1 Yo Pol iyasura Timoti youlu ndramat para poya mbulya Kristus Yesu, youlu ratuluwi nongan iye isa kili wawu ndramira Yapan masih tora Pilipai, iyasura hu pohon pe hu ndramat para sopwat mbulen para sios.

2 Pahas pe ndriya wayis iyau kili Ngindrai Tama worou pe Yapan Yesu Kristus isa kili wawu.

3 Lang masih ngara kulohongani wawu, pe ngara kurawuloh kiya kili Ngindrai. 4 Pe lang masih ngara kutohun kisata wawu masih, ara ngara kutohun kiyapolo pwesai, 5 paratesah, iro mwonen lang wawu susuye isasura yo iya mbulen para pohoweya nongan hiyan, ipoo isa matnen mahapo. 6 Pwen pe upwotisingi lohongo iya melit aro, tehe Ngindrai mepo irandroiyi mbulen hiyan iro ndriya wawu, ara andre kiro pombulen manau kipoo kimbusiy kiyahapwen kiya matne lang Kristus Yesu kimui.

7 Pe lang masih ndriyo ita kili wawu, pwen hiyan para kuhingorowe wawu masih toro, paratesah, wawu masih susuye sura yo iya pahas ta Ngindrai. Pe konan urupo nondriya kou, ndre kupenani nongan hiyan pe kupwokeyaniy. 8 Ngindrai opu ilahiy para kipwokeyani nongno tehe upwai ndrokonan, hingorowo isa kili wawu, ara iyau ndriya Kristus Yesu mbukenan. 9 Pwen toro ko, utohun tehe kultuw para namiliwai ta wawu andre kihon kiro kili wawu, pe andre lohongai hiyan pe lohongai ileu masih, ara kiro kili wawu.

10 Pwen pe utohun i tehe andre akahire tesah mwayih opu, pe andre akoro mwonen, pe akoro mwoimwoi kipoo lang para Kristus kimui. 11 Pe akapep kiya kultuw imwonen mepo iyau kili Yesu Kristus—pwen andre hu ndramat kahaiyani Ngindrai pe kahari ngalan.

12 Pe wawu nali pe pisu, unamiliy para wawu kapahasaniy tehe tesah irayah kili yo, ara isopwat para kimbusi nongan hiyan kingau. 13 Pwen pe hu ndramat masih para memere topo suwe king, pe hu masih hayah i, ara hu pahasaniy tehe tunan Kristus opu pwen urupo nondriya kou. 14 Pe tunan urupo nondriya kou, pwen nalihu pe pisuhu, ara hu wiri pwoke iro kili Yapan. Pe hu rahatini hu pe hu pohowe nongan hiyan pe hu kannoh pwi.

15 Pe ndrokonan hu hayah ara hupohowe nongna Kristus, paratesah, hu maimai ano pe hu kokou ano. Pe hu hayah ara hupohowe nongan hiyan iyau namiliwai pwokeyan mwayih. 16 Hu ndramat aro, ara hutora pohowe nongan iyau namiliwai, paratesah, hu pahasaniy tehe urupo nondriya kou ara tunan para kupenani nongan hiyan. 17 Pe hu ndramat hayah hu kanpohowe nongna Kristus kinyau ndriyai hiyan pwi. Hapeko nere hu iya nongan, hupa ndre urupo nondriya kou pe andre hu koroiki nopwaran kisa kili yo manau. 18 Hapeko kiniyki nopwaran kinsa kili yo pwi, upwes iya aliy. Pe hiyan para aliy, ara nongna Kristus hu pohowei, konan hu pohowei hupohowe nongnan iyau lohongai ndrokonan ndre pwasoyou ndre mwomwan, melit hiyan ara tehe nongna Kristus, ara topo pohowei. Pwen tunan aro ko, pwen upwes, pe andre kuro pwes manau. 19 Paratesah, upahasaniy tehe wawu sopwat pe wawu tohun iya kili Ngindrai pe iyki Mwoiwan Haiyan ta Yesu Kristus, pe tesah kintayah kinsa kili yo, ara andre kimbusi yo kuro mwoimwoi. 20 Pe lohongo pwokeyan iya melit itapo isa, ara andre kunmasi kinna mbulyo pwi, hapeko kiro mahapo kiya pe lang masih, ara andre kurahatini yo. Pwen pe melit masih kumbusiy, konan kumat ndre kuro mwalen, ara andre kuhari ngala Kristus. 21 Paratesah, lohongo toro, kuro mwalen, ara yo ata Kristus. Pe kapa kumat, ara andre kuwiri hiyan kiyau aliy. 22 Pe kapa kuro ndron mwalen kiya nombuwe, ara andre kuro mbusi mbulen ta Kristus manau. Hapeko ukowu namiliwo, para kuro ndron mwalen, ndre kumat. 23 Pe yo urupo nondriya lohongai malndra ara: Unamiliy para kumat pe kuro mwalen kili Kristus kiro kol paingan yang, mepo andre kiya hiyan masih.

24 Hapeko iya hiyan ta wawu, pwen urupo ndron mwalen. 25 Pwen aro ko, ulohonganiy tisingiy tehe andre kuro ndron mwalen sura wawu para kusopwat wawu, para akapwotisingi lohonga wawu, pe andre kupwes kiyapolo lohongai ndrisiyon. 26 Pwen pe kapa kumindron sura wawu yi, pwen tunan yo ko, pwen andre wawu kahari ngala Kristus Yesu.

27 Pe melit hiyan masih, ara kultuwayi wawu mbukenan ara kiro mwonen pe kiho ndruwa nongan hiyan ta Kristus. Pwen konan kusa nime wawu ndre kuro mawen ndre, pe kuhulong wawu, ara andre kupahasaniy tehe wawu tora tine pwokeyan, pe andre akoro hamou kiya mwoiwa wawu, pe tukapo pahun tehe worou hamou opu, kiya lohongai ndrisiyon para nongan hiyan.*v.13. T/P: Sisar–T/P: ndramat pohon para kol pwan 28 Pe wawu mbuna akanoh kata hu mepo hu mwisnani wawu. Akoro tine pwokeyan, pwen kapa wawu kambusi toro, ara andre kirayah kinima melit kiya kili tehe Ngindrai andre kipwalngani hu. Paratesah, Ngindrai opu imbusi hu melit masih irayah toro. 29 Upwai toro paratesah, iyata Kristus opu, pwen andre wawu kapwotisingi lohonga wawu kiya kili yiy o, ara pwi, hapeko wawu kuni nopwaran iya ngalan. 30 Pe wawuya nondriya nopwaran ara iya harong o, tehe wawu kannime yo kunkuniy pwen, pe wawu hilingiy tehe urupo kuni nopwaran manau.