1 Pe wawu mbunah ara akahalingi nongna tama wawu pe tina wawu hu kiya ngala Yapan. Paratesah, kultuw aro ara imwonen para kambusiy. 2 Nongan para pwahanou iho mu mepo Ngindrai itandrangan iya aliy, ara toro—“Akahaiyani tama wawuhu pe tina wawuhu. 3 Akambusi toro pe melit masih andre kirayah hiyan kisa kili wawu, pe lenge wawu nakiro kol pwan ara andre akapwesaniy ndrangan niwen.” 4 Wawu tamahu mbunah, ara wawu mbuna kasuhuhuri ndriya noru wawu hu para ndriya hu kilokuh, hapeko akapomene hu pe akapwahanou hu kiya hu hinonou para nongna Yapan.

5 Wawu ndramat para pwandrendres, ara akahalingi nongna hu namandran ta wawu para kol pwan kiya tesah hukapwai para akambusiy, akahaiyani hu kiya hiyan pe akoro pahandra nohowai, pe akambusiy kiyapolo ndriya wawu masih. Akambusi tehen tora ko tehe wawu ngara kahilingi Kristus. 6 Wawu mbuna kahilingi hu para kaluwi lohongahu kiro mwonen hu koro nimnim kisata wawu, hapeko akahilingi nongna hu tehe wawu ndramat para pwandrendres ata Kristus, pe wawu kambusiy kiyapolo namiliwai pwokeyan ta Ngindrai iyau ndriya wawu imwonen. 7 Pe akambusi mbulya wawu kiyapolo ndriya wawu masih, pe akambusi mbulya wawu tehe wawu ndramat para pwandrendres ta Yapan, pe ta ndramat pwi. 8 Paratesah, akapahasaniy tehe konan wawu tora mwoimwoi ndre wawu ndramat para pwandrendres, hapeko sehe melit hiyan wawu mbusiy, ara Ngindrai andre kiyki kene wawu.

9 Pe wawu namandran ara akambusiy tehen aliy i kiya kili hu ndramat para pwandrendres ta wawu, pe akapo hiyan kiya kili hu, pe ndriya wawu mbuna kilokuh pe akapanohowani hu, paratesah, akapahasaniy tehe yiy mepo Namandran ta wawu pe ta hu ara iyera kol paingan yang. Pe yiy, ara kinho namili hamou o pwi.

10 Nongno nakisahapwen ara toro; Akarahatini wawu kiya kili Yapan, pe akawiri pwoke pwokeyan atan. 11 Pe akasohongani hu melit masih para pahun ta Ngindrai, pwen andre akoro tine pwokeyan kapa sinai kipakarawani wawu kiya hu pwasoyou tan. 12 Paratesah, pahun torou ara kinna polo hu ndramat para kol pwan pwi, hapeko iyapolo hu pohon tahu payit, hu pwoke nopwaran ta sinai, pe hu ndrokotina payit para lokuhan mepo hutopo mu iya kol pwan. Pe pahun torou i, ara iyapolo hu payit pwokeyan handra-handra pe sinai mepo hutora yang. 13 Pwen tehen torako, pwen akasohongani hu melit para pahun mepo Ngindrai iykiy isa kili wawu, paratesah, hu payit mwomwan hukasa para kapopahun sura wawu, ara wawu kanrahatini wawu pwen para akaramwaitini hu. Pe kapa akanmwanyani wawu pwen para pahun, ara andre wawu koro tine pwokeyan. 14 Pwen akoro tine pwokeyan, pe akaiki nongan ndrokonan kirakayani ndrokolo wawu tehe kondrei, pe akaiki kultuw imwonen tehe pwelekei haiyen kiro wiyinere wawu, 15 pe akasohongani hatna pweleka wawu, mepo iyau nongan hiyan para ndriya wayis, mepo andre kimbusi wawu koro hinehes para akapohowe nongan. 16 Pe melit handra iye i, ara wawu kapwotisingi lohongai ndrisiyon tawawu tehe sil wawu kasap kiro nima wawu para kipenani wawu. Sil aro ara andre kiyki songot kapa sinai kisorowe wawu kiya hu nah ngandrahan masih atan. 17 Pe akaiki ndrutuha paya wawu para sopwat hiyan ta Ngindrai, pe akasap nongna Yapan mepo Mwoiwan Haiyan iykiy isa kili wawu tehe semela pahun. 18 Pe akasok Ngindrai lang masih, pe akatohun kiya melit masih handra-handra, kiya pwoke ta Mwoiwan Haiyan. Pe kapa wawu nakatohun, ara wele wawu mbuna kimai, pe akatohun kiya kili hu ndramira Yapan masih.

19 Pe akatohun sato yi, kiro mwonen nakuwong nongna Kristus, ara Ngindrai kiyki hu nongan para kupwai, pe mbuna kunoh, hapeko kuwong hu nongan kokohon para nongan hiyan kileu kiya kili hu ndramat. 20 Paratesah, yo uwiri poho Ngindrai pe upohowe nongnan pwen urupo nondriya kou. Pwen pe akatohun kiya kili Ngindrai sato tehe mbuna kuwong kiyapolo nohowai.

21 Pe Tikikus ara nali mepo nere imwonen, pe ipwotisingi lohongan pe ngara kipo mbulya Yapan, yiy andre kisa pe kitiyani melit masih kisa kili wawu, pwen andre akapahasani urupo tapeh pe urupo mbusi tesah. 22 Pe tunan lohongai aro ko, pe andre kupwandrisa yiy kisa kili wawu, pwen andre akapahasani yowu topo tapeh, pe andre kipwokeyani lohonga wawu i.

23 Ndriya wayis, namiliwai, pe lohongai ndrisiyon iyau kili Ngindrai Tamarou pe Yesu Kristus kiya kili nali hu pe pisu hu. 24 Pahas pe namiliwai mepo kinho hipwen pwi, ara kiya kili hu masih mepo namiliwai ta hu kinho hipwen pwi, iya kili Yapan Yesu Kristus.