3
Tampara Aarumo-koo Imaꞌmariri Oꞌnoriainaꞌ Kumponinge Tampaꞌ Nkomurioꞌ
Nau-antaveriaing teing dakaning nantoong ovontung-koo boong otoroainaꞌ, siompaarima teing, amutemuriiꞌ tampeng nko-nko nko-koo maamuariri. Naning orakaꞌ minkuaavaꞌ otoroai, turanturang baariꞌai, banainge otoroai, eeꞌnoko nantoong ookara-koo navurariri otorimaatoai. Aiꞌ niiꞌ Karistooꞌ bakaning teing tero oꞌnorikoꞌnaꞌ sipampiruꞌning aaꞌning-eta: kanuꞌmarima taarapiikamarikoꞌ akoꞌke niiꞌning ninka poo-antamaariko, amutemuriiꞌ karakaraaꞌkoo biꞌmariri doturotu besiꞌampima. Niikaang batei tamung keraꞌpampikoꞌ aaꞌning-koo: orakaꞌ noruꞌ eeꞌnoko mamairo, nantoonge munteꞌmaariko napoꞌ niiꞌka munteꞌmeerima. Teka tenang bakaang piaa eeꞌnoko avusiroꞌari otoꞌ aarumo siraꞌpuuꞌnang tee-koo batei-koo Kumponinge domamuruꞌ. Teie domamuruꞌnooꞌ niiꞌ tee koontoꞌnuka oꞌnori kapooꞌ tampara niiꞌka nkoampiruꞌnung-koo deeaꞌ, teka baka bakaang piaa-eta duuꞌmuri meekaꞌantamurima domamuruꞌnung, aaꞌnoma napoꞌ pontoꞌantamurima tee ninka Tanuaang Meekung nerakaꞌantamuruꞌ. 6-7 Eeꞌ, tee Tanuaang Meekung niiꞌkoo dau mmauꞌantavui piampuuꞌnung tee-koo niikaang domang-anta Jiisuuꞌ Karistooꞌkoo kuunge niiꞌ Kumponing ninka naroong-antamuriiꞌnaang teie piaamurira, eeꞌnoko barenku domaang oparavaukaꞌnung-koong nempampimaung okomuriiꞌnaang.
Tee-koo kapooꞌkoo nauansing-koo arooꞌdaravaing makosi daꞌ Taitas. Daꞌ tee teing-koo aing-koo kapooꞌkoo derarari otooꞌnaang piamomaang, dakaning nantoong Kumponing masikaꞌantavaamaing kakeꞌiiariri otorooꞌnaang tampara nko-nko-koo. Aing teing kapooꞌ booꞌanta, nantoong ookara paku-antaning. Teka aing aaꞌning-eta dontaꞌdariri otoriai: nianiaꞌ makuꞌpaaꞌkoo, pokapokaꞌ, boorouꞌning biikaning mirinanka depeto parapara-koong minkunaa, eeꞌnoko karakarai turang, Juꞌ biikaang toomonanka tataꞌeema. Aiꞌ aing teing tamunsiꞌning eeꞌnoko naning pakuvuarupeuꞌ. 10 Naning tee nantoong-koo pokapokaꞌ nkovuaing deekoꞌ tautaueai eeꞌnoko kemuꞌkai nkovuko deekoꞌ napoꞌ tautaueai; 11 Teketa beemuꞌpinamuꞌkoo tamung doonko sipeai tee, eeꞌ noruꞌei: Aung tee naning koompaaꞌ, oreng aarumoi maantoꞌ, baka tuutunamparing.
Paulaꞌke Taitas Tee-anko Poꞌkoo Bokuvuuꞌnaꞌ
12 Tenang ninge tenaanka Atemasi naanka eeꞌnoko Tikikas daꞌanko botoampeko tampaꞌ aaꞌnaꞌ paarararavaing ning kuneꞌkoo teka Nikopolisia, aiꞌ ning tee tenang kamaari bakanang teke otoꞌkoo darumari oꞌnong. 13 Napoꞌ aaꞌnaꞌ pia-antaveriaing dakanavitu teinge tampaꞌ neriaareaing tenaanka aaꞌnoko tee boto nau-anta Siinasi eeꞌnoko Apolos paku-koo beekaang nanunanuꞌkoo. Eeꞌnoko kokoiravererima beekaang nanunanuꞌkoo makosining mooniꞌ averereriaing. 14 Eeꞌnoko teeꞌ pakuaarema noruꞌ nkavaavai kakeꞌiiariainaꞌ tampara nko-nko nko-koo, baata teing aaꞌnaꞌ piaaruꞌnuka pakuaarimaatoainaꞌ, eeꞌnoko biikaang otootoꞌ sinampoꞌnung deempari otoaing.
15 Aing ookara niiꞌ ninka nariꞌ oꞌnorimainge biikaang tampaꞌ tang diiꞌanko botoaamang. Niikaang tampaꞌ tang nauereriaing teing niiꞌmarang baito-koo kuunge. Tee biraanke tee diiꞌ ookara ninka otomatoaing. Eeꞌ, teeꞌ nariꞌ.