1 Wawu ara kanmat, paratesah, iya hu kultuw handra-handra mwomwan pe hu pakut mwomwan tawawu, 2 mepo wawu ngara koro nondriya hu kultuw mwomwan para kol pwan, pe wawuho ndruwa payit mepo pohon para kolo king mepo ngara kiro mu para kol paingan yang. Pe mwomwoyou ara, ara ita pombulen mahapo kili hu ndramat mepo hu konho hilingi nongan pwi. 3 Mamu worou masih turo nondriya hu namiliwai para kultuw pwassin para nombuwe tou pe tumbusi hu kultuw ara, pe tuho ndruwa hu lohongatou pe hu namiliwa tou. Pe worou turayah turo iyapolo kultuw para nombuwe tou, pe worou ara lahiy para kawiri kora tou kiya hu kultuw torou tehe hu ndramat masih i. 4 Hapeko koisirai ta Ngindrai isa kili tou, ara namandran iya, paratesah, iya namiliwai tan isa kili tou, 5 hu kultuw handra-handra mwomwan torou, ara imbusiy pe turayah tehe hu ndramat kanmat, hapeko iya pahas ta Ngindrai, kinsopwat tou pe imbusi tou tuwiri taleh tehe Kristus kinwiriy. 6 Ngindrai ihingini Kristus iyapolo rou tusatine kimat, pe iyki rou tuyera mipwan sura yiy, pe iyki rou tuyera mipwan iyapolo Kristus Yesu para tukoro mu kiyapolo yiy kiro kol paingan yang, 7 pe tehen tora ko, nondriya lang kamulan, andre kiyingani pahas namandran, pe namiliwai tan mepo kanlahi para kanyirowei pwi kisa kiltou kiyau kili Kristus Yesu. 8 Paratesah, iyau pahas ta Ngindrai opu, kinsopwat wawu, pe iyau lohongai ndrisiyon ta wawu iya kili yiy–pwen wawu mbukena wawu kanmbusiy aro pwi, hapeko ara yukyuk iyau kili Ngindrai— 9 pe kinyau hu mbulen wawu mbusiy, ara pwi, pwen pe wawu mbuna akapo ngala wawu kiya aliy. 10 Paratesah, Ngindrai imangsani turayah mahapo turopo, pe yiy imangsanirou iyau kili Kristus Yesu para worou kambusi hu mbulen hiyan, mepo Ngindrai kinmwaniyaniy pwen mamu ita, para tukambusiy.

11 Pwen akalohonganiy tehe wawu ara wawu Ndramira Lah iro mwonen tina wawu imwalahiy ta wawu, pe hu pohowe wawu tehe hu ndramat ‘kansondriti sangi hu pwi.’ Pe yihu mbukenahu, huyoh hu tehe hu ndramat hu ‘kasondriti sangi hu.’ (iwong iya sosondrih nombuwehu iyau nima ndramat). 12 Pe akalohonganiy tehe tandrohongan ara, ara wawuro mawen kili Kristus, wawu ara hu ndraye Yisrayel pwi, pe wawu ndramat para mawen mepo Ngindrai irandrangan iyapolo tapaniu, pe wawuro kol pwan ara tehe wawu kanpahasani Ngindrai pwi, pe wawu kowu tesah itapo isa. 13 Hapeko mahapo iyau kili Kristus Yesu opu, pwen iyau ndreyen imbusi wawu mepo wawuro mawen masih, ara wawu kansa pakeh kili Kristus.

14 Paratesah, Kristus mbukenan, ara yiy kultuw para ndriya wayis torou, mepo imbusi hu malpat mepo hu Yutah pe hu Ndramira Lah husawule hapat, pe ipwalngani kou para hingas para mbuna kirayah songot, pe para mbuna kamasilpat. 15 Pe iyau nombuwe Kristus opu, irapiyani nongan para pwahanou ta hu Yutah iyapolo hu nongan para pwahanou sahin-sahin para aliy, pe iyki hu nongan para koro ndruwan. Pe lohonga Kristus ara para kimbusi hu ndramat malpat ara hukarayah hapat, pe imangsani ndramat howen iyau kili yiy pe iyki ndriya wayis iya mwalinga hilu. 16 Pe iyau kei tondrih opu, Ngindrai isowani hilu malpat kene para karayah hapat o. Pe kultuw para rasisingat mwalinga hilu, ara kinitingundrun kinmat. 17 Yiy isa pe ipohowe nongan para ndriya wayis iya kili wawu mepo wawuro mawen, pe iyki ndriya wayis i iya kili yihu mepo huro pakeh. 18 Paratesah, iyau kili yiy opu, worou malpat kene tulahiy para kaya kili Tamarou iyau kili Mwoiwan Haiyan hamou o. 19 Pwen mahapo, ara wawu konto tehe hu ndramat para mawen pe hu ndramat yowe hu pwi, ara pwi, hapeko tukantayah hu ndraye Ngindrai, pe hu ndramiran para suwen hawum, 20 mepo hu aposel pe hu poropet ara hurayah mbulndroiyi wum iyapolo Kristus Yesu mbukenan yiy tehe pahut para sotina seu. 21 Pe iyau kili Kristus opu, hu keye seu hawum mwanye ara husawule, pe iya namandran tehe yumwa totohun hawum haiyan namandran ta Yapan. 22 Pwen iyau kili Kristus opu, wawu masih wawusa harong i, para wawu karayah yumwa Ngindrai, mepo iripo kiltou iyau kili Mwoiwan Haiyan.