Jiisuuꞌ Tee Moosesi-koo Dau Basi
3
(3:1–4:13)
Jiisuuꞌnung Miringe Tee Moosesi Bakaang Miring Aaꞌnaꞌ Puruꞌuuꞌnaꞌ
Ee mmaikoriꞌ, paning-eta miruꞌmurioꞌ nariꞌ meekaꞌmarimaing, deto noruꞌampiaing tee Jiisuuꞌ, eeꞌnara Kumponinge kara oko-antavura botovuioꞌ pouꞌnung eeꞌnoko tee tee piristiꞌ pankaing, tee eeꞌnara niiꞌke sirakuraꞌ masikee-antavampimaung. Tee tee Jiisuuꞌ mataaꞌiari otokoꞌ tee-koo tee botovuuꞌnung-koo teeꞌ eeꞌnaꞌ nariꞌ Moosesi mataaꞌiari otokoꞌ Kumponing bakanarempoꞌ ookutunarempoꞌ tanatavurima. Teka Jiisuuꞌ baruꞌ aaꞌnaꞌ makosi tampuuꞌ miring pankaing nka-koo, nerang-poꞌnung, Moosesi bakaang miring puruꞌui. Teeꞌ nariꞌ aaꞌnomanaꞌ narung nareempoꞌ okovui otomaung tereempoꞌkoo pankainge. Muuꞌ kante teeꞌ, namuuꞌnaꞌ niiꞌning nantoong okovoroi otorong, teka teing ookeng okovenung tee Kumponing narung. Teka Moosesi tee Kumponing bakanamuiaang-koo botovotonaaꞌ deempari kara-nau-koo mataaꞌiari nauvurikoꞌ tee naning damaꞌke Kumponinge siraꞌpuainung domampuriaing teing minkuvuma. Teka tee Karistooꞌ tee Kumponing bakanamuiaang-koo mataaꞌiaruꞌ Kumponing bauring deempari okovui, eeꞌnoko niiꞌ eeꞌning teing bakanamuiaang-kooning deemariri oꞌnoring nemariri pinkaꞌmariri oꞌnoriaing deekoꞌ, dotumariri amaiaaꞌmoriaꞌ oꞌnoriaing toroarara domamuriainooꞌkoo.
Niiꞌke Kumponing Bakaang Kara Nimpaꞌampiaukaꞌ Temuꞌnupoong-pinaꞌ
Teeꞌkoo Tanuaang Meekunge minkuvumanaꞌ nariꞌ aaꞌdampimang,
“Eꞌmung bakaang aurong taaraverira domang kapantoriaukaꞌ teinge diikakatauroi nkoarima ereanamaakoꞌnaꞌ. Tenang Iisipiꞌketa teke meeꞌboraꞌ sirakamaaꞌke baramparankoꞌnang Keenang-navoraꞌkoo unaavoroainaꞌ noruꞌama, bane ninge nkaang nko-nko purintoꞌpoꞌninge pakuaranko ooaitaaꞌ, teka masikaꞌantamaavarukoꞌ;
Teinge bakei ereanamaakoꞌ karenaumo kivora mareꞌkoo teke pooariri.
10 Teeꞌ nkoarima iirang-antamaioꞌ aaꞌpantuꞌ, ‘Teing ookara doong-koo biikaang domang tee pooaramaung. Nkaang aarumo noruꞌaavarukooꞌ.’
11 Teeꞌ noruꞌama aaꞌnaꞌ iiramoraiꞌnange marakamarama aaꞌpantuꞌ, ‘Teing teing nkanooꞌ uaaroma tumpariaukaꞌning.’ ” (Kena 95:7-11)
12 Teeꞌkoo diiꞌ mmaikoriꞌ aaꞌdampimang, tanatarariaing diiꞌ diiꞌka orakaꞌ nkorariꞌneeng, tee Domang-anta Kumponinge Tero Pakoꞌpariꞌniiꞌ niiꞌ taremuriainooꞌkoo masikaꞌantaveriaruma duaꞌdariꞌneeng teieta Kumponing domantooꞌ iriꞌpoꞌnung-eta. 13 Teka doona mmeꞌ otoko tautaureeriaing ookara doong-koo “eꞌmung” tang-koo makosining-koo, diiꞌkoo narung orara-koonge noruꞌke tosivuma domang kapang-antavuꞌneenga. 14 Aiꞌ niiꞌ Karistooꞌkoo, Tee Pakoꞌpariꞌniiꞌkoo, nariꞌ tampaꞌ noruꞌmariri oꞌnoriaining deekoꞌ bera botu basinooꞌke, niiꞌ teing tee ninka nariꞌ biraankemariri mantaꞌnuka oꞌnoriaing.
Teka enang batei aung niiꞌ pinkaꞌmariri oꞌnoriainang. Ampaꞌmoriaukaꞌnung Kumponinge tautaumurima eeꞌ daarivuuꞌnaꞌ,
15 “Eꞌmung bakaang aurong taaraverira domang kapantoriaukaꞌ teinge diikakatauroi nkoarima beiꞌbeiꞌmaakoꞌnaꞌ.” (Kena 95:7,8)
16 Eeꞌnoko teing baata nantoong ninge minkuaramatomaing Kumponing bakaang aurong taaravauꞌning teie teing karavuriko teketa tee teinge ereanavaakoꞌ? Tee aaꞌ teinge eeꞌninge Iisipiꞌketa tenkenauꞌninge Moosesi siompai. 17 Eeꞌnoko teing baata Kumponing iirang-antavaakoꞌning teing-koo ookara mareꞌ karenaumo kivora-koo kuunge? Tee aaꞌ teinge eeꞌninge orakaꞌnko nkoauꞌnung eeꞌnoko makuꞌkoo booꞌpariruꞌ teka meeꞌboraꞌ sirakamaaꞌkoo. 18 Eeꞌnoko teing baatai Kumponinge marakavarama bakanooꞌ uaaroma tumpariarooꞌ naang tampuruꞌning? Tee aaꞌ teing eeꞌning tee meumpaavarukoꞌning nauvurima teeꞌ minkuvuuꞌnung. 19 Teeꞌkoo enang niiꞌke tasiꞌpampiring teing bakanooꞌ uaaroma tung-koo tauraꞌpuriaruuꞌning masikaꞌantavaavaruioꞌ.