꞌ teing, “Diiꞌ nantoong Epeses-nupoong taarameriai. Baie naninge noruꞌuaꞌ niiꞌ Epeses-nupoong teni ovorinaang Atemasi bakanava dootuuꞌnava pankava tareampimaing eeꞌnoko tereꞌ kapanareꞌ teni Atemasi bakanareꞌ paning-eta duaꞌaruꞌnareꞌ tareampikooꞌ. 36 Aing kapooꞌ daang tang-koo makosi deeaꞌ tasiꞌperi kaꞌduurariaing, kapooꞌ nkoveriaukaꞌ damaꞌke orarunsiraripeuꞌnung-pinaꞌ oroꞌ. 37 Aiꞌ anaanka naninka tenaanka diiꞌke poꞌantaverererinaanka aꞌ kapooꞌ meekung bakiaaꞌureaꞌ eeꞌnoko teni ovorinaang niikanani orakaꞌ minkuvureaꞌ. 38 Tee Demitereasi eeꞌnoko teing baka-oo tekaꞌnuka tee ninka nariꞌ poroining naning narung tuumpi-koo piavoroaing dei tee tuutunang˜ nkoroma daateꞌari otong eeꞌnoko kara simpeꞌnuka˜ pankeng otorong, teke tuumpieeaing teing ninka. 39 Kapooꞌ niiꞌning minku-koo piarori otoing deekoꞌ koompaaraꞌnavitu nauereriaing. Teinge makosinaꞌ kakaꞌdekearima tampaavainaꞌ nkoaravaing. 40 Aiꞌ niiꞌ orakaꞌ nkomarimang purumpurunaving biꞌmariri tavuꞌkoo tuumpimaaripeuꞌnaꞌ. Roomaꞌkoo pankenge teeꞌ tuumpimaariko dei tampaꞌ makuꞌarampiarupeuꞌ.” 41 Eeꞌnoko tenang teeꞌ minkuvurira teie bake-antavuruꞌ teing teꞌ naroꞌariruꞌning.