Niiꞌ Karistooꞌnung Mono Oꞌnori Bakaang Aarumo Oroꞌantavampiaing
4
(4:1–6:24)
Narung Onou Ninka Oꞌnoriaing Meekaꞌmariri
Tee tee ninge Ovoring bakaang daiꞌnisie kontampiri botoramping makosinaꞌ bokururuꞌnaꞌ otoriiꞌnaang. Boonko noruꞌdariaing, banainge otori daꞌdeng iiraroriaꞌ. Piaa oroꞌantaveri otorimaatoai tokoonaꞌ noruꞌdeeriaꞌ. Tanuaang Meekunge tee diiꞌ narung deeng-antarurining, teka aaꞌnaꞌ paarararimaatoai narung deentariri otoꞌkoo mooareeri otorima. Mono tee narung otong niiꞌke nko-antavampimaung Karistooꞌnung, eeꞌnoko Tanuaang Meekung tee narunge teeꞌ nariꞌ narung noruꞌkoo otoꞌkoo bokururuꞌnung. Ovoring narung otong, kapooꞌ masikaꞌantavampimaung narunge, ntong-koo minkie meekaꞌanta narunge; Kumponing narunge tee Niuma niiꞌ ookarai, niiꞌ ookara taremuri niikaang birenge mintoomparama niiꞌkoo kuung otomaung.
Pakumeeriainaꞌ Avuavuꞌnanka Ninka
Teka teieta bakaang maantoꞌui otoꞌketa Karistooꞌke niiꞌ kantemuruꞌ namaranaꞌ teing avuavuꞌnanka teeꞌ Daari Meekunge minkuvuuꞌnaꞌ aaꞌpuma:
“ ‘Tenang paning-koo deto koinura barampuri daiꞌnisinuka teie Ovoringe tankaampuruꞌ tee avuavuꞌnanka teing nantoong.” (Kena 68:18)
Tee “deto koinuuꞌ”-naare miruꞌ aming? Tee aaꞌ miruꞌ eeꞌ: Tee tero napoꞌ siaruꞌnung depeto kansiꞌkoo boonavaro-koo. 10 Tee eeꞌnara narung siaruꞌnung tee eeꞌnara napoꞌ deto koinuuꞌnung paning-koo daunavaro-koo isipoꞌ masipoꞌ ootukunairu-koo maantoꞌantavaraaꞌnaang. 11 Eeꞌnoko tee “avuavuꞌ tankaampuruꞌ”-naare miruꞌ aming? Miruꞌ aaꞌ eeꞌ oroꞌ: Niiꞌning kara okovuri nkanuka deempuruꞌ, napoꞌ niiꞌning nakaronuka deempuruꞌ, niiꞌning doorenang tampara daankivuma nanuꞌnuka deempuruꞌ eeꞌnoko niiꞌning tanata nkonanka nau-antavaarima. 12 Biikaang nko-nko Kumponing bakaning meekupoong bare-anta-koong dootuuꞌnupoong kakeꞌiiariainaꞌ eeꞌnoko Karistooꞌ bakaang mono makosinuka pankaꞌantavaavainaꞌ. 13 Bera tee niiꞌ ookara narung deemariaing masikaꞌanta-koo eeꞌnoko Kumponing Bauring noruꞌnaꞌkoo, eeꞌnoko naning-naummariri petaaꞌmoriaing nariꞌ basinaꞌ Karistooꞌ dakaosiꞌnaꞌ dupeari petaaꞌomanaꞌ. 14 Teketa tee nantoong onou tasiꞌpaaꞌnukai daang ampirinumparima˜ aavamaariko toireꞌ okiꞌnarekaꞌpinaꞌ oꞌnoriaukaꞌnung amutemuriiꞌ daang-koong nau-anta siompampiritaaꞌ, aaꞌnaꞌ booꞌai nankara avitoitoi biiꞌurimanaꞌ dovinge uupuvuriko. 15 Otoaꞌ, masikung narung minkuampima piaameeritaaꞌ ootukumariri pankaꞌmariaing Karistooꞌnaummariri, tee-koo kuung oꞌnori, niikaang boreꞌ deemparako. 16 Teie taremuriko niiꞌ teing bakaang mono-koo-navioꞌnanka-pinaꞌ mataunaꞌ beꞌnuꞌmariri oꞌnoring eeꞌnoko narunaꞌ makotumpiri pakumeeriaing niiꞌ ookara tee eeꞌnara mono pankaꞌantavampiri eeꞌnoko purimariri piaae.
