1 Pe akoho ndruwa kultuwayi Ngindrai, paratesah, wawu ara norun hu mepo ndriyan imbuluhi wawu neren imwonen. 2 Akarikai kiya kultuw para namiliwai, pwen tehe Kristus inamili worou pe iyki mwoiwan tehe yukyuk sih ngonohon layin iya, iya kili Ngindrai tehe yukyuk.

3 Hapeko wawu mbuna akambusi kultuw handra para pilah kiro mwalinga wawu, ndre hu kultuw handra-handra mepo andre kiyki masirai kisa kili wawu, ndre wawu mbuna akamolou, paratesah, hu kultuw aro, ara mwomwan para hu yau haiyan ta Ngindrai hu kambusiy. 4 Pe mbuna akawong nongan para kiyki masirai, pe mbuna akapwasosohou o mwaihei, pe mbuna akapwasemit mepo kinyau sai pwi, hapeko akarawuloh kiya kili Ngindrai kiya tesah imbusiy isa kili wawu. 5 Paratesah, andre akapahasaniy toro: ndramat mepo ngara kipopilah, pe ndramat mepo kultuwayin kinmwonen pwi ndre ndramat ngara kimolou – ndramat tehe tora, ara ngara kitotohun kiya kili hu kultuwayin tehe ngindrai tan – pe handra memelit para kolo king ta Ngindrai pe ta Kristus mepo ngara kiro mu kiya aliy, ara andre kinpo pwi. 6 Pe ndramat hamou mbuna kipwasike wawu kiya hu nongan para pwasosohou, paratesah, hu ndramat mepo hukonho hilingi nongna Ngindrai pwi pe hu humbusiy tehen tora, ara andre hukawiri korahu. 7 Pwen tehen tora ko, wawu mbuna akasusuye sura hu.

8 Paratesah, mamu wawu ro lokuhan, hapeko mahapo akansa nondriya ngana Yapan, pe kultuwayi wawu ara kiro tehe hu ndramat hu ngara koro nondriya ngana Yapan. 9 Paratesah, kultuwayi ngana Ngindrai iripo kili worou, ara ngara kipwaingani hu melit hiyan masih, hu kultuw imwonen masih, pe hu nongan ndrokonan masih. 10 Pwen akakahi tesah mepo Yapan kipwes kiya aliy. 11 Pe wawu mbuna akasusuye kiya kultuw para lokuhan, hapeko akarehe hu. 12 Paratesah, hu ndramat hukonho hilingi nongan pwi, pe hu mbusi melit kokohe, ara kahamasirai para katiyani hu. 13 Hapeko ngana Ngindrai andre kirehe melit masih kisa ngawan - pe melit masih isa yelan ara tehe ngana melit sih. 14 Pwen tehen tora ko nongan kinpa toro:

15 Pe wawu kaponokulani mipwan ta wawu – mbuna akarikai tehe hu ndramat lohongahu waison pwi, hapeko tehe hu ndramat lohongahu waison. 16 Paratesah, hu lang mahapo ara iripopo iya mwomwan, pwen nondriya hu sai masih ara akambusi hu melit hiyan opu. 17 Pwen tora ko mbuna akoro makokowu, hapeko lohonga wawu kileu kiya namiliwai pwokeyan ta Yapan. 18 Pe mbuna akayin wain mepo andre kimbuiwani wawu akaya kultuw mwomwan, hapeko akapep kiya Mwoiwan Haiyan. 19 Pe akapowaliy kiya hu waliya Tepit kiya kili wawu hamou-hamou, pe akapowaliy, pe akapowaliy kiya hu waliy haiyan, pe akapowaliy ta Mwoiwan Haiyan. Pe akara kuwah pe akapowaliy kiya kili Yapan kiyau ndriya wawu masih. 20 Lang masih akarawuloh kiya kili Ngindrai mepo Tama hu melit masih, pe kiya ngala Yapan torou Yesu Kristus.

21 Pe akaiki wawu akaya pwan kili hamou-hamou ta wawu kiro pahandra nohowai ta Kristus .

22 Wawu pihin ara akaiki wawu kaya pwan pahandra hu nambuyu wawuhu, pwen tehe wawu ngara kambusiy iya kili Yapan. 23 Paratesah, kamai ara ihohin iyata nambuyun, pwen tehe Kristus ara ihohin iya sios, pe sios ara nombuwen, pe yiy ara Ndramat Hiyan Para Sopwat. 24 Pwen tehe sios iyki yiy iya pwan pahandra Kristus, pwen tora ko, hu pihin i hu kaiki hu kaya pwan pahandra hu kamai tahu kiya melit masih.

25 Pe wawu kamai, ara akanamili nambuyu wawu hu, pwen tehe Kristus inamili sios pe iyki yiy mbukenan para kimat para kisopwat sios. 26 Pe iyau nongnan, yiy isungani sios iya ndran pe imbusi irayah howen pe haiyan. 27 Pe iyki sios iya kili yiy mbukenan tehe sios sih lahayan, pe kas ndre konkon, ndre handra mwomwan mbuna kiro aliy, hapeko kiro imwonen pe kiro haiyan. 28 Pwen tehen tora ko hu kamai hu kanamili hu pihin tahu tehe hu namili nombuwe hu mbukenan. Pe kamai mepo inamili nambuyun ara tehe inamili yiy mbukenan. 29 Ndramat hamou kinho mwisnani nombuwen mbukenan pwi, hapeko ngara kihang nombuwen anandrinai pe kipwokere nombuwen. Pwen Kristus ngara kimbusi tehe tora ko kiya kili sios – 30 paratesah, worou ara nombuwe Kristus hakai-hakai. 31 “Pwen ndroiyin aro ko, kamai hamou andre kitali taman hilu tinan pe kippai sura nambuyun, pe nombuwe hilu andre kirayah hamou opu. ” 32 Iye ara mbulndroiyi nongan kokohon—hapeko urupo wong, ara iya ta Kristus pe sios. 33 Pwen tora ko, hamou-hamou ta wawu kinamili nambuyun tehe inamili yiy mbukenan, pe pihin ara kihaiyani nambuyun.