2
Kumponinge Niiꞌ Domaang mooꞌmuruꞌnung Tee Kapooꞌ Pankaing Masikung
1 Enang tee Bauring aaꞌnaꞌ pankaing deempari otoko ooampima teeꞌ nariꞌ aaꞌnaꞌ baroromariai bakaang kara-koo ampankeenaꞌmori sipampiꞌneenga. 2 Ooveriko tee doorenang koosinunankai Moosesi nauauꞌnaare tee purintoꞌpoꞌnaare eeꞌnoko ookara boto totoꞌpaamainge tee mooꞌ nkavaavaing makuꞌkoo. 3 Enang Ovoring Bauringe eeꞌnarai bakei tampaꞌ domamuriainaꞌ dooremuriko arekeeꞌ niiꞌke tee mosianung baariꞌampipeuꞌ bakaang kara sipampiri? Bakei makotuaꞌ! Teie eeꞌnarai tutung nantoong daankivurikoꞌ; 4 Eeꞌnoko teketa teie daankivuriko koontoꞌ taaravauꞌninge damaꞌke napoꞌ tampaꞌ tasiꞌantamaaruꞌ Kumponinge masikee-antavuioꞌ aing aaꞌning ninka: taaꞌniꞌantananka, taꞌnimpaariiꞌnanka, amutemuriiꞌ nko-nko purintoꞌnanka, eeꞌnoko Tanuaang Meekung-etaing avuavuꞌnanka tankaampuuꞌning teie piavouꞌnaꞌ. Tee tee Jiisuuꞌnung doorenang tampara ookara-koo dau basinooꞌka baroromperiaing.
Jiisuuꞌ Tee Niiꞌ Mooꞌmuruꞌning Niikaang Urantanara
5 Napoꞌ niiꞌnung kapooꞌ otong tasiꞌantamuriaing Jiisuuꞌ tampaꞌ taaravampiiꞌnaang, aiꞌ Kumponinge tee otootoꞌ damaꞌnung niiꞌke minkuampimaung koosinunankai tare-koo barevuriaꞌ. 6 Teeꞌ nariꞌ Daari Meekunge niiꞌnooꞌka siraꞌpui otong, naninge aaꞌpuuꞌnooꞌka,
“Bakei tokoonaꞌkoo dake teing nantoong tamung kansiꞌnupoong noruꞌeri tanataverimaung!
7 Dake teing tamung okiꞌnaa batei-koo depeto koosinunanka-ita boong sipering, teketa dake napoꞌ teing deto pankaing-antaveruꞌ araka ninka neramperi, ookara kapooꞌnanka teing-koo kauꞌkoo boonavete-koo sipera teinge tareaavaꞌnaang.” (Kena 8:4-6)
8 Enang tee ookara kapooꞌnanka niiꞌke tareampiiꞌnaang tampura niiꞌnung kapooꞌ niiꞌnooꞌ tontaꞌuaꞌ niiꞌ niikaang tare-ita. Aꞌnooꞌ tee enang otoinaꞌ ookara kapooꞌ niikaang tare-koo kuunge mmeꞌ baruꞌ ooampiaꞌ. 9 Teka niiꞌke Jiisuuꞌ ooampiri otong tee eeꞌnara okiꞌnaa batei-koo depeto sipuuꞌnung koosinunanka-koo boong, teketa enang teie booꞌ toraꞌpuioꞌ Kumponinge tee deto pankaing-antavura araka ninka nerampuuꞌ. Eeꞌ, Kumponinge aaꞌnaꞌ avusiroꞌari Jiisuuꞌ booꞌ mantong-antavuuꞌ niiꞌkoo ookara-koo kansiꞌkoo-nupoong-koo.
10 Kumponinge tee baurukaaꞌ kuraꞌnariꞌ doompeto paning-koo tampaꞌ otoroainooꞌ tavoꞌuriiꞌnaang miruꞌurima teie Jiisuuꞌ tutung baike kuneꞌantavura makosi-antavuuꞌ teing mooꞌuriaining biikaang urantanara deempari otooꞌnaang. Tee tee teeꞌ makosinaꞌ teie Jiisuuꞌke dupe-anta-koo aiꞌ Kumponinge tero ookara kapooꞌ nkovuuꞌnunge miruꞌuuꞌnaꞌ. 11 Enang tee eeꞌnara tee meekaꞌanta-nko eeꞌnoko teing teie meekaꞌantaniiꞌnuka tee narung okoꞌbosiꞌ otoꞌevorong. Teeꞌkoo tee maiaꞌoaꞌ teie teing baaraꞌmainkaang tang-koo, daari meekunge minkuvuma aaꞌpumanooꞌkoo,
12 “Ninge daankiampaing dakaang miring teing-koo mmaikoriꞌkoo, eeꞌnoko teing dootuuꞌkoo naroꞌarimaing-koo meuꞌke ninge daangantampaing daꞌ.” (Kena 22:22)
13 Eeꞌnoko niiꞌnooꞌke napoꞌ aaꞌpuuꞌ,
“Ning Kumponing-koo noruꞌ eꞌmanansi oꞌnoaing.” (Aisaiaꞌ 8:17)
Eeꞌnoko niiꞌnooꞌke napoꞌ eeꞌ minkuvui otong,
“Ning aung eeꞌnara, eeꞌnoko teing toirekaaꞌ ainge ning Kumponinge amuuꞌning.” (Aisaiaꞌ 8:18)
Jiisuuꞌ Naning Deemparuꞌnung Niiꞌ Tampaꞌ Pakumuriiꞌnaang
14 Aaꞌnoko niiꞌ teing baurukaaꞌ ookara bioꞌ dovang ereng-poꞌnupoong deemariko tee teeꞌ nariꞌ niiꞌpinaꞌ oroꞌ deemparuꞌ bakaang booꞌke Sietaniꞌ bake-antavui pesiꞌuuꞌnaang, tee eeꞌnara booꞌanta-koong iriꞌ kompui otomaung, 15 eeꞌnoko niiꞌ domaang isikung amurima unaa-antamuriiꞌnaang booꞌkoo amorompima temuꞌketa daiꞌmariri oꞌnorikoꞌning. 16 Tasiꞌpari otong koosinunanka paku-koo teeꞌ nkoaravaꞌ teka teing Eebaraamiꞌ baꞌdompenku paku-koo teeꞌ nkoaruꞌnung. 17 Teeꞌkoo niiꞌnaꞌ makotuaꞌ, teka tee teing-pinaꞌ baaraꞌmainkaang-pinaꞌ masikaꞌ Kumponinge nkovuuꞌ tee piristiꞌ tampara deto basi otooꞌnaang. Aaꞌnung piaa-poꞌnunge eeꞌnoko mataaꞌi Kumponing bakaang pia siomparioꞌ, eeꞌnoko napoꞌ Kumponing bakaang iira oꞌanta-koonge nantoong biikaang orakaꞌ nkonanka-koo. 18 Aaꞌnouꞌnooꞌkoo teie baike eeꞌnoko paara-anta mantompuuꞌ, teeꞌkoo teie niiꞌning pakuvuripeuꞌ paara-anta kuneꞌaavaining.