1 Paratesah, tunan wawu Ndramira Lah opu, yo Pol urupo kou, ara iya pohoweya nongan hiyan ta Kristus Yesu–

2 Wawu kanhilingiy ndrokonan tehe urupo mu iya poho mbulen para pahas ta Ngindrai mepo kiniykiy iripo kili yo para kuikiy kisa kili wawu. 3 Pe nongan mepo iro kohon, ara Ngindrai kinpwainganiy kinsa ngawan kili yo iyau lohongai kokohon tehe kunratuluwiy hape kinsa kili wawu. 4 Kapa akanime nongan iye, pwen andre lohonga wawu kileu, pe andre akayirowe lohongai kokohon to kili Kristus Yesu. 5 Pe nongan kokohon iye, ara Ngindrai kinpwainganiy kinna kili hu ndraye hasap kanna pwi, hapeko mahapo kinpwainganiy iyau kili Mwoiwan Haiyan iya kili hu aposel haiyan ta Ngindrai pe hu poropet. 6 Lohongai kokohon ara, ara iye, iyau nongan hiyan opu, hu Ndramira Lah andre kapo melit kihisoule ko kiyapolo hu Yisrayel, pe andre tukayawule pe karayah hapat o. Pe andre tukawiri lomwes kiyawule ko kili Ngindrai mepo itandrangan iyau kili Kristus Yesu .

7 Yo urayah ndramat para poya mbulya Ngindrai, ara iyau nongan hiyan iye, pe iyau yukyuk para pahas ta Ngindrai mepo iykiy isa kili yo iyapolo mbuliya pwoke tan. 8 Pe konan yo ara ngolo pwi iyata hu mepo ngala hu pwi masih, ta hu ndramira Yapan, hapeko iyau pahas ta Ngindrai opu mepo kiniyki kinsa kili yo para kupohowe nongan kiya kili hu Ndramira Lah. Pe hu melit hiyan mepo andre kinhipwen pwi ata Kristus, 9 pe para kupwaingani lohongai kokohon ta Ngindrai kiya ngawan, mepo hu lang mamu ara iro kohon kili Ngindrai, yiy mepo imangsani hu melit masih. 10 Lohongai iro ndriya Ngindrai, ara lang mahapo, para lohongai waison tan, ara andre kipwainganiy kiyau kili hu sios, pwen andre hu pohon pe hu pwoke nopwaran ta hu mwomwoyou mepo hu hora kol paingan yang para andre hu kapahasaniy. 11 Pe lohongai pwokeyan atan mepo ita kili Ngindrai mepo andre kinto-kinto, ara kinpwainganiy kinsa kiltou iyau kili Kristus Yesu Yapan torou. 12 Pe iyau kili yiy opu, pe iyau lohongai ndrisiyon torou iya kili yiy, pwen andre tukarahatini rou pe koro mwoimwoi para tukaya mbulmara Ngindrai. 13 Pwen tehen torako usok wawu para ndriya wawu mbuna kimwa kiya hu nopwaran mepo urupo kuniy, paratesah, ara para hiyan ta wawu.

14 Paratesah, tunan aro ko, pwen urupo tukuruhu pe utohun iya mbulmara Ngindrai, 15 pe iya ngala Ngindrai opu, hu ndrai sih masih para kol paingan yang pe para kol pwan ara hutopo. 16 Pe utohun tehe kiyau hu melit hiyan pe lahayan atan, andre kipwokeyani wawu kiyapolo pwoke ta Mwoiwan Haiyan ita mbulkura ndriya wawu.

17 Pwen pe Kristus ara andre kiro ndriya wawu kiyau lohongai ndrisiyon. Pe utohun tehe andre kimbusi wawu karahatini wawu, pe andre akarayah tehe kei hakou mepo ngondron kinsin iya kultuw para namiliwai ta Ngindrai. 18 Pwen wawu yi, andre akawiri pwoke kiyawule polo hu ndramira Yapan haiyan masih, pe andre kapahasani namiliwa Kristus isa kiltou, ara ndrohongan maihan, pe ndrohongan niwen, pe ndrohongan iya paingan, pe ndrohongan iya mbulun. 19 Pe kapa wawu nakapahasani namiliwai tan iye mepo ngara kiyki lohongai hiyan mepo ihohin iya–pwen andre wawu kapep kiya hu melit masih mepo Ngindrai ipep iya aliy.

20 Pwen yiy mepo ilahiy para kimbusi melit ihohin masih mepo iramwaitini tesah tusok pe tulohonganiy mepo iyapolo pwoke tan iripo pombulen iya nondriya rou, 21 ara tukahari ngalan kiro sios, pe kiyau kili hu hasap kiyau hasap, ara andre hu masih kahari ngala Kristus Yesu kinto pe kinto! Ndrokonan.