Urikung Aarumo Sipampira Nerakung-koo Baremariainaꞌ
17 Aung tee nkaang naunau diiꞌ naurampimang Ovoring bakaang miringe diiꞌ dateꞌantarampima: Akoing tamunsiꞌnanka-pinaꞌ nkorariaukaꞌ kapooꞌ masikung deeaung siompaamaing-pinaꞌ. 18 Teing biikaang noruꞌ tee mutaanang, damisimainku teing tee-koo domaang Kumponinge amurimaung-koo. Aming-koo, nnaꞌ papaaranuka koontoꞌ, boreꞌke deerenuka otorokotaaꞌ. 19 Anutua nkoarima maimaiaꞌnaꞌ nko-koo avariri otoꞌnuka, naroꞌketa okoꞌokovurima aarumo kuꞌmiꞌ nkoaamaing. 20 Teka tee Karistooꞌkoo barerariruꞌnaꞌ teeꞌ deeaꞌ. 21 Diiꞌke tee koontoꞌ tampaꞌ taaraveruꞌ tee, eeꞌnoko diiꞌ tee-koo kuung otoritaaꞌ bakaang kara masikung nauraariko barorontariruꞌ. 22 Urikanaung enang bakei kiruꞌdariaing teronung aarumo-koo otorikoꞌnaꞌkoong, mono narung bakaang noruꞌ karaaꞌke booꞌ tositosi-koong siompui otomaung diiꞌ orari-anta-koonaꞌ. 23 Diikaang onou eeꞌnoko tanuaang nerakaꞌantarariaing. 24 Nerakanaung kuruntariai Kumponinge nkoniiꞌnaung, tee-pinaꞌ oroꞌnaung, koontoꞌnuka, meekaꞌdariri otoriainaꞌ masikung siomperi.
25 Teeꞌkoo enang bakerariaing tosi minku-eta. Masikung narung minkuerimatoaing tapoꞌdeeri otorimaing ninka, aiꞌ diiꞌ teing narung mono-koo mantaꞌdeeri otong. 26 Diiꞌ iirarorima deekoꞌ tee iira oramuriau deeng-antaveriaukaꞌ. Bointuriai duaaꞌ mmeꞌ tumparavaruko. 27 Sietaniꞌ doona aveaukaꞌ teeꞌ. 28 Tee bakisipung bakiaaꞌ nko-ita bakearara bakaang birenge mintoong tampara kakeꞌiiari nkovuai apukaꞌparavaing ninka tankaampuainaꞌ. 29 Kara orarananka minkueriaꞌ otoai, teka tampara toꞌbiiari kara narung, pakureeri navureerima. Teeꞌkoo taararaariaininge tee tampaꞌ taararaariaing biraankearioꞌ. 30 Teeꞌ nariꞌ Tanuaang Meekung Kumponing bakaang orarunsi-antaveriaꞌ otoai, aiꞌ tee Tanuaang Meekung tee Kumponing bakaang taaꞌniꞌanta niiꞌ mooꞌmuriaing-koong asiꞌnaꞌmung. 31 Dontaꞌdariri otorimaatoai aing aaꞌning-etaꞌ, domang orakaꞌ noruꞌ, iira, iooꞌ, peusiꞌ, minkuminku eeꞌnoko napoꞌ tooꞌde. 32 Teka navureeri otorimaatoai dunsirunsi˜antareerima, tontaꞌantareerima diiꞌka Kumponinge Karistooꞌkoo kuunge tontaꞌantareruruꞌnaꞌ